ཀུན་དགའ་བོ་རིགས་ཀྱི་བུ་བཟང་པོ་འདི་ནི་བསྐལ་པ་དགུ་ཁྲི་ཉིས་སྟོང་ན་བསྐལ་པ་ལེགས་པར་སྤྲུལ་པ་ལ་འཇིག་རྟེན་གྱི་ཁམས་བཀོད་པ་ཆེན་པོར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་འཕྲུལ་པའི་རྒྱལ་པོ་ཞེས་བྱ་བར་འཇིག་རྟེན་དུ་འབྱུང་བར་འགྱུར་ཏེ། ཀུན་དགའ་བོ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་འཕྲུལ་པའི་རྒྱལ་པོ་དེའི་འཇིག་རྟེན་གྱི་ཁམས་བཀོད་པ་ཆེན་པོ་ཞེས་བྱ་བ་དེ་ནི་འབྱོར་པར་འགྱུར། རྒྱས་པ་དང་། བདེ་བ་དང་། ལོ་ལེགས་པ་དང་། ཉམས་དགའ་བ་དང་། མི་དང་སྐྱེ་བོ་མང་པོས་གང་བར་འགྱུར་ཞིང་ལག་མཐིལ་ལྟར་མཉམ་པ་དང་། ཀ་ཙ་ལིན་དི་ལྟར་རེག་ན་འཇམ་པ་དང་། མེ་ཏོག་གི་ཤིང་ལྗོན་པས་བརྒྱན་པ་དང་། རོལ་མོ་སྣ་ཚོགས་སྒྲོགས་པ་དང་། སྤོས་སྣ་ཚོགས་ཀྱིས་བདུགས་པ་དང་། རྟག་ཏུ་རྒྱུན་མི་འཆད་པར་གདུགས་དང་། རྒྱལ་མཚན་དང་། བ་དན་བསྒྲེང་བར་འགྱུར་རོ། །ཀུན་དགའ་བོ་བཟའ་བ་དང་། བཏུང་བ་ནི་དཔེར་ན་སུམ་ཅུ་རྩ་གསུམ་པའི་ལྷ་རྣམས་ཀྱི་ལོངས་སྤྱོད་ལྟར་བསམས་པ་ཙམ་གྱིས་འགྲུབ་སྟེ། མི་དེ་དག་གིས་ཉེ་བར་སྤྱད་པ་དང་། ཡོངས་སུ་སྤྱད་པ་ནི་དེ་ལྟ་བུར་འགྱུར་རོ། །ཀུན་དགའ་བོ་དེའི་ཚེ་འཇིག་རྟེན་གྱི་ཁམས་བཀོད་པ་ཆེན་པོ་དེ་རྟག་ཏུ་བཀོད་པ་ཐམས་ཅད་ཉེ་བར་སྟོན་པར་བྱེད་དེ། དེས་ན་འཇིག་རྟེན་གྱི་ཁམས་དེ་བཀོད་པ་ཆེན་པོ་ཞེས་བྱའོ། །ཀུན་དགའ་བོ་སངས་རྒྱས་ཀྱི་ཞིང་དེར་སེམས་ཅན་གང་དག་སྐྱེས་པ་དེ་དག་ཐམས་ཅད་ཀྱང་རྒྱ་ཆེན་པོ་ལ་མོས་པ། ཐེག་པ་ཆེན་པོ་ལ་ཡང་དག་པར་ཞུགས་པ་ཤ་སྟག་ཏུ་འགྱུར་རོ། །ཀུན་དགའ་བོ་དེ་བཞིན་གཤེགས་པ་རྣམ་པར་འཕྲུལ་པའི་རྒྱལ་པོའི་ཚེའི་ཚད་ནི་ལོ་ཁྲིར་འགྱུར་རོ། །ཡོངས་སུ་མྱ་ངན་ལས་འདས་ནས་ཀྱང་དམ་པའི་ཆོས་ལོ་བྱེ་བར་གནས་པར་འགྱུར་རོ། །ཀུན་དགའ་བོ་གང་གི་ཚེ་དེ་བཞིན་གཤེགས་པ་རྣམ་པར་འཕྲུལ་པའི་རྒྱལ་པོ་ཡོངས་སུ་མྱ་ངན་ལས་འདའ་བ་དེའི་ཚེ་ཡང་བྱང་ཆུབ་སེམས་དཔའ་སྒྲ་རྣམ་པར་གྲགས་པ་འདི་ངའི་འོག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ཀུན་གྱི་ཁྱབ་བདག་ཅེས་བྱ་བར་འཇིག་རྟེན་དུ་འབྱུང་བར་འགྱུར་རོ་ཞེས་བྱང་ཆུབ་སེམས་དཔའ་སྒྲ་རྣམ་པར་གྲགས་པ་ལུང་བསྟན་ནས་ཡོངས་སུ་མྱ་ངན་ལས་འདའོ།