མཛོད་མང་པོ་དང་ལྡན་པ་དེ་སྐྱེས་བུ་དམ་པ་མ་ཡིན་པ་དེ་དག་གིས་ཆད་པར་ལྟ་བ་མུ་སྟེགས་ཅན་གཅེར་བུ་པའི་སྨྲ་བ་ལ་བཞག་པར་གྱུར་ཏོ། །དེའི་ཆུང་མ་འོད་འཕྲོ་ཅན་ཞེས་བྱ་བ་ཞིག་ཡོད་དེ། གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ་ཞིག་བྱུང་ངོ་། །དེ་ལས་བུ་ཞིག་བཙས་པ་ཡང་གཟུགས་བཟང་བ། མཛེས་པ། བལྟ་ན་སྡུག་པ། ཁ་དོག་བཟང་པོ་རྒྱས་པ་མཆོག་དང་ལྡན་པ། སངས་རྒྱས་བྱེ་བ་ཁྲག་ཁྲིག་བརྒྱ་སྟོང་ཕྲག་མང་པོ་ལ་དགེ་བའི་རྩ་བ་བསྐྱེད་པ་ཞིག་བྱུང་སྟེ། དེ་བཙས་མ་ཐག་ཏུ་ལན་གསུམ་འཛུམ་མུལ་ཞེས་རྒོད་ནས། བདག་ནི་ཆད་པར་སྨྲ་བའི་རིགས་སུ་སྐྱེས་སོ་ཞེས་དེ་སྐད་ཀྱི་ཚིག་གི་ལས་སྨྲས་པ་དང་། ཁྱེའུ་དེའི་མས་སྒྲ་དེ་ཐོས་ནས་དངངས་སྐྲག་ཅིང་མི་དགའ་སྟེ། སྤུ་ཟིང་ཞེས་བྱེད་ནས་ཁྱེའུ་དེ་བོར་ཏེ་བྲོས་པ་དང་བུད་མེད་གཞན་འདུས་པར་གྱུར་པ་དག་ཀྱང་བྱེར་རོ། །དེ་ནས་ཤཱ་རིའི་བུ་བུད་མེད་དེ་དག་རིང་ཞིག་ཏུ་ཕྱིན་པ་དང་། སླར་ལོག་སྟེ་ལྟ་ཞིང་འདི་ལྷའམ། ཀླུ་འམ། གནོད་སྦྱིན་ནམ། དྲི་ཟ་འམ། ལྷ་མ་ཡིན་ནམ། ནམ་མཁའ་ལྡིང་ངམ། མིའམ་ཅི་འམ། ལྟོ་འཕྱེ་ཆེན་པོའམ། གྲུལ་བུམ་འམ། འབྱུང་པོ་འམ། ཤ་ཟའམ། མི་འམ། མི་མ་ཡིན་པའམ། འདི་སུ་ཞིག་ཤེས་པར་བྱའོ་སྙམ་མོ། །ཤཱ་རིའི་བུ་དེ་ནས་ཁྱེའུ་དེས་བསམས་པ། ཀྱེ་མའོ་བུད་མེད་དེ་དག་ནི་བདེ་བ་ལས་བྲོས་པར་གྱུར་ཏོ་སྙམ་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །ང་ནི་ཁྱེད་ཀྱི་དོན་འདོད་ཀྱིས། །གནོད་མི་འབྱུང་གིས་མ་འཇིགས་ཤིག །ཁྱེད་ནི་ལམ་ངན་ཞུགས་པ་ལས། །ངས་ནི་རབ་ཏུ་ཐར་བར་བྱ། །ཁྱེད་རྣམས་བདེ་ལས་འཇིགས་པར་བྱེད། །དགྲ་རྣམས་ཀྱིས་ནི་མདུན་དུ་བདར། །ལོག་པར་ལྟ་བར་ལྷུང་བ་ལས། །ངས་ནི་ཁྱེད་རྣམས་དགྲོལ་བར་བྱ། །ཤཱ་རིའི་བུ་དེ་ནས་ཁྱེའུ་དེའི་མ་དང་། ཕ་དང་། སྐྱེ་བོ་ཕལ་པོ་ཆེས་ཚིགས་སུ་བཅད་པ་དེ་དག་ཐོས་ནས་ཁྱེའུ་དེ་ག་ལབ་དེར་དོང་ངོ་། །དེ་ནས་ཁྱེའུ་དེས་རང་གི་མ་དང་། ཕ་ལ་ཚིགས་སུ་བཅད་པ་འདི་དག་སྨྲས་སོ། །ནོར་དག་དང་ནི་འབྲུ་དག་རྣམས། །ཁྱིམ་ན་རྒྱ་ཆེན་ཡོད་པ་དག །མྱུར་དུ་བདག་ལ་སྦྱིན་པར་གྱིས། །བདག་ནི་སངས་རྒྱས་ཉན་ཐོས་སོ། །འཇིག་རྟེན་གསུམ་ཀུན་དཀྱིལ་འཁོར་ན། །རྣམ་གཟིགས་འཇིག་རྟེན་སྣང་མཛད་པ། །དེ་འདྲ་བ་ནི་གང་ཡང་མེད། །བདག་ནི་དེ་ཡི་ཉན་ཐོས་སོ།