།གང་མི་སྐྱེ་བ་དེ་ནི་མི་ཟད་པ་སྟེ། གང་དེ་ལྟར་བཟོད་ན་དེ་ནི་མི་སྐྱེ་བ་ལ་བཟོད་པ་ཞེས་བྱའོ། །ཤཱ་རིའི་བུ་བཟོད་པ་འདི་ལྟ་བུ་དང་ལྡན་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དོ། །ཤཱ་རིའི་བུ་འདི་ནི་བྱང་ཆུབ་སེམས་དཔའ་སེམས་དཔའ་ཆེན་པོའི་རྣམས་ཀྱི་བཟོད་པའི་ཕ་རོལ་ཏུ་ཕྱིན་པ་སྟེ། འདི་ལ་ཞུགས་པའི་བྱང་ཆུབ་སེམས་དཔའ་སེམས་དཔའ་ཆེན་པོ་བྱང་ཆུབ་སེམས་དཔའི་སྤྱད་པ་སྤྱོད་དེ། བདུད་དང་བདུད་ཀྱི་རིས་ཀྱི་ལྷའི་བུ་རྣམས་དང་། དེ་མ་ཡིན་པ་ཕས་ཀྱི་རྒོལ་བ་གཞན་ཐམས་ཅད་ཀྱིས་མི་ཐུལ་བ་ཡིན་ནོ། །བཟོད་པའི་ཕ་རོལ་ཏུ་ཕྱིན་པའི་ལེའུ་ཞེས་བྱ་སྟེ། བརྒྱད་པའོ།། །།བམ་པོ་བཅུ་གཉིས་པ། དེ་ལ་བྱང་ཆུབ་སེམས་དཔའ་སེམས་དཔའ་ཆེན་པོ་གང་ལ་ཞུགས་པ་བྱང་ཆུབ་སེམས་དཔའི་སྤྱད་པ་སྤྱོད་ཅིང་བདུད་དང་བདུད་ཀྱི་རིས་ཀྱི་ལྷའི་བུ་རྣམས་དང་། དེ་མ་ཡིན་པ་གཞན་ཕས་ཀྱི་རྒོལ་བ་ཐམས་ཅད་ཀྱིས་མི་ཐུལ་བར་འགྱུར་བའི་བྱང་ཆུབ་སེམས་དཔའི་བརྩོན་འགྲུས་ཀྱི་ཕ་རོལ་ཏུ་ཕྱིན་པ་གང་ཞེ་ན། འདི་ལྟར་ཤཱ་རིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཕྱིར་མི་ལྡོག་པའི་བརྩོན་འགྲུས་དང་ལྡན་པ་ཡིན་ཏེ། རང་གི་ལུས་དང་སྲོག་ལ་མི་ལྟ་བར་བརྩོན་འགྲུས་དྲག་པོ་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་འདི་ཡོངས་སུ་ཚོལ་བར་བྱེད། ཤིན་ཏུ་ཉན་པར་བྱེད། འཆང་བར་བྱེད། འཛིན་པར་བྱེད། ཀློག་པར་བྱེད། ཀུན་ཆུབ་པར་བྱེད། གཞན་ལ་འཆད་པར་བྱེད། རྒྱ་ཆེར་ཡང་དག་པར་རབ་ཏུ་སྟོན་པར་བྱེད། བྲིས་ནས་འཛིན་པར་བྱེད་དོ། །དེ་ཇི་ལྟར་ན་ལུས་དང་སྲོག་ལ་མི་ལྟ་བ་ཡིན་ཞེ་ན། འདི་ལ་ཤཱ་རིའི་བུ་བྱང་ཆུབ་སེམས་དཔའ་འདི་ལྟ་བུའི་མདོ་སྡེ་འཆང་བ་དང་། འཛིན་པ་དང་། ཀློག་པ་དང་། ཀུན་ཆུབ་པར་བྱེད་པ་དང་། གཞན་ལ་ཡང་གོ་བར་བྱེད་པ་དང་། རྒྱ་ཆེར་ཡང་དག་པར་རབ་ཏུ་སྟོན་པ་དང་། བྲིས་ནས་འཛིན་པ་དང་། དེ་བཞིན་དུ་ནན་ཏན་བྱེད་པ་དེ་དག་གི་ལུས་ལ་ངས་མདའ་དང་། མཚོན་དང་མདུང་ཐུང་བརྒྱས་ཕུག་སྟེ། སྲོག་བཅད་དོ་ཞེས་ཕ་རོལ་གྱིས་བསྡིགས་ཀྱང་དེ་ལ་ཤཱ་རིའི་བུ་བྱང་ཆུབ་སེམས་དཔའ་མི་འཇིགས། མི་དང་ང་། མི་སྐྲག །ཀུན་ཏུ་སྐྲག་པར་མི་འགྱུར་གྱི། ཕྱིར་ཞིང་བརྩོན་འགྲུས་བརྟན་པ་བསྐྱེད་ནས་བྱང་ཆུབ་སེམས་དཔའི་སྡེ་སྣོད་ཀྱི་ཆོས་ཀྱི་རྣམ་གྲངས་མི་སྤོང་།