བྱང་ཆུབ་སེམས་དཔའི་སྡེ་སྣོད།

The Collected Teachings on the Bodhisatva

Bodhisatva­piṭaka

Degé Kangyur volume 41, F.154.a

པ་དེ་ནི་ཆོས་ཀྱི་འཁོར་ལོ་སྐོར་བ་དང་འཐུན་པའོ། །​དེའི་མངོན་པར་ཤེས་པ་དེ་ནི་སེམས་ཅན་ཐམས་ཅད་འདུལ་བར་བྱེད་པའོ། །​དེའི་མངོན་པར་ཤེས་པ་དེ་ནི་ཆོས་ཐམས་ཅད་ལ་དབང་བས་དབང་བསྐུར་བ་ཐོབ་པའོ། །​ཤཱ་རིའི་བུ་དེ་ལྟར་བྱང་ཆུབ་སེམས་དཔའ་མངོན་པར་ཤེས་པ་མ་ཉམས་པ་ནི་ཤེས་པས་བྱས་པའི་ལས་རྣམས་བྱེད་ཀྱི་ང་རྒྱལ་གྱིས་བྱས་པ་ནི་མ་ཡིན་ནོ། །​མངོན་པར་ཤེས་པ་མ་ཉམས་པ་དེ་སེམས་ཡོངས་སུ་དག་པ་དང་། ཡོངས་སུ་བྱང་བ་དང་། འོད་གསལ་བ་དང་། ཉོན་མོངས་པ་མེད་པ་དང་། ཉེ་བའི་ཉོན་མོངས་པ་དང་བྲལ་བ་དང་། ཤིན་ཏུ་དུལ་བ་དང་། ཤིན་ཏུ་ཞི་བ་དང་། ཤིན་ཏུ་སྦྱང་བ་བྱས་པ་དང་། བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པས་ཀྱང་བསམས་བཞིན་དུ་སྐྱེ་སྟེ། བཅིངས་བཞིན་དུ་སྐྱེ་བ་མ་ཡིན། བཅིངས་བཞིན་དུ་འཆི་འཕོ་བ་མ་ཡིན། བཅིངས་བཞིན་དུ་འབྱུང་བ་མ་ཡིན་ནོ། །​དེ་ཅིའི་ཕྱིར་ཞེ་ན། དེ་ནི་ཡང་དག་པར་མ་ཡིན་པ་ཀུན་རྟོག་པ་ལས་གྲོལ་བའོ། །​དེ་ནི་ཉོན་མོངས་པའི་བཅིངས་པ་ཐམས་ཅད་ལས་གྲོལ་བའོ། །​དེ་ནི་ཕྱིན་ཅི་ལོག་གི་རྩེ་མོའི་གནས་ལས་གྲོལ་བའོ། །​དེ་བས་ན་དེ་གྲོལ་བཞིན་དུ་སྐྱེ། གྲོལ་བཞིན་དུ་འཆི་འཕོ། གྲོལ་བཞིན་དུ་འབྱུང་ངོ་། །​དེ་སྐྱེ་ཡང་ཐེག་པ་ཆེན་པོས་ཕོངས་པར་ཡང་མི་འགྱུར་ལ་སངས་རྒྱས་ཀྱི་ཆོས་རྣམས་ཀྱིས་ཕུན་སུམ་ཚོགས་པར་འགྱུར་རོ། །​སངས་རྒྱས་ཀྱི་ཆོས་དེ་དག་ཀྱང་ཕྱོགས་བཅུ་ཀུན་ཏུ་བཙལ་ཀྱང་མི་རྙེད། མི་དམིགས་ལ་ཆོས་ཐམས་ཅད་ཀྱང་སངས་རྒྱས་ཀྱི་ཆོས་ཀྱི་རྗེས་སུ་འཇུག་གོ །​དེ་ལྟར་ན་རང་སངས་རྒྱས་ཀྱི་ཆོས་དང་། ཆོས་ཐམས་ཅད་ནི་ཆོས་ཀྱང་མ་ཡིན་ལ་ཆོས་མ་ཡིན་པ་ཡང་མ་ཡིན་པ་ཞེས་བྱའོ། །​ཆོས་གང་ཡང་དག་པ་ཇི་ལྟ་བ་བཞིན་ཀུན་ཏུ་བཙལ་ཀྱང་མི་རྙེད་པ་དེ་ལ་བགྲང་བ་གང་ཡང་མེད་དེ། ཆོས་ཐམས་ཅད་ནི་བགྲང་བའི་ལམ་ལས་ཤིན་ཏུ་འདས་པའོ། །​གང་ཆོས་ཐམས་ཅད་མཉམ་པ་ཉིད་དུ་ཤེས་པ་དེ་ནི་ཆོས་དང་ཆོས་མ་ཡིན་པ་ལ་མངོན་པར་ཆགས་པར་མི་བྱེད་དོ། །​མངོན་པར་ཆགས་པ་མེད་པ་ནི་ཆོས་ཐམས་ཅད་ཀྱི་དོན་ཏོ། །​གང་དོན་ལ་རློམ་སེམས་སུ་བྱེད་པ་དེ་ནི་དེའི་གནོད་པ་ཆེན་པོའོ། །​གང་དོན་ལ་རློམ་སེམས་སུ་མི་བྱེད་པ་དེའི་མདུན་ན་ནི་དོན་ནམ་དོན་མ་ཡིན་པ་མི་གནས་སོ། །​དོན་མཐོང་བ་ལས་གང་དུ་ཡང་བློ་ཐོགས་པར་མི་འགྱུར་ཏེ། དེའི་བློ་ཐོགས་པ་མེད་དོ། །​གང་བློ་ཐོགས་པ་མེད་པ་དེ་ཡོངས་སུ་མི་འཛིན་ཏོ། །​གང་ཡོངས་སུ་མི་འཛིན་པ་དེ་མི་ཆགས་སོ། །​གང་མི་ཆགས་པ་དེ་གནས་མེད་དོ། །​གང་གནས་མེད་པ་དེ་ཉམས་པ་མེད་དོ། །​གང་ཉམས་པ་མེད་པ་དེའི་

eKangyur, UT4CZ5369-I1KG9167-0000, page 309 (154a).
About the eKangyur

The Tibetan page displayed here is from the eKangyur, a digital input version made by the University of Virginia and the British Library, with help from Esukhia, from scans of the Degé Kangyur held in the U.S. Library of Congress. This post par phud print (BDRC catalogue no. W4CZ5369) was purchased in Beijing and brought to the U.S. by William Rockhill in 1908-9.

Note that 84000 translations are made from a variety of sources, and readings may not always follow this particular version exactly. For details of the readings used in this translation, see Introduction and Notes; for the eKangyur, see the Tibetan and Himalayan Library.

The English translation of this folio by 84000 Translating the words of the Buddha can be found at:
https://read.84000.co/translation/toh56.html?part=UT22084-040-007-3109#UT22084-040-007-3109