ནམ་མཁའ་འདྲ་དང་ནམ་མཁའི་བར་སྐབས་དང་། །ཡོན་ཏན་ཐམས་ཅད་གུས་པར་ལེན་པ་དང་། །བློ་གྲོས་དྲན་རྟོགས་བློ་འཕེལ་སྤོབས་མི་ཟད། །ངེས་ཚིག་བསྟན་པ་མཐའ་ཡས་མི་ཟད་དང་། །ལེགས་བྱས་བྱས་པ་ཆུད་མི་ཟ་བ་དང་། །ལྟ་བ་དང་ནི་འགྲོ་བ་ཚིམ་བྱེད་དང་། །བྱམས་པ་མངོན་འཕགས་སྙིང་རྗེ་ཡངས་པའི་རྩ། །དགའ་དང་མཆོག་ཏུ་དགའ་བ་འཇུག་པ་དང་། །བཏང་སྙོམས་དང་ནི་གཉིས་ལ་ཆགས་གྲོལ་དང་། །ཆོས་དོན་ཆོས་ཀྱི་འོད་ཟེར་ཏིང་འཛིན་དང་། །འཁྲུག་མེད་ཡེ་ཤེས་སྒྲོན་དང་ཡེ་ཤེས་མཚོ། །རྣམ་གྲོལ་སྙིང་པོ་འགྲོ་བ་ཚིམ་བྱེད་དང་། །རྡོ་རྗེ་རྒྱལ་མཚན་པད་མའི་དམ་པ་དང་། །ཆོས་ཀྱི་རྒྱལ་དང་མི་གཡོ་ཏིང་འཛིན་དང་། །ཤེས་རབ་རྩིབས་དང་ཞི་བ་སངས་རྒྱས་མཚོ། འོད་ཟེར་མཐའ་ཡས་རྣམ་གྲོལ་སྦྱིན་པ་དང་། །ཡེ་ཤེས་ཏིང་འཛིན་དེ་བཞིན་གཤེགས་ཀྱི་རྒྱན། །བཀོད་པ་ཆེན་པོ་ཞིང་བཀོད་སྣང་བ་དང་། །སེམས་ཅན་བསམ་པ་ཡོངས་རངས་དགའ་བ་དང་། །རྫོགས་པའི་བྱང་ཆུབ་ལམ་ལ་རྟག་འཐུན་དང་། །ཕ་རོལ་ཕྱིན་པ་བརྒྱན་དང་དཀོན་མཆོག་གཙུག །ཏིང་འཛིན་བྱང་ཆུབ་ཡན་ལག་མེ་ཏོག་སྦྱིན། །རྣམ་གྲོལ་སྙིང་པོ་བདུད་རྩི་སྦྱིན་པ་དང་། །རླུང་དང་རླུང་བཞིན་འགྲོ་བ་མི་དམིགས་དང་། །རྒྱ་མཚོ་ཤུགས་འཛིན་རིན་ཆེན་མཛོད་ལྡན་དང་། །བྲག་དང་རི་འཐབ་རྒྱལ་པོ་ཞེས་བྱ་དང་། །རྫུ་འཕྲུལ་ཡངས་དང་ཤིན་ཏུ་དོན་འཛིན་དང་། །སངས་རྒྱས་ཡུལ་སྟོན་ཏིང་ངེ་འཛིན་དག་དང་། །དེ་དང་གཞན་ཡང་རྒྱ་ཆེན་མཐའ་ཡས་པའི། །ཞི་བའི་ཏིང་འཛིན་བྱེ་བ་ཁོང་དུ་ཆུད། །གང་དག་བསམ་གཏན་ཕ་རོལ་ཕྱིན་སྤྱོད་པ། །བྱང་ཆུབ་སེམས་དཔའི་ཡོན་ཏན་དཔག་མེད་དེ། །མཉམ་པར་བཞག་ནས་བསམ་གཏན་སྤྱོད་ཡུལ་འགྲེང་། །མཉམ་པར་བཞག་ནས་རྒོད་པ་མེད་པར་འཆག །མཉམ་པར་བཞག་ནས་འདུག་ཅིང་ཉལ་བར་བྱེད། །དེ་ཡི་སྤྱོད་ལམ་མཉམ་པར་མ་བཞག་མེད། །མཉམ་པར་བཞག་པས་སྒྲ་ནི་འབྱིན་བྱེད་དེ། །ཆོས་འདི་ཐམས་ཅད་ཞི་དང་རབ་ཞི་བ། །རྟག་པ་མེད་ཅིང་རྣམ་པར་རྟོག་པ་མེད། །བདག་མེད་སྲོག་མེད་དབང་ཕྱུག་དག་ཀྱང་མེད། །བྱང་ཆུབ་སེམས་དཔའ་མཁས་པ་སྙིང་རྗེ་ཅན། །བསམ་གཏན་ཕ་རོལ་ཕྱིན་པ་སྤྱོད་བྱེད་པ། །ཡོན་ཏན་རྒྱ་མཚོ་དེ་ཡི་ཡོན་ཏན་ནི། །འདི་དང་གཞན་ཡང་ཕ་རོལ་མཐའ་ཡས་པའོ། །བསམ་གཏན་གྱི་ཕ་རོལ་ཏུ་ཕྱིན་པའི་ལེའུ་སྟེ་བཅུ་པའོ།། །།