།ཀུན་དགའ་བོ་དེ་ལ་ཚོང་དཔོན་གྱི་བུ་མིས་བྱིན་གྱི་ཆུང་མ་བདུན་དང་། བུ་མོ་བདུན་དང་། བྲན་མོ་བདུན་གང་ཡིན་པ་དག་ནི་འདི་ནས་ཤི་འཕོས་ནས་བུད་མེད་ཀྱི་ལུས་ལས་བསྒྱུར་ཏེ། སྐྱེས་པའི་ལུས་ཐོབ་ནས་བྱང་ཆུབ་སེམས་དཔའ་མིས་བྱིན་དང་ལྷན་ཅིག་ཏུ་བྱང་ཆུབ་སེམས་དཔའི་སྤྱད་པ་སྤྱོད་པར་འགྱུར་རོ། །དེ་དག་བསྐལ་པ་གཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། ཀུན་དགའ་བོ་བྱང་ཆུབ་སེམས་དཔའ་སེམས་དཔའ་ཆེན་པོ་མིས་བྱིན་ནི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སེམས་སྙོམས་ཞེས་བྱ་བར་འགྱུར་རོ། །བྱང་ཆུབ་སེམས་དཔའ་མིས་བྱིན་གྱི་ཞབས་འབྲིང་བ་གང་ཡིན་པ་ཐམས་ཅད་ནི་དེ་བཞིན་གཤེགས་པ་མིང་ཐ་དད་པར་འགྱུར་རོ། །རོལ་མོ་མཁན་ལྔ་བརྒྱ་པོ་གང་ཡིན་པ་དེ་དག་ནི་བསྐལ་པ་གྲངས་མེད་པར་ལོག་པར་ལྟུང་བར་མི་འགྲོ་སྟེ། འཁོར་ལོས་སྒྱུར་པའི་རྒྱལ་པོ་བྱེ་བ་ཕྲག་སྟོང་བྱེད་པར་བགྲང་བས་སྨྲ་སྟེ། བར་སྐབས་དེར་སངས་རྒྱས་སྟོང་ཕྲག་བཅུ་མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རི་མོར་བྱེད་པར་འགྱུར། མཆོད་པ་བྱེད་པར་འགྱུར་རོ། ཐམས་ཅད་ཀྱང་བསྐལ་པ་གཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབྱངས་འཇམ་ཞེས་བྱ་བར་ཐམས་ཅད་མིང་འཐུན་པར་འགྱུར་རོ། །སྲོག་ཆགས་ཁྲི་བོ་དེ་དག་ལས་སྲོག་ཆགས་བཞི་བརྒྱ་ནི་དེ་བཞིན་གཤེགས་པ་བྱམས་པ་མཉེས་པར་བྱས་ནས་དེའི་ཚེ་ཡོངས་སུ་མྱ་ངན་ལས་འདའ་བར་འགྱུར་རོ། །ལྷག་མ་རྣམས་ནི་བསྐལ་པ་གང་གཱའི་ཀླུང་གི་བྱེ་མ་སྙེད་དུ་ལོག་པར་ལྟུང་བར་མི་འགྲོ་སྟེ། ཚུལ་འདིས་སངས་རྒྱས་བྱེ་བ་ཕྲག་སྟོང་མཉེས་པར་བྱས་ནས་བསྟི་སྟང་དུ་བྱེད་པར་འགྱུར། བླ་མར་བྱེད་པར་འགྱུར། རི་མོར་བྱེད་པར་འགྱུར། མཆོད་པ་བྱེད་པར་འགྱུར་རོ། །ཐམས་ཅད་ཀྱང་བསྐལ་པ་གཅིག་ལ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་འཚང་རྒྱ་བར་འགྱུར་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ངོ་མཚར་ཞེས་བྱ་བར་ཐམས་ཅད་ཀྱང་མིང་འཐུན་པར་འགྱུར་རོ།