།ཤཱ་རིའི་བུ་དེ་ནས་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་པ་དེ་སྔ་དྲོའི་དུས་ཀྱི་ཚེ་ཆོས་གོས་དང་ཤམ་ཐབས་མནབས། ལྷུང་བཟེད་བསྣམས་ཏེ། དགེ་སློང་གི་དགེ་འདུན་གྱིས་བསྐོར་ཅིང་དགེ་སློང་གི་དགེ་འདུན་གྱིས་མདུན་དུ་བདར་ནས་བསོད་སྙོམས་ཀྱི་ཕྱིར་གྲོང་ཁྱེར་དེར་གཤེགས་པ་དང་། མཛེས་པ་དགའ་བར་འགྱུར་བ། དབང་པོ་ཞི་བ། ཡིད་ཞི་བ། །མཆོག་ཏུ་དུལ་བ་དང་། ཞི་གནས་ཀྱི་མཆོག་ཐོབ་པ། ཤིན་ཏུ་དུལ་ཞིང་ཞི་གནས་ཐོབ་པ། དབང་པོ་དུལ་ཅིང་སྦས་པ་གླང་པོ་ལྟར་རབ་ཏུ་དུལ་བ། མཚོ་ལྟར་དང་ཞིང་རྙོག་པ་མེད་ལ་གསལ་བ། གསེར་གྱི་མཆོད་སྡོང་ལྟ་བུ། ས་ལེ་སྦྲམ་གྱི་རི་ལྟ་བུ། རིན་པོ་ཆེས་ཡོངས་སུ་གང་བའི་མཚོ་ལྟ་བུ། ལྷས་ཀུན་ནས་བསྐོར་བའི་བརྒྱ་བྱིན་ལྟ་བུ། ཡིད་རབ་ཏུ་ཞི་བའི་ཚངས་པ་ལྟ་བུའི་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་མཛེས་ཤིང་དགའ་བར་འགྱུར་བ་དེ་རྒྱང་མ་ནས་བྱོན་པ་ཁྱེའུ་དེ་གཉིས་ཀྱིས་མཐོང་ངོ་། །ཤཱ་རིའི་བུ་དེ་ན་གང་སྡོམ་པ་ལ་གནས་པ་ཞེས་བྱ་བའི་གཞོན་ནུ་དེས་དང་པོ་ཉིད་དུ་བཅོམ་ལྡན་འདས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་མངོན་པར་འཕགས་སྔར་མཐོང་ནས་དེས་ནུ་བོ་དེ་ལ་སྨྲས་པ། སེམས་ཅན་གྱི་རྒྱལ་པོ་འདི་ལྟ་བུ་མཛེས་པ་ནུ་བོ་ཁྱོད་ཀྱིས་སྔོན་ནམ་ཡང་རེས་འགའ་མཐོང་ངམ། དེས་ཕུ་བོ་ལ་ཕུ་བོ་སེམས་ཅན་གྱི་རྒྱལ་པོ་མཛེས་པ་འདི་ལྟ་བུ་བདག་གིས་སྔོན་ལན་འགའ་ཡང་མ་མཐོང་ངོ་ཞེས་དེ་སྐད་སྨྲས་པ་དང་། དེས་ནུ་བོ་ང་ནི་འདི་དང་འདྲ་བ་ཉིད་དུ་འགྱུར་བར་བྱའོ་ཞེས་དེ་སྐད་སྨྲས་སོ། །ཤཱ་རིའི་བུ་དེ་ནས་ཁྱེའུ་སྡོམ་པ་ལ་གནས་པས་ཁྱེའུ་སྡོམ་པ་ལ་ཚིགས་སུ་བཅད་པ་འདི་དག་སྨྲས་སོ། །སྡོམ་པ་ཇི་ལྟར་མཐོང་བ་བཞིན། །དེ་འདྲ་བར་ནི་བདག་བསྒྱུར་ཏེ། །བདག་ནི་དེ་བས་མང་བ་ཡི། །དགེ་སློང་དགེ་འདུན་བསྡུ་བར་བྱ། །བྱང་ཆུབ་ཀྱི་ནི་ལམ་གྱི་ཕྱིར། ཟས་དང་སྐོམ་ནི་མི་བཟའོ། །སྡོམ་པ་འདི་ནི་རྒྱལ་བ་སྟེ། །བདག་ནི་ཁྱིམ་འདིར་དགའ་བ་མེད། །སེམས་ཅན་ཀུན་གྱི་མཆོག་འདི་ནི། །སྐར་མང་དབུས་ན་ཟླ་བ་བཞིན།