ཤེས་རབ་དཔའ་བ་དང་། སྤྱོད་པའི་ཁྱད་པར་གྱི་ཡེ་ཤེས་དཔའ་བ་ཞེས་བྱའོ། །དེ་ལ་ཤཱ་རིའི་བུ་བྱང་ཆུབ་སེམས་དཔའ་གང་མཚོན་རྣོན་པོ་ཐོགས་པའི་དགྲ་རྣམས་ལ་གནོད་པའི་སེམས་གཅིག་ཀྱང་མི་སྐྱེད་པ་དེ་ནི་བྱང་ཆུབ་སེམས་དཔའ་ཚངས་པ་དང་མཚུངས། དབང་པོ་དང་མཚུངས། ལྷུན་པོ་དང་མཚུངས་ཏེ། མི་སྒུལ་བའི་སྙིང་རྗེ་ཅན། བྱམས་པ་ལ་གནས་པ་སེམས་ཅན་ཐམས་ཅད་ཀྱི་བསམ་པ་གསོ་བ་ལ་མོས་པ། ཕྱིར་མི་ལྡོག་པའི་སྤྱོད་ཡུལ་བ། སེམས་ས་དང་མཚུངས་པ། སེམས་ཆུ་དང་མཚུངས་པ། སེམས་མེ་དང་མཚུངས་པ། སེམས་རླུང་དང་མཚུངས་པ། སེམས་ནམ་མཁའ་དང་མཚུངས་པ། འདོད་ཆགས་དང་། ཞེ་སྡང་དང་། གཏི་མུག་དང་། ཐ་བ་སེལ་བ་ལ་ཞུགས་པ་ཞེས་བྱའོ། །ཡང་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་གང་གཱའི་ཀླུང་གི་བྱེ་མ་སྙེད་ཀྱི་འཇིག་རྟེན་གྱི་ཁམས་རིན་པོ་ཆེ་སྣ་བདུན་གྱིས་ཡོངས་སུ་གང་བར་བྱས་ཏེ། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་ལ་སྦྱིན་པ་བྱིན་པ་བས། བྱང་ཆུབ་སེམས་དཔའ་སེམས་དཔའ་ཆེན་པོ་གང་གིས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཐོས་ནས་འདི་ལྟ་བུའི་ཆོས་བདག་གིས་བསླབ་པར་བྱའོ་ཞེས་སེམས་ལ་རབ་ཏུ་བཞག་ན། ཤཱ་རིའི་བུ་བྱང་ཆུབ་སེམས་དཔའི་སློབ་པར་འདོད་པས་མ་བསླབས་ཀྱང་དགེ་བའི་རྩ་བ་ཆེས་མང་དུ་ཡོངས་སུ་བཟུང་བར་འགྱུར་ཏེ། སྦྱིན་པ་ཆེན་པོ་བྱིན་པས་ནི་དེ་ཙམ་མ་ཡིན་ནོ། །དེ་ཅིའི་ཕྱིར་ཞེ་ན། ཤཱ་རིའི་བུ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ནི་འདིའི་ཁར་ལུས་སོ། །དེ་བས་ན་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མཉན་པ་དང་། གཟུང་བ་དང་། ཡི་གེར་བྲི་བ་དང་། བཀླག་པ་དང་། བཅང་བ་དང་། ཕ་རོལ་ལ་ཡང་ཡང་དག་པར་རབ་ཏུ་བསྟན་པའི་ཕྱིར་བརྩོན་འགྲུས་བརྩམ་མོ། །ཤཱ་རིའི་བུ་བྱང་ཆུབ་སེམས་དཔའ་བརྩོན་འགྲུས་བརྩམས་པ་ནི་འགྲོ་བ་མེད་པའི་འགྲོ་བར་འགྲོའོ། །འགྲོ་བ་མེད་པར་འགྲོ་བ་གང་ཞེ་ན། འདི་ལྟ་སྟེ། མྱ་ངན་ལས་འདས་པ་སྟེ། དེར་བདུད་སྡིག་ཅན་འགྲོ་བ་མེད་དོ། །དེ་བས་ན་འགྲོ་བ་མེད་པར་འགྲོ་བ་ཞེས་བྱའོ།