རྟོན་པ་ལ་མཁས་པ་དང་། རྣམ་པར་ཤེས་པ་དང་། ཡེ་ཤེས་ལ་མཁས་པ་དང་། བྱང་ཆུབ་ཀྱི་ཡན་ལག་ལ་མཁས་པ་དང་། ལམ་ལ་མཁས་པ་དང་། རྟེན་ཅིང་འབྲེལ་པར་འབྱུང་བ་ལ་མཁས་པ་དང་བཅུ་སྟེ། མཁས་པ་རྣམ་པ་བཅུ་པོ་འདི་དག་གི་རྣམ་པར་འབྱེད་པ་གང་ཡིན་པ་དེ་ནི་ཤེས་རབ་རྣམ་པར་འབྱེད་པ་ཞེས་བྱའོ། །དེ་ལ་ཕུང་པོ་ལ་མཁས་པ་གང་ཞེ་ན། གང་འདི་ཕུང་པོ་རྣམས་ཀྱི་དཔེར་བྱ་བ་བསྟན་པ་འདི་ལྟ་སྟེ། དབུ་བ་རྡོས་པ་ལྟ་བུར་བསྟན་པ་དང་། སྨིག་རྒྱུ་ལྟ་བུར་བསྟན་པ་དང་། ཆུ་བུར་ལྟ་བུར་བསྟན་པ་དང་། ཆུ་ཤིང་ལྟ་བུར་བསྟན་པ་དང་། སྒྱུ་མ་ལྟ་བུར་བསྟན་པ་དང་། རྨི་ལམ་ལྟ་བུར་བསྟན་པ་དང་། བྲག་ཅ་ལྟ་བུར་བསྟན་པ་དང་། མིག་ཡོར་ལྟ་བུར་བསྟན་པ་དང་། གཟུགས་བརྙན་ལྟ་བུར་བསྟན་པའོ། །གཟུགས་ནི་ཆུའི་དབུ་བ་ལྟ་བུ་སྟེ། དབུ་བ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། སྐྱེས་བུ་མེད། ཤེད་བུ་མེད། ཤེད་ལས་སྐྱེས་མེད་དེ། དབུ་བའི་རང་བཞིན་གང་ཡིན་པ་གཟུགས་ཀྱང་དེའི་རང་བཞིན་ཡིན་ཏེ། གང་དེ་ལ་མཁས་པ་དེ་ནི་ཕུང་པོ་ལ་མཁས་པ་ཞེས་བྱའོ། །ཚོར་བ་ནི་ཆུའི་ཆུ་བུར་ལྟ་བུ་སྟེ། ཆུ་བུར་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། ཤེད་བུ་མེད། ཤེད་ལས་སྐྱེས་མེད། སྐྱེ་བ་པོ་མེད། སྐྱེས་བུ་མེད་དེ། ཆུ་བུར་གྱི་རང་བཞིན་གང་ཡིན་པ་ཚོར་བ་ཡང་དེའི་རང་བཞིན་ཡིན་ཏེ། གང་དེ་ལ་མཁས་པ་འདི་ནི་ཕུང་པོ་ལ་མཁས་པ་ཞེས་བྱའོ། །འདུ་ཤེས་ནི་སྨིག་རྒྱུ་ལྟ་བུ་སྟེ། སྨིག་རྒྱུ་ལ་ཡང་བདག་མེད། སེམས་ཅན་མེད་པ་ནས་སྐྱེས་བུའི་བར་དུ་མེད་དེ། སྨིག་རྒྱུའི་རང་བཞིན་གང་ཡིན་པ་འདུ་ཤེས་ཀྱང་དེའི་རང་བཞིན་ཡིན་ཏེ། གང་དེ་ལ་མཁས་པ་དེ་ནི་ཕུང་པོ་ལ་མཁས་པ་ཞེས་བྱའོ། །འདུ་བྱེད་རྣམས་ནི་ཆུ་ཤིང་ལྟ་བུ་སྟེ། ཆུ་ཤིང་ལ་ཡང་བདག་མེད། སེམས་ཅན་མེད། སྲོག་མེད་པ་ནས། སྐྱེས་བུའི་བར་དུ་མེད་པ་སྟེ། ཆུ་ཤིང་གི་རང་བཞིན་གང་ཡིན་པ་འདུ་བྱེད་དག་ཀྱང་དེའི་རང་བཞིན་ཡིན་ཏེ། གང་དེ་ལ་མཁས་པ་དེ་ནི་ཕུང་པོ་ལ་མཁས་པ་ཞེས་བྱའོ། །རྣམ་པར་ཤེས་པ་ནི་སྒྱུ་མ་ལྟ་བུ་སྟེ། སྒྱུ་མ་ལ་ཡང་བདག་མེད། སེམས་ཅན་མེད། སྲོག་མེད། གང་ཟག་མེད། ཤེད་བུ་མེད། ཤེད་ལས་སྐྱེས་མེད། སྐྱེས་བུ་མེད།