བཅོམ་ལྡན་འདས་ག་ལ་བ་དེར་དོང་སྟེ་ལྷགས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་ཕྱོགས་གཅིག་ཏུ་འཁོད་དོ། །ཕྱོགས་གཅིག་ཏུ་འཁོད་ནས་བཅོམ་ལྡན་འདས་ལ་ཁྱིམ་བདག་བཟང་སྐྱོང་དང་། ཁྱིམ་བདག་ལྔ་བརྒྱ་ཙམ་པོ་དེ་དག་གིས་འདི་སྐད་ཅེས་གསོལ་ཏོ། །བཅོམ་ལྡན་འདས་གཽ་ཏ་མ་དཔལ་གྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟི་བརྗིད་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་འོད་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་གཟུགས་ཀྱིས་འཁོར་འདི་ཟིལ་གྱིས་གནོན་པར་མཛད་དོ། །བཅོམ་ལྡན་འདས་གཽ་ཏ་མ་ནི་སྐུའི་ཁ་དོག་གསེར་ལྟ་བུའོ། །བཅོམ་ལྡན་འདས་གཽ་ཏ་མ་ནི་སྐུས་ལུས་ཅན་བདེ་བ་མྱོང་བར་མཛད་པའོ། །བཅོམ་ལྡན་འདས་གཽ་ཏ་མ་ནི་དངོས་པོ་ཐམས་ཅད་ཀྱིས་མི་མཉམ་པ་དང་མཉམ་པའོ། །བཅོམ་ལྡན་འདས་གཽ་ཏ་མ་ནི་འཇིག་རྟེན་ཐམས་ཅད་ཀྱི་ངོ་མཚར་རྨད་དུ་བྱུང་བའི་ཆོས་དང་ལྡན་པ་ལགས་ན། བཅོམ་ལྡན་འདས་གཽ་ཏ་མ་བདག་འདི་སྙམ་དུ་སེམས་ཏེ། བཅོམ་ལྡན་འདས་གཽ་ཏ་མས་ཅི་ཞིག་གཟིགས་ན་ཁབ་ནས་ཁབ་མ་མཆིས་པར་རབ་ཏུ་བྱུང་སྙམ་སེམས་སོ། །དེ་ནས་བཅོམ་ལྡན་འདས་ལ་ཁྱིམ་བདག་ཚོང་དཔོན་བཟང་སྐྱོང་གིས་ཚིགས་སུ་བཅད་པ་དག་གིས་མངོན་པར་བསྟོད་དོ། །རྒྱལ་བའི་དཔལ་དང་གྲགས་དང་གཟུགས་དག་ནི། །སྔན་ཆད་བདག་གིས་ཇི་སྐད་ཐོས་པ་བས། །དེ་བས་ལྷག་པར་གསེར་གྱི་གཟུགས་བཞིན་དུ། །མཛེས་དང་ལྡན་པར་ལྷམ་མེར་རབ་ཏུ་གདའ། །གཟུགས་ནི་ཤིན་ཏུ་མཛེས་ཤིང་བལྟ་ན་སྡུག །སྐུ་ཡི་ཁ་དོག་གསེར་གྱི་མདོག་འདྲ་བས། །སྐར་མང་དག་གི་དབུས་ན་ཟླ་བ་ལྟར། །དགེ་སློང་མང་པོའི་དབུས་ན་མཛེས་པར་མཛད། །མི་མཆོག་གི་ནི་སྤྱི་བོ་བལྟར་མི་གདའ། །རི་རབ་བཞིན་དུ་མངོན་པར་འཕགས་པར་གདའ། །གཙུག་གི་སྤྱི་བོ་ལྷ་ཡི་གདུགས་བཞིན་དུ། །ཀུན་ནས་བྱིན་གྱིས་གཞོལ་བར་གྱུར་པ་ལགས། །དབུ་ཡི་སྐྲ་ནི་འཇམ་ཞིང་རབ་མཉེན་ལ། །ཨན་ད་རྙིལ་དང་སྟང་ཟིལ་ཁ་དོག་འདྲ། །གཡས་སུ་འཁྱིལ་ལ་ཤིན་ཏུ་འཇམ་པ་སྟེ། །རྨ་བྱའི་མགྲིན་པ་ཇི་བཞིན་ཉིད་དུ་གདའ།