རྒྱལ་པོའི་ཕོ་བྲང་འཁོར་ཞུགས་ནས། །ཆོ་འཕྲུལ་དག་ནི་རྣམ་པར་སྟོན། །སུམ་ཅུ་རྩ་གཉིས་བསོད་ནམས་དམ་མཆོག་མཚན། །ཆོས་ཀྱི་བདག་པོ་འདི་འདྲ་མཐོང་ནས་ནི། །བྱིས་པ་མ་བསླབས་པ་དག་མ་གཏོགས་པར། །ཐེག་པ་དམན་ལ་སུ་ཞིག་འཇུག་པར་འགྱུར། །ཤིན་ཏུ་དཀོན་པ་རབ་ཏུ་མཛེས་བྱུང་བ། །མི་མཆོག་འདི་ནི་བདག་གིས་མཐོང་བས་ན། །བྱང་ཆུབ་ཕྱིར་ནི་མངོན་པར་ཞུགས་གྱུར་ནས། །བདེ་བར་གཤེགས་པའི་དྲུང་དུ་ཉེ་བར་འགྲོ། །ཤཱ་རིའི་བུ་དེ་ནས་ཁྱེའུ་སྡོམ་པས་ཁྱེའུ་སྡོམ་པ་ལ་གནས་པ་ལ་ཚིགས་སུ་བཅད་པ་འདི་དག་སྨྲས་སོ། །བདག་ནི་ལེ་ལོའི་ལམ་དག་ནས། །སངས་རྒྱས་དྲུང་དུ་མི་འགྲོ་སྟེ། །ཁང་ཏོག་འདི་ནས་ཕྱི་རོལ་དུ། །བདག་གིས་ལུས་ནི་མཆོང་བར་བྱ། །བདག་ཏུ་འདུ་ཤེས་བསལ་གྱུར་ནས། །སྲོག་ལ་བལྟ་བར་མི་བྱ་སྟེ། །ཡེ་ཤེས་མཆོག་ནི་ཡོངས་བཅོལ་ཞིང་། །སངས་རྒྱས་དྲུང་དུ་འགྲོ་བར་བྱ། །ཕ་ལ་ཆགས་དང་མ་ལ་ཆགས། །ཁྱིམ་ལ་ཆགས་པ་མི་བཟད་པ། །དེ་དག་ཐམས་ཅད་རྣམ་སྤངས་ནས། །སངས་རྒྱས་དྲུང་དུ་འགྲོ་བར་བྱ། །འདི་འདྲར་འགྱུར་བར་གང་འདོད་པ། །དེ་ནི་སངས་རྒྱས་དགའ་བ་ཡིན། །རིན་པོ་ཆེ་ནི་ཀུན་སྤངས་ནས། །ཁྱིམ་མེད་པར་ནི་རབ་ཏུ་འབྱུང་། །དེ་ལྟར་ཤཱ་རིའི་བུ་ཁྱེའུ་སྡོམ་པ་ལ་གནས་པ་ནི་ཁྱིམ་གྱི་སྐས་ལས་བབས་ཏེ། བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་ག་ལ་བ་དེར་སོང་ངོ་། །ཡང་ཤཱ་རིའི་བུ་ཁྱེའུ་སྡོམ་པ་ནི་ཁང་ཏོག་དེ་ནས་མཆོངས་ནས་བཅོམ་ལྡན་འདས་དེ་བཞིན་གཤེགས་པ་མངོན་པར་འཕགས་ག་ལ་བ་དེར་ཤིན་ཏུ་མྱུར་དུ་སོང་ངོ་། །ཁྱེའུ་སྡོམ་པ་ལ་གནས་པ་ནི་ཕྱི་ནས་སོང་ངོ་། །ཤཱ་རིའི་བུ་དེ་ནས་ཁྱེའུ་སྡོམ་པས་བཅོམ་ལྡན་འདས་དེ་ལ་ན་བཟའ་སྲང་བྱེ་བ་རི་བ་ཕུལ་ཏེ། དེའི་ཚེ་ཚིགས་སུ་བཅད་པ་འདི་དག་གསོལ་ཏོ། །བདག་ནི་གཟུགས་རྣམས་ཚོལ་བའི་ཕྱིར། །སངས་རྒྱས་ན་བཟའ་འབུལ་མ་ལགས། །མི་མཆོག་དག་ནི་ཅི་འདྲ་བ། །དེ་འདྲ་བར་ནི་འགྱུར་བར་བགྱི། །ཡེ་ཤེས་ཕུང་པོ་ལྡན་པ་དང་། །བརྩོན་འགྲུས་སྟོབས་ལ་རབ་གནས་ཤིང་། །