།དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་ཚིགས་སུ་བཅད་པ་འདི་དག་གི་མངོན་པར་བསྟོད་ནས་ཐལ་མོ་སྦྱར་ཏེ་སྟན་ལས་ལངས་ནས་བླ་གོས་ཕྲག་པ་གཅིག་ཏུ་གཟར་ཏེ་པུས་མོ་གཡས་པའི་ལྷ་ང་ས་ལ་བཙུགས་ནས། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་དེ། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །གལ་ཏེ་ཞུས་ནས་ཞུ་བ་ལུང་བསྟན་པའི་སླད་དུ་བཅོམ་ལྡན་འདས་ཀྱི་བདག་ལ་སྐབས་ཕྱེ་ན། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་བདག་ཕྱོགས་འགའ་ཞིག་ཞུ་ལགས་སོ། །དེ་སྐད་ཅེས་གསོལ་པ་དང་། བཅོམ་ལྡན་འདས་ཀྱིས་ཚེ་དང་ལྡན་པ་ཡུལ་འཁོར་སྐྱོང་ལ་འདི་སྐད་ཅེས་བཀའ་སྩལ་ཏོ། །ཡུལ་འཁོར་སྐྱོང་ཁྱོད་ཅི་དང་ཅི་འདོད་པ་དྲིས་ཤིག་དང་། ངས་དྲིས་པ་དེ་དང་དེ་ཉིད་ཀྱི་ལུང་བསྟན་པས་ཁྱོད་ཀྱི་སེམས་རངས་པར་བྱའོ། །དེ་སྐད་ཅེས་བཀའ་སྩལ་པ་དང་། ཚེ་དང་ལྡན་པ་ཡུལ་འཁོར་སྐྱོང་གིས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་དུ་དང་ལྡན་ན་ཆོས་ཐམས་ཅད་ཀྱི་ཡོན་ཏན་གྱི་ཁྱད་པར་ཐོབ་པར་འགྱུར། གཞན་ལ་རག་མ་ལས་པའི་ཤེས་པ་འཐོབ། མྱུར་བའི་ཤེས་རབ་འཐོབ། སྤོབས་པ་རྣམ་པར་ངེས་པ་འཐོབ། སྣང་བ་འཐོབ། ཐམས་ཅད་མཁྱེན་པ་ཉིད་ལ་འཇུག་པ་དང་། སེམས་ཅན་ཡོངས་སུ་སྨིན་པར་བགྱིད་པ་དང་། ཡིད་གཉིས་སྤོང་བ་དང་། སོམ་ཉི་སྤོང་བ་དང་། ཐམས་ཅད་མཁྱེན་པ་ཉིད་དུ་རྣམ་པར་ངེས་པ་འཐོབ། སེམས་ཅན་འཛུད་པ་ལ་མཁས་པ་དང་། ཇི་སྐད་སྨྲས་པ་དེ་བཞིན་དུ་བགྱིད་པ་དང་། ལྡེམ་པོ་དག་ཡང་དག་པ་དང་། སེམས་ཅན་གྱི་ཁམས་ལ་མཁས་པ་དང་། སངས་རྒྱས་རྗེས་སུ་དྲན་པ་འཐོབ་པ་དང་། ཞུ་བ་ཐམས་ཅད་ཞུ་བ་དང་། ཆོས་ཐམས་ཅད་འཛིན་པ་དང་། མྱུར་དུ་ཐམས་ཅད་མཁྱེན་པ་ཉིད་འཐོབ་པར་འགྱུར། དེ་ནས་ཚེ་དང་ལྡན་པ་ཡུལ་འཁོར་སྐྱོང་གིས་དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བྱང་ཆུབ་སེམས་དཔའི་སྤྱོད་པ་རབ་ངེས་པ། །ཡང་དག་ཉིད་དུ་ཇི་ལྟར་དེ་འབྱུང་དང་། །ཡེ་ཤེས་རྒྱ་མཚོའི་བཀའ་མཆིད་རྣམ་ངེས་པ། །མི་མཆོག་རྒྱལ་བས་བདག་ལ་བཤད་དུ་གསོལ། །ཤིན་ཏུ་སྦྱངས་པའི་གསེར་གྱི་གཟུགས་ལྟ་བུ། །