ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པ་སྟེ། བཞི་གང་ཞེ་ན། གཟུངས་ཐོབ་པ་དང་། དགེ་བའི་བཤེས་གཉེན་རྙེད་པ་དང་། །ཆོས་ཟབ་མོ་ལ་བཟོད་པ་ཐོབ་པ་དང་། ཚུལ་ཁྲིམས་ཡོངས་སུ་དག་པ་ཡང་དག་པར་སྤྱོད་པ་སྟེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་རྣམས་ཀྱི་དབུགས་འབྱིན་པ་འཐོབ་པའོ། །འདི་ལ་འདི་ནི་ཆོས་ཉིད་ཡིན་ཏེ། དེ་ལ་འདི་སྐད་ཅེས་བྱའོ། །གང་གིས་སངས་རྒྱས་ཀུན་གྱིས་གསུངས་པའི་ཆོས་མཆོག་འཛིན་འགྱུར་བ། །གཟུངས་རྣམས་གྲགས་པ་ཆེན་པོ་དེ་དག་གིས་ནི་རྟག་ཏུ་ཐོབ། །ནམ་ཡང་ཆུད་ཟར་མི་འགྱུར་ཕྱིར་ཞིང་བློ་གྲོས་རབ་ཏུ་འཕེལ། །དེ་དག་ཡེ་ཤེས་ཆགས་པ་མེད་ཅིང་ཆོས་ཀུན་ཕ་རོལ་ཕྱིན། །བྱང་ཆུབ་ཡན་ལག་འཕེལ་བར་བྱེད་པའི་དགེ་བའི་བཤེས་གཉེན་རྙེད། །དེ་དག་འདྲེན་པ་རྣམས་ནི་གང་ནས་བཞུད་པའི་ལམ་མཆོག་སྟོན། །དེ་དག་སྡིག་པའི་གྲོགས་པོ་དག་ལ་སྟེན་པ་མ་ཡིན་ཏེ། །ཚིག་བྱེད་བདག་ཉིད་མེ་ལྟར་དེ་དག་རིང་དུ་རྣམ་པར་སྤོང་། །དཔའ་བོ་སྟོང་པ་ཉིད་དང་ལྡན་པའི་ཟབ་མོའི་ཆོས་ཐོས་ནས། །དེ་དག་བདག་དང་སེམས་ཅན་སྲོག་ཏུ་ལྟ་བ་ཀུན་མི་འབྱུང་། །དེ་དག་ཚུལ་ཁྲིམས་སྐྱོན་མེད་དུལ་ཞིང་ཞི་བའི་ཡིད་དང་ལྡན། །སངས་རྒྱས་ཚུལ་ཁྲིམས་བླ་ན་མེད་ལ་སེམས་ཅན་རྣམས་ཀྱང་སྦྱོར། །ཡུལ་འཁོར་སྐྱོང་བཞི་པོ་འདི་དག་ནི་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། བཞི་གང་ཞེ་ན། ཡུལ་འཁོར་སྐྱོང་སངས་རྒྱས་མཐོང་བ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་རྗེས་སུ་འཐུན་པའི་ཆོས་ཐོས་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་བདོག་པ་ཐམས་ཅད་ཡོངས་སུ་གཏོང་བ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་དང་། ཡུལ་འཁོར་སྐྱོང་དམིགས་སུ་མེད་པའི་ཆོས་ལ་བཟོད་པ་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་ཏེ། ཡུལ་འཁོར་སྐྱོང་བཞི་པོ་དེ་དག་ནི་བྱང་ཆུབ་སེམས་དཔའ་འཁོར་བ་ན་འཁོད་པ་རྣམས་དགའ་བར་བྱེད་པའི་ཆོས་སོ།