།ལ་ལས་འདོམ་དོ་ཙམ་དུ་མཐོང་། །ལ་ལས་རྒྱང་གྲགས་དཔག་ཚད་དང་། ལ་ལས་སྟོང་གསུམ་ཐམས་ཅད་དུ། །འོད་ཀྱིས་ཁྱབ་པར་གྱུར་པ་མཐོང་། །ས་བརྒྱད་པ་དང་དགུ་པ་དང་། །བཅུ་པ་ལ་ནི་གང་གནས་པ། །བྱང་ཆུབ་སེམས་དཔའ་ཤེས་རབ་ཆེ། །ས་ཆེན་ལ་ནི་གང་གནས་པ། །དེ་དག་སངས་རྒྱས་རྣམས་ཀྱི་འོད། །མཐའ་ཡས་དཀྱིལ་འཁོར་འཇུག་བྱེད་ཅིང་། །བསམ་ཡས་སངས་རྒྱས་ཞིང་རྣམས་སུ། །སངས་རྒྱས་དག་གི་བྱ་བ་བྱེད། །དེ་ལྟར་སངས་རྒྱས་བསམ་ཡས་ཏེ། །སངས་རྒྱས་འོད་ཟེར་བསམ་མི་ཁྱབ། །བསམ་མི་ཁྱབ་ལ་དད་བྱས་ན། །བསོད་ནམས་ཕུང་པོ་བསམ་མི་ཁྱབ། །ཡང་ཤཱ་རིའི་བུ་ཇི་ལྟར་ན་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཚུལ་ཁྲིམས་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག །ཐེ་ཚོམ་མི་ཟ། རྒྱ་ཆེར་དགའ་མགུ་སྟེ། རང་ས་པ་རྙེད་ནས་ངོ་མཚར་དང་། རྨད་དུ་འདུ་ཤེས་སྐྱེད་པ་དང་། དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་ཏིང་ངེ་འཛིན་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག་པ་ནས་ངོ་མཚར་དང་རྨད་ཀྱི་བར་དུ་འདུ་ཤེས་སྐྱེད་ཅེ་ན། ཤཱ་རིའི་བུ་འདི་ལྟར་ཡང་དག་པར་སྨྲ་བས་སྨྲ་བ་ཚུལ་ཁྲིམས་ཡོངས་སུ་དག་པའི་སེམས་ཅན་འཇིག་རྟེན་དུ་བྱུང་སྟེ། ལུས་ཀྱི་ལས་ཡོངས་སུ་དག་པ་དང་ལྡན་པ། ངག་གི་ལས་ཡོངས་སུ་དག་པ་དང་ལྡན་པ། ཡིད་ཀྱི་ལས་ཡོངས་སུ་དག་པ་དང་ལྡན་པ་འཇིག་རྟེན་དུ་བྱུང་ཞིང་སྐྱེས་ནས་འཇིག་རྟེན་གྱི་ཆོས་ཀྱིས་མ་གོས་པ། བྲམ་ཟེ་སྡིག་པ་སྤངས་པ། དགེ་སྦྱོང་ཞི་བ། བསམ་གཏན་པའི་མཆོག །ཏིང་ངེ་འཛིན་དམ་པའི་ཕ་རོལ་ཏུ་སོན་པའི་སེམས་ཅན་འཇིག་རྟེན་དུ་བྱུང་བ་དེ་ནི་དེ་བཞིན་གཤེགས་པ་ཡིན་པར་ཡང་དག་པར་སྨྲ་བས་སྨྲའོ། དེ་ཅིའི་ཕྱིར་ཞེ་ན། ཤཱ་རིའི་བུ་ལྷར་བཅས་པའི་འཇིག་རྟེན་དང་། ཚངས་པར་བཅས་པ་དང་། བདུད་དང་བཅས་པ་དང་། དགེ་སྦྱོང་དུ་བཅས་པ་དང་། བྲམ་ཟེར་བཅས་པའི་སྐྱེ་དགུ་དང་། ལྷ་དང་། མི་དང་། ལྷ་མ་ཡིན་དུ་བཅས་པའི་འཇིག་རྟེན་ན་ཇི་ལྟར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལྟར་ཚུལ་ཁྲིམས་དང་། ཏིང་ངེ་འཛིན་གྱི་ཕུང་པོ་ཡོངས་སུ་དག་པ། ཚད་མེད་པ་དེ་ལྟ་བུ་ངས་མ་མཐོང་ངོ་།