ཆགས་པ་མེད་པ། ཐོགས་པ་མེད་པས། སངས་རྒྱས་བཅོམ་ལྡན་འདས་ཀྱིས་བདག་མཁྱེན་ཏེ། གལ་ཏེ་བདག་གནོད་སེམས་ཀྱི་དུས་ན་བཏང་སྙོམས་སུ་མ་གྱུར་ཅིང་གང་སངས་རྒྱས་དང་། བྱང་ཆུབ་དང་། ཆོས་དང་། དགེ་འདུན་ཡིད་ལ་མི་བྱེད་ན་དེ་ནི་བདག་གི་མི་ཆའོ། །ཤར་ཕྱོགས་ཀྱི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་གང་ད་ལྟར་བཞུགས་ཏེ། འཚོ་ཞིང་གཞེས་པའི་སངས་རྒྱས་བཅོམ་ལྡན་འདས་དེ་དག་གིས་ཀྱང་རིགས་ཀྱི་བུ་དེས་འདི་ལྟར་སེམས་སྐྱེད་དེ། བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་སེམས་ཅན་ཐམས་ཅད་ལ་ཆོས་བསྟན་པར་བྱའོ་སྙམ་དུ་བདག་གི་སེམས་བསྐྱེད་པ་མཁྱེན་ཏོ། །ཡང་ལྷོ་ཕྱོགས་དང་། ནུབ་ཕྱོགས་དང་། བྱང་ཕྱོགས་དང་། ཤར་ལྷོ་དང་། ལྷོ་ནུབ་དང་། ནུབ་བྱང་དང་། བྱང་ཤར་དང་། དེ་བཞིན་དུ་སྟེང་དང་། འོག་གི་ཕྱོགས་དང་། དེ་ལྟར་ཕྱོགས་དང་། ཕྱོགས་མཚམས་དང་། དེ་བཞིན་དུ་ཕྱོགས་བཅུའི་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་དང་མཉམ་པ་གང་ད་ལྟར་བཞུགས་ཏེ། འཚོ་ཞིང་གཞེས་པ་དེ་དག་གིས་ཀྱང་རིགས་ཀྱི་བུ་འདི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ཞུགས་སོ་ཞེས་བདག་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས། སེམས་ཅན་ཐམས་ཅད་ལ་ཆོས་སྟོན་ཅིང་བཟོད་པའི་བསྔགས་པ་བརྗོད་པར་བྱའོ་ཞེས་སེམས་བསྐྱེད་པ་དེ་མཁྱེན་གྱིས་དེ་བས་ན་སེང་གེའི་སྒྲ་བསྒྲགས་ལ་བདག་ཝའི་སྒྲ་སྒྲོག་པར་ནི་མི་བྱའོ། །ཀྱེ་མའོ་འདི་ལྟ་སྟེ། སེང་གེའི་སྒྲ་དེ་ནི་བཟོད་པའི་སྟོབས་ཤེས་པར་བྱེད་པའོ། །ཀྱེ་མའོ་འདི་ལྟ་སྟེ། ཝའི་སྒྲ་དེ་ནི་གཤེ་བ་དང་། མི་སྙན་པར་ཟེར་བའོ། །སེམས་ཅན་འདི་དག་ནི་སེམས་ཅན་གང་དོན་བྱེད་ན་སེམས་ཅན་དེ་ཡང་དེའི་དོན་བྱེད་དོ། །བདག་ཀྱང་སེམས་ཅན་གང་གིས་དོན་བྱས་པ་དེའི་ཕྱིར་དེའི་དོན་བྱེད་པར་གྱུར་ན་དེ་ལ་ཁྱད་པར་ཅི་ཞིག་ཡོད། ཐ་དད་པ་ཅི་ཞིག་ཡོད། དཀའ་བ་སྤྱོད་པ་ཅི་ཞིག་ཡོད། སེམས་ཅན་འདི་དག་ནི་སེམས་ཅན་གང་གནོད་པར་བྱེད་ན་དེ་ལ་སེམས་ཅན་དེ་ཡང་གནོད་པར་བྱེད་དོ།