།སེམས་ཅན་རྣམས་ལ་འཇིགས་བསྐྱེད་དང་། །ཉེས་པའི་ལས་རྣམས་བྱས་གྱུར་ནས། །མི་མཆོག་རྣམས་ནི་མཉེས་མི་བྱེད། །དགེ་སློང་དང་ནི་དགེ་སློང་མ། །ཚུལ་ཁྲིམས་ཉམས་བྱས་སྡུག་བསྔལ་གྱུར། །སངས་རྒྱས་མང་པོ་མཉེས་མི་བྱེད། །དེ་ལ་དལ་བ་རྙེད་པར་དཀའ། །ཕ་དང་མ་དང་ཆུང་མ་རྣམས། །ཆོས་སྤྱོད་པ་ཡི་བགེགས་བྱེད་དེ། །མྱུར་དུ་ཆོས་ཀྱང་མི་ཐོས་ཤིང་། །གཏི་མུག་གིས་ནི་བསྒྲིབས་པར་འགྱུར། །རབ་ཏུ་འབྱུང་བར་འགྲོ་བ་ལ། །བར་དུ་གཅོད་པ་བྱས་གྱུར་ནས། །སངས་རྒྱས་མང་པོ་མཉེས་མི་བྱེད། དེ་ལ་དལ་བ་མི་འབྱུང་ངོ་། །གང་དུ་སྟོང་པ་ཉིད་བསྔགས་པ། །འདི་ལྟ་བུ་ཡི་ཆོས་ཐོས་ནས། ཁྲོ་བ་དག་ནི་ཉེར་ལེན་ཅིང་། །འདི་ནི་ཆོས་མིན་ཞེས་ཀྱང་སྨྲ། །བར་ཆད་འདི་དག་ཐམས་ཅད་ཀྱིས། །བཅུ་དྲུག་ཆར་ཡང་ཉེར་མི་འགྲོ། །དམ་པའི་ཆོས་ལ་སྨད་བྱས་ནས། །དམུས་ལོང་རབ་ཏུ་སྡུག་བསྔལ་འགྱུར། །རྫོགས་པའི་སངས་རྒྱས་དེས་མི་མཐོང་། །མཐོང་དུ་ཟིན་ཀྱང་དད་མི་འགྱུར། །བུད་མེད་མ་ནིང་དམུས་ལོང་དང་། །ཁྱི་དང་བོང་བུ་རྣམས་སུ་འགྱུར། །གང་ཞིག་སངས་རྒྱས་བྱང་ཆུབ་དང་། །བྱང་ཆུབ་སེམས་དཔའ་དགའ་བ་དག །བར་དུ་གཅོད་པ་རྣམ་སྤངས་ནས། །བཟང་པོ་དག་གི་ལམ་རྣམས་སྒོམ། །ཕ་དང་མ་ནི་ཆོས་འདི་ལ། །ཡང་དང་ཡང་དུ་སྦྱོར་བ་དང་། །སེམས་ཅན་ཐམས་ཅད་རབ་འབྱུང་བར། །མྱུར་བ་ཉིད་དུ་ལེན་དུ་འཇུག །མ་ནི་ཆོས་ལ་སྦྱར་བྱས་ན། །མྱུར་དུ་བཟང་པོའི་འགྲོ་བར་འགྲོ། །རབ་ཏུ་འབྱུང་བ་བསྔགས་པས་ན། །མྱུར་དུ་བྱང་ཆུབ་རྣམ་འཚང་རྒྱ། །ཤཱ་རིའི་བུ་རབ་ཏུ་བྱུང་བའི་བྱང་ཆུབ་སེམས་དཔའ་ཆོས་ལྔ་དང་ལྡན་ན་སངས་རྒྱས་བྱུང་བ་མཉེས་པར་མི་བྱེད། དགེ་བའི་བཤེས་གཉེན་ལ་ཡང་མི་སྟེན། དལ་བ་ཕུན་སུམ་ཚོགས་པ་ཡང་མི་འཐོབ། ཇི་ལྟར་བསྒྲུབས་པའི་དགེ་བའི་རྩ་བ་རྣམས་ཀྱང་ཆུད་ཟ་བར་བྱེད། སྡོམ་པ་ལ་གནས་པའི་བྱང་ཆུབ་སེམས་དཔའ་སེམས་དཔའ་ཆེན་པོའི་ཡང་རྗེས་སུ་སློབ་པར་མི་འགྱུར་ཏེ། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཀྱང་མྱུར་དུ་མངོན་པར་རྫོགས་པར་འཚང་མི་རྒྱའོ། །ལྔ་གང་ཞེ་ན། འཆལ་པའི་ཚུལ་ཁྲིམས་ལ་སྤྱོད་པ་དང་།