Degé Kangyur volume 42, F.234.b

ཁོང་ཁྲོ་བ་མེད་པའི་སེམས་བྱང་ཆུབ་སེམས་དཔའི་སྤྱོད་པ་དང་། ཚུལ་འཆོས་པ་དང་། ཁ་གསག་དང་། ཐོབ་ཀྱིས་འཇལ་བ་ཡོངས་སུ་སྤངས་ཏེ་དགོན་པར་གནས་པ་དང་། བདོག་པ་ཐམས་ཅད་ཡོངས་སུ་གཏོང་ཞིང་རྣམ་པར་སྨིན་པ་ལ་རེ་བ་མེད་པ་དང་། ཉིན་མཚན་དུ་ཆོས་འདོད་ཅིང་ཆོས་སྨྲ་བ་རྣམས་ལ་འཁྲུལ་པ་མི་ཚོལ་བ་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་བྱང་ཆུབ་སེམས་དཔའི་སྤྱོད་པ་ཡོངས་སུ་སྦྱོང་བའི་ཆོས་སོ། །​དེ་ནས་བཅོམ་ལྡན་འདས་ཀྱིས་དེའི་ཚེ་ཚིགས་སུ་བཅད་པ་འདི་དག་བཀའ་སྩལ་ཏོ། །​བླ་ན་མེད་པའི་བྱང་ཆུབ་འདོད་པ་ན། །​ཐ་བ་དྲི་མ་མེད་ཅིང་ཁྲོ་སེམས་མེད། །​དེ་ནི་སུ་ལའང་སྐྱོན་ཚོལ་བྱེད་མ་ཡིན། །​གཡོ་མེད་ཚུལ་འཆོས་མེད་ཅིང་སྤྲོས་སེམས་མེད། །​ཁྱིམ་གྱི་བློ་གྲོས་ཡ་ང་མྱ་ངན་རྩ། །​སྐྱེ་བོ་ངན་འགྲོགས་ཚུལ་བཞིན་རིང་འགྱུར་བ། །​སྤངས་ཏེ་དེ་ལ་མི་ལྟ་རབ་བྱུང་ནས། །​ཐར་པ་འདོད་པ་རི་ཁྲོད་གནས་པར་བྱེད། །​དགོན་པ་བས་མཐའི་རྣམས་པ་བསྟན་པས་ན། །​ཤེས་ཁེ་འཐོབ་པ་ཀུན་ལ་མི་རྟོན་ཞིང་། །​ལུས་དང་སྲོག་ལའང་ལྟ་བར་མི་བྱེད་ལ། །​སེང་གེ་ལྟ་བུར་གནས་ཤིང་དགྲ་ལས་རྒྱལ། །​བྱང་ཆུབ་ལམ་ཕྱིར་ཡེ་ཤེས་ཚོལ་བ་ན། །​ངན་ངོན་ཙམ་གྱིས་ཆོག་པར་འཛིན་བྱེད་ཅིང་། །​རྟག་ཏུ་བྱ་ལྟར་སོགས་པ་སྤངས་ནས་ནི། །​འཇིག་རྟེན་ཀུན་ལ་གནས་པ་མ་ཡིན་ནོ། །​དཔེར་ན་བསེ་ལྟར་གཅིག་བུ་གནས་བྱེད་ཅིང་། །​སེང་གེ་ལྟ་བུར་འཇིགས་པ་ཡོད་མ་ཡིན། །​རི་དགས་ལྟ་བུར་སར་འཇིགས་ཡིད་མི་རྟོན། །​དེ་ནི་མཆོད་པས་ཁེངས་པར་འགྱུར་བ་མེད། །​གཡང་སར་ལྟུང་བའི་འགྲོ་བ་འདི་བལྟས་ནས། །​རབ་ཏུ་ཐར་བར་བྱ་ཕྱིར་འབད་པར་བྱེད། །​གལ་ཏེ་བག་ཡོད་དགེ་བའི་ཆོས་སྤྱོད་ན། །​བདག་ཀྱང་འགྲོ་བ་འདི་ཡི་དཔུང་གཉེན་འགྱུར། །​མི་མཆོག་སྤྱོད་པ་འདི་དག་འདོད་པ་ན། །​འཛུམ་པའི་བཞིན་གྱིས་རབ་བསྟན་ཚིག་སྨྲ་ཞིང་། །​སྡུག་དང་མི་སྡུག་རྟག་ཏུ་རྙོག་སེམས་མེད། །​རླུང་དང་འདྲ་བར་ཆགས་པ་མེད་པར་གནས། །​སྟོང་པ་ཉིད་དང་མཚན་མ་མེད་ལ་མོས། །​འདུས་བྱས་ཀུན་ལ་སྒྱུ་མ་ལྟ་བུར་རྟོག །​ཡངས་པའི་བློ་ཅན་ཞི་དང་དུལ་ལ་དགའ། །​དེ་ནི་རྟག་ཏུ་བདུད་རྩིའི་རོ་ཡིས་མགུ།