བདག་ནི་ད་ལྟར་འདོད་པའི་ཡོན་ཏན་མོས་མ་ལགས། །ཉོན་མོངས་གང་དག་ངན་འགྲོའི་གཡང་སར་ལྟུང་བྱེད་པ། །སྡུག་པ་ཐམས་ཅད་དགྲ་དང་མཚུངས་ཏེ་རྗེས་མི་སྲུང་། །མི་མཁས་བྱིས་པ་སྐྱེ་བོ་དེ་དག་བུད་མེད་དགའ། །བདུད་ཀྱི་ཞགས་པ་ཡོན་ཏན་འཆིང་བ་གཡང་ས་ཆེ། །རྟག་ཏུ་འཕགས་པའི་སྐྱེ་བོས་དེ་དག་དེ་ལྟར་སྨད། །སེམས་དམྱལ་ངན་འགྲོ་མྱ་ངན་རྩ་བ་ཅི་ཕྱིར་བསྟེན། །བུད་མེད་འདི་དག་ལྤགས་པའི་གཟུགས་ཀྱིས་དགའ་བ་ཙམ། །བདག་ནི་རུས་རྒྱུས་འཁྲུལ་འཁོར་མི་གཙང་དོན་མི་གཉེར། །ཁྲག་དང་གཅིན་དང་མི་གཙང་བ་དང་དྲི་མ་འཛག །གསལ་བ་དུར་ཁྲོད་འདྲ་ལ་ཇི་ལྟར་དགའ་བར་བགྱི། །གླུ་དང་གར་དང་རོལ་མོའི་དབྱངས་སྒྲ་གཟུང་མི་བགྱི། །དགའ་བ་རྨི་ལམ་འདྲ་བ་མི་མཁས་རྨོངས་པར་བགྱིད། །ཀུན་ཏུ་རྟོག་པ་སྲེད་གྱུར་མི་མཁས་འདིར་བརླག་གིས། །ཅི་ཕྱིར་བྱིས་པའི་སྐྱེ་བོ་ལྟ་བུར་ཉོན་མོངས་འཁོལ། །ཤིང་ལྕུག་འདི་དག་ཐམས་ཅད་དགུན་གྱི་དུས་བྱུང་ན། །དགོན་དུང་ཤིང་ལྟར་འགྱུར་ཏེ་དགའ་བར་འགྱུར་མ་ལགས། །མི་རྟག་འདི་ཡིས་དཔལ་རྣམས་ཐམས་ཅད་བཤིག་གྱུར་ཏེ། །སྲོག་གཡོར་གྱུར་ཀྱང་གཏི་མུག་གིས་ནི་བག་མེད་གྱུར། །སེམས་ནི་རྒྱ་མཚོ་ལྟ་བུར་ཚིམ་པར་བྱེད་མི་ནུས། །སྲིད་པ་རབ་ཏུ་འཕེལ་ལ་དགའ་བས་ཕྱིར་ཞིང་འདོད། །འདོད་རྒྱུས་ཕན་ཚུན་གསོད་པའི་འགྲོ་ལ་བལྟས་ནས་སུ། །འདི་ན་ཇི་ལྟར་ལྷུན་པོ་རླུང་གིས་མི་བསྐྱོད་བཞིན། །རྒྱལ་པོ་ཁྱོད་དང་ཕ་དང་ལྷན་ཅིག་སྐྱེས་པ་དང་། །གཉེན་གྱི་སྐྱེ་བོ་ཆུང་མ་ངན་སོང་བདག་སྐྱབས་མིན། །བདག་ཅག་ཐམས་ཅད་རྩྭ་རྩེའི་ཟིལ་པ་འདྲ་བ་སྟེ། །སེམས་ཀྱི་དབང་དུ་འགྲོ་བར་མ་གྱུར་བག་ཡོད་མཛོད། །མི་དབང་དར་ལ་བབ་པ་མི་རྟག་ཅིར་མི་རུང་། །སྲོག་ཀྱང་རི་ཡི་ཆུ་ལྟར་མྱུར་འགྲོ་ཅིར་མི་རུང་། །འདུས་བྱས་འདི་ཟད་གློག་སྤྲིན་འདྲ་སྟེ་ཅིར་མི་རུང་། །རྒྱལ་པོ་མཁས་ལ་སྲིད་གསུམ་འདོད་ལ་ཆགས་པ་ངན། །ལྷ་རྣམས་ཀྱིས་ནི་བདག་ལ་བག་ཡོད་འགྱུར་གྱིས་ཤིག །བྱང་ཆུབ་སེམས་དཔའ་ཡུལ་ལ་ཆགས་པ་མིན་ཞེས་བསྐུལ། །འཇིག་རྟེན་ཕན་པ་སྙིང་བརྩེ་སངས་རྒྱས་འདིར་འགྱུར་བགྱི། །རྒྱལ་པོ་བག་མེད་སྤྱོད་ལ་བྱང་ཆུབ་ཡོད་མ་ལགས།