Degé Kangyur volume 42, F.230.a

།རྫུ་འཕྲུལ་རྐང་དང་མངོན་ཤེས་མཆོག་ལ་མཁས། །​དབང་པོ་སྟོབས་དང་རྣམ་པར་ཐར་པ་བསླབས། །​སེམས་ཅན་ཀུན་གྱི་སྤྱོད་པ་ཐུགས་ཆུད་རྟོགས། །​མཉམ་མེད་ཡེ་ཤེས་མཚོ་ལ་ཕྱག་འཚལ་ལོ། །​འགྲོ་བ་རྣམས་ཀྱི་སེམས་རྒྱུད་རབ་ཏུ་མཁྱེན། །​སྤྱོད་པ་གང་དང་ཇི་ལྟར་ལས་འབྱུང་དང་། །ཚུལ་སྒོ་གང་གིས་རྣམ་པར་གྲོལ་འགྱུར་བ། །​དེ་ནི་བཅོམ་ལྡན་མི་ཡི་མཆོག་གིས་མཁྱེན། །​འདོད་ཆགས་ཞེ་སྡང་གཏི་མུག་འབྱུང་བ་སྤོང་། །​གང་གིས་སེམས་ཅན་ངན་སོང་གསུམ་མཆི་དང་། །​གང་གིས་བདེ་འགྲོར་མཆི་བར་འགྱུར་བའི་ལས། །​འགྲོ་བས་ལེགས་པར་བགྱིས་དང་ནོངས་བགྱིས་མཁྱེན། །​འགྲོ་ལ་ཕན་མཛད་གང་དག་འདས་རྣམས་དང་། །​ད་ལྟར་ལྷ་དང་མི་ཡིས་མཆོད་རྣམས་དང་། །​གང་དག་མ་བྱོན་ཡོན་ཏན་མཆོག་མཐར་ཕྱིན། །​བདེ་གཤེགས་དེ་དག་ཐམས་ཅད་རབ་ཏུ་མཁྱེན། །​དག་པའི་ཞིང་དང་ཕུན་སུམ་ཚོགས་འཁོར་དང་། །​བྱང་ཆུབ་སེམས་དཔའི་ཚོགས་དང་ཉན་ཐོས་དང་། །​དྲང་སྲོང་ཆེན་པོ་རྣམས་ཀྱི་སྐུ་ཚེའི་ཚད། །​རྣམ་པ་ཀུན་ཏུ་མ་ལུས་རྣམ་པར་མཁྱེན། །​མྱ་ངན་འདས་ནས་ཆོས་གནས་ཅི་འདྲ་དང་། །​རྒྱལ་བའི་རིང་བསྲེལ་མཆོད་པ་ཅི་འདྲ་དང་། །​དེར་ནི་ཆོས་མཛོད་འཛིན་པ་ཅི་འདྲ་བ། །​དེ་དག་མ་ལུས་མི་ཡི་དམ་པས་མཁྱེན། །​དུས་གསུམ་རྣམས་སུ་རྟག་པར་སྟོབས་བཅུ་ཡི། །​ཡེ་ཤེས་མཁྱེན་པ་སྒྲིབ་པ་མི་མངའ་འཇུག །​ཆོས་རྣམས་ཀུན་ལ་ཐུགས་ནི་ཆགས་མི་མངའ། །​ཕྱག་འཚལ་རྒྱལ་བ་ཡེ་ཤེས་མཚོ་ཁྱོད་ལ། །​ཁྱོད་དང་མཚུངས་མཉམ་མ་མཆིས་ག་ལ་ལྷག །​སྐར་མ་རྣམས་ཀྱིས་ནམ་མཁར་སྤྲས་པ་ལྟར། །​མཚན་རྣམས་ཀྱིས་ཀྱང་སྐུ་ནི་རབ་སྤྲས་པ། །​མི་མཆོག་ཐུབ་པ་མཆོག་ལ་ཕྱག་འཚལ་ལོ། །​གཟུགས་ཀྱང་མཚུངས་པ་མ་མཆིས་ཡིད་དུ་མཆི། །​ལྷར་བཅས་འགྲོ་བ་ཟིལ་དུ་རླག་པར་བགྱིད། །​ཚངས་པ་བརྒྱ་བྱིན་འོག་མིན་ལྷ་ཡི་རྣམས། །​ཁྱོད་ཀྱི་སྤྱན་སྔ་དེ་དག་མཛེས་མ་ལགས། །​ཁྱོད་ནི་གསེར་གྱི་རི་ལྟར་དྲི་མི་མངའ། །​དབུ་སྣུམ་འཇམ་ཞིང་གཡས་སུ་འཁྱིལ་པར་གནས། །​ལྷུན་པོའི་རྒྱལ་པོ་ལྟ་བུར་སྤྱི་གཙུག་འཕགས། །​བསོད་ནམས་རྒྱ་ཆེན་བྱུང་བ་ལམ་མེར་བཞུགས། །​འོད་ཟེར་བྱེ་བ་ཁྲག་ཁྲིག་རབ་འགྱེད་ཅིང་། །​ཁྱོད་ཀྱི་སྨིན་མའི་མཚམས་ཀྱི་མཛོད་སྤུ་མཛེས།