།ཁྱིམ་བདག་རྣམས་སེམས་དང་ཡིད་དང་རྣམ་པར་ཤེས་པ་དང་བྲལ་བའི་ཕྱིར་ཆོས་ཐམས་ཅད་ནི་བྱེད་པ་མེད་པ་གཡོ་བ་མེད་པའོ། །ཁྱིམ་བདག་རྣམས་རང་བཞིན་གྱིས་ཉམ་ཆུང་བའི་ཕྱིར་ཆོས་ཐམས་ཅད་ནི་རྐྱེན་ལ་རག་ལས་པའོ། །ཁྱིམ་བདག་རྣམས་མིག་ནི་འབྱུང་བ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། སྙིང་པོ་མེད་པ། ཉམ་ཆུང་བ། ཞིགས་པ། ཡུན་ཐུང་བ། ཡིད་བརྟན་དུ་མི་རུང་བ། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་མིག་དེ་ལ་གནས་པར་མི་བྱའོ། །ཁྱིམ་བདག་རྣམས་རྣ་བ་དང་། སྣ་དང་། ལྕེ་དང་། ལུས་དང་། ཡིད་ནི་འབྱུང་བ་ཆེན་པོ་བཞི་ལས་གྱུར་པ། མི་རྟག་པ། མི་བརྟན་པ། ཐེར་ཟུག་མ་ཡིན་པ། ཡིད་བརྟན་དུ་མི་རུང་བ། སྙིང་པོ་མེད་པ། ཞིགས་པ། ནད་ཅན། སྡུག་བསྔལ་བ། ནད་མང་བ། གཙེ་བ་མང་བ་ཡིན་ཏེ། ཁྱིམ་བདག་ཁྱེད་རྣམས་ཀྱིས་ཡིད་དེ་ལ་གནས་པར་མི་བྱའོ། །ཡང་ཁྱིམ་བདག་རྣམས་འདི་ལྟར་བསླབ་པར་བྱ་སྟེ། མིག་འདི་ནི་མཉེར་མི་བཟོད་དེ། དབུ་བ་རྡོས་པ་ལྟ་བུའོ། །མིག་འདི་ནི་རིང་དུ་མི་གནས་ཏེ་ཆུའི་ཆུ་བུར་ལྟ་བུའོ། །མིག་འདི་ནི་ལས་དང་ཉོན་མོངས་པ་དང་། སྲེད་པ་ལས་བྱུང་བ་སྟེ། སྨིག་རྒྱུ་ལྟ་བུའོ། །མིག་འདི་ནི་རང་བཞིན་གྱིས་སྙིང་པོ་མེད་དེ་ཆུ་ཤིང་ལྟ་བུའོ། །མིག་འདི་ནི་ཕྱིན་ཅི་ལོག་ལས་བྱུང་བ་སྟེ། སྒྱུ་མ་ལྟ་བུའོ། །མིག་འདི་ནི་ལོག་པ་དང་། ཡང་དག་པ་མ་ཡིན་པ་མཐོང་བ་སྟེ། རྨི་ལམ་ལྟ་བུའོ། །མིག་འདི་ནི་རྐྱེན་ལ་རག་ལས་པ་སྟེ་བྲག་ཅ་ལྟ་བུའོ། །མིག་འདི་ནི་ལས་ཀྱི་མིག་ཡོར་གྱིས་ཀུན་དུ་སྣང་བ་སྟེ་མིག་ཡོར་ལྟ་བུའོ། །མིག་འདི་ནི་སེམས་འཁྲུག་པ་མེད་པར་འགྱུར་བའི་མཚན་ཉིད་དེ་སྤྲིན་ལྟ་བུའོ། །མིག་འདི་ནི་སྐད་ཅིག་ཏུ་འཇིག་པ་དང་ལྡན་པ་སྟེ། གློག་ལྟ་བུའོ། །མིག་འདི་ནི་བདག་པོ་མེད་དེ། ས་དང་མཚུངས་སོ། །མིག་འདི་ནི་བདག་མེད་དེ་ཆུ་དང་མཚུངས་སོ། །མིག་འདི་ནི་སེམས་ཅན་མེད་དེ་མེ་དང་མཚུངས་སོ། །མིག་འདི་ནི་སྲོག་མེད་དེ་རླུང་དང་མཚུངས་སོ། །མིག་འདི་ནི་གང་ཟག་མེད་དེ་ནམ་མཁའ་དང་མཚུངས་སོ། །མིག་འདི་ནི་འབྱུང་བ་ཆེན་པོའི་ཀུན་གཞི་སྟེ་ཡང་དག་པ་མ་ཡིན་པའོ།