།ཡུལ་འཁོར་སྐྱོང་དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བར་གྱུར་པ་དེ་གཞན་ཞིག་ཡིན་སྙམ་དུ་ཁྱོད་དེ་ལྟར་དོགས་ཤིང་ཐེ་ཚོམ་ཟ་འམ་ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་འོད་དཔག་མེད་དེ་དེའི་ཚེ་དེའི་དུས་ན་རྒྱལ་པོ་འོད་ཟེར་ལྡན་ཞེས་བྱ་བར་གྱུར་ཏོ། །ཡུལ་འཁོར་སྐྱོང་དེའི་ཚེ་དེའི་དུས་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཞེས་བྱ་བར་གྱུར་པ་དེ་གཞན་ཞིག་ཡིན་པ་སྙམ་དུ་ཁྱོད་དེ་ལྟར་དོགས་ཤིང་ཐེ་ཚོམ་ཟ་འམ་ཡིད་གཉིས་སུ་གྱུར་ན་ཁྱོད་ཀྱིས་དེ་ལྟར་མི་བལྟའོ། །དེ་ཅིའི་ཕྱིར་ཞེ་ན། ང་ཉིད་དེའི་ཚེ་དེའི་དུས་ན་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་ཞེས་བྱ་བར་གྱུར་ཏོ། །གྲོང་ཁྱེར་གྱི་ལྷ་གང་ཡིན་པ་དེ་ནི་དེ་བཞིན་གཤེགས་པ་མི་འཁྲུག་པར་གྱུར་ཏོ། །ཡུལ་འཁོར་སྐྱོང་དེ་ལྟ་བས་ན་བྱང་ཆུབ་སེམས་དཔའ་སེམས་དཔའ་ཆེན་པོ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་མངོན་པར་རྫོགས་པར་འཚང་རྒྱ་བར་འདོད་པ་ལྷག་པའི་བསམ་པས་བསྒྲུབ་པ་དང་སྡུག་པ་དང་མི་སྡུག་པ་ཡོངས་སུ་སྤངས་པ་དང་། བག་ཡོད་པའི་སྤྱོད་པས་རྒྱལ་བུ་གཞོན་ནུ་བསོད་ནམས་ཀྱི་འོད་ཟེར་དེའི་རྗེས་སུ་བསླབ་པར་བྱའོ། །ངས་བྱ་དཀའ་བ་མངོན་པར་འདུ་བྱ་བ་དེ་ལྟ་བུས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་བོ། །དེ་ལྟ་བས་ན་དེ་དག་མི་བརྩོན་པ་དང་རྙེད་པ་དང་བཀུར་སྟི་དང་ཚིགས་སུ་བཅད་པ་ལྷུར་ལེན་པ་དང་། ཤེས་ཀྱི་ཁེ་ལ་ཆགས་པ་དང་ང་རྒྱལ་གྱིས་བཅོམ་པ་དང་འདོད་པའི་རྒྱུས་ཉོན་མོངས་ཤིང་ཤ་ཐང་བ་དང་འདོད་པའི་རྒྱུས་བསྟན་པ་ལས་རིང་དུ་གྱུར་པ་དང་རབ་ཏུ་བྱུང་བ་དོན་མེད་པ་དང་། དགེ་སྦྱོང་སུན་པར་བྱེད་པ་དང་། བྱང་ཆུབ་སེམས་དཔའ་རྨུ་རྒོད་དང་ལུས་དང་ངག་དང་སེམས་མི་དྲང་བ་དང་ལྟས་ལྟ་བ་དང་ཁས་འཆེ་བ་ནོར་བ་དང་རང་གི་དམ་བཅས་པ་ལས་ཉམས་པ་དང་གོས་དང་ཟས་དང་མལ་ཆ་དང་ན་བའི་ཆེད་ཀྱི་སྨན་དང་ཡོ་བྱད་ཀྱི་མཚན་མ་ལ་ཆགས་པ་དང་། ངོ་ཚ་མི་ཤེས་པ་དང་ཁྲེལ་མེད་པ་དང་ཆོ་ག་ཉམས་པ་དང་དམ་པའི་ཆོས་མ་ཡིན་པ་ལ་འཇུག་པ་དང་སྤྱོད་ཡུལ་དང་བྲལ་བ་དང་སངས་རྒྱས་ཀྱི་སྤྱོད་ཡུལ་ལས་རིང་དུ་གྱུར་པ་དང་། སངས་རྒྱས་ཀྱི་ཐེག་པ་དང་བྲལ་བ་དང་རྫོགས་པའི་བྱང་ཆུབ་ཀྱི་སེམས་དང་བྲལ་བར་གྱུར་ཏོ། །ཡུལ་འཁོར་སྐྱོང་དེ་ལྟ་བས་ན་རྣམ་པ་འདི་ལྟ་བུའི་ཆོས་འདི་ཐོས་ནས་སྡིག་པའི་བཤེས་གཉེན་རིགས་པ་མེད་པ་རྙེད་པ་དོན་དུ་གཉེར་བ་དང་མི་བསྟེན་པར་ཤེས་པར་བྱའོ། །དེ་ནས་བཅོམ་ལྡན་འདས་ཀྱི་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ།