བྱང་ཆུབ་སེམས་དཔའ་དེ་བཞིན་གཤེགས་པ་རྣམས་ཀྱི་དེ་བཞིན་གཤེགས་པའི་དབྱངས་བསམ་གྱིས་མི་ཁྱབ་པ་ལ་མངོན་པར་དད། ཡིད་ཆེས། རབ་ཏུ་རྟོག་པ་ནས་ངོ་མཚར་དང་རྨད་དུ་འདུ་ཤེས་ཀྱི་བར་དུ་འདུ་ཤེས་སྐྱེད་ཅེ་ན། འདི་ལྟར་ཤཱ་རིའི་བུ་དེ་བཞིན་གཤེགས་པ་ནི་འདུལ་བའི་དབང་གི་ཕྱིར་འཁོར་ཇི་ལྟ་བ་དེ་བཞིན་དུ་སྒྲ་འབྱུང་སྟེ། སེམས་ཅན་ཐམས་ཅད་རབ་ཏུ་དགའ་བར་བྱ་བའི་ཕྱིར་ཕྱོགས་བཅུའི་འཇིག་རྟེན་གྱི་ཁམས་ཐམས་ཅད་དུ་ཁྱབ་པར་བྱེད་མོད་ཀྱི། ཤཱ་རིའི་བུ་དེ་བཞིན་གཤེགས་པ་འདི་སྙམ་དུ་ངས་དགེ་སློང་གི་འཁོར་ལོ་ནི་འདི་བཤད། དགེ་སློང་མའི་འཁོར་ལོ་ནི་འདི། དགེ་བསྙེན་གྱི་འཁོར་ལོ་ནི་འདི། དགེ་བསྙེན་མའི་འཁོར་ལོ་ནི་འདི། བྲམ་ཟེའི་འཁོར་ལོ་ནི་འདི། རྒྱལ་རིགས་ཀྱི་འཁོར་ལོ་ནི་འདི། ཁྱིམ་བདག་གི་འཁོར་ལོ་ནི་འདི། ལྷའི་འཁོར་ལོ་ནི་འདི། ཚངས་པའི་འཁོར་ལོ་ནི་འདི་སྟེ། འདི་ལྟ་སྟེ། མདོའི་སྡེ་དང་། དབྱངས་ཀྱིས་བསྙད་པའི་སྡེ་དང་། ལུང་དུ་བསྟན་པའི་སྡེ་དང་། ཚིགས་སུ་བཅད་པའི་སྡེ་དང་། ཆེད་དུ་བརྗོད་པའི་སྡེ་དང་། གླེང་གཞིའི་སྡེ་དང་། རྟོགས་པ་བརྗོད་པའི་སྡེ་དང་། དེ་ལྟ་བུ་བྱུང་བའི་སྡེ་དང་། སྐྱེས་པའི་རབས་ཀྱི་སྡེ་དང་། ཤིན་ཏུ་རྒྱས་པའི་སྡེ་དང་། རྨད་དུ་བྱུང་བའི་ཆོས་ཀྱི་སྡེ་དང་། གཏན་ལ་དབབ་པར་བསྟན་པའི་སྡེ་རྣམས་བཤད་པར་བྱའོ་སྙམ་དུ་མི་དགོངས་མོད་ཀྱི། འོན་ཀྱང་ཤཱ་རིའི་བུ་འཁོར་ཇི་ལྟ་བུ་འདུས་པར་གྱུར་པ། ཚངས་པའི་འཁོར་གྱི་བར་དུ་འདུས་པར་གྱུར་པ། དེ་དག་གི་དབང་པོའི་རིམ་པ་ཅི་འདྲ་བ་དང་། སེམས་ཅན་དེ་དག་ལ་ཆོས་ཀྱི་མདོ་ཇི་ལྟ་བུ་ཐོས་པར་བྱ་དགོས་པར་འགྱུར་བ་དེ་ལྟ་བུའི་ཆོས་ཀྱི་མདོ་ཐོས་པར་བྱ་བ་དེ་བཞིན་གཤེགས་པའི་ཞལ་གྱི་སྒོ་ནས་འབྱུང་བར་ཡང་དག་པར་ཤེས་ཀྱང་ཆོས་བསྟན་པ་དེ་གཅིག་ལ་གཅིག་ངེས་པའི་ཚིག་གནོད་པར་གྱུར་པ་ཡང་མེད་དེ། ཐམས་ཅད་ཀྱང་རང་རང་གི་ཆོས་རྣམ་པར་རིག་པར་ཀུན་ཤེས་སོ། །དེ་བཞིན་གཤེགས་པའི་དབྱངས་ནི་དེ་བཞིན་གཤེགས་པའི་སྔོན་གྱི་བསོད་ནམས་ཀྱི་འབྲས་བུ་རྣམ་པར་སྨིན་པ་ལས་མངོན་པར་གྲུབ་པ་བདེན་པའི་རྗེས་སུ་འབྲང་བས་འཇུག་གོ །ཡང་ཤཱ་རིའི་བུ་དེ་བཞིན་གཤེགས་པའི་དབྱངས་དེ་ནི་འཇམ་པར་འབྱུང་། ཡིད་དུ་འོང་བ་དང་། ཡིད་དགའ་བ་དང་། དག་པ་དང་། དྲི་མ་མེད་པ་དང་། སྙན་པ་དང་། མཉན་པར་འོས་པ་དང་། ཤེས་པར་བྱ་བར་འོས་པ་དང་།