།བརྩོན་འགྲུས་དང་ནི་སྟོབས་མེད་དེ། །སྐྱེས་བུ་ཡི་ནི་མཐུ་ཡང་མེད། །ཤིན་ཏུ་རྟུལ་བ་མཆོག་རྣམས་དང་། །དེ་དག་ཐམས་ཅད་མི་དམིགས་སོ། །སངས་རྒྱས་དང་ནི་ཆོས་ཀྱང་མེད། །ཕ་མ་མེད་པ་དེ་བཞིན་དུ། །དཀར་པོ་དང་ནི་ནག་པོའི་ལས། །རྣམ་པར་སྨིན་པ་ཀུན་མེད་ཅེས། །འདི་འདྲའི་སྡིག་པར་ལྟ་བ་དག །ཡང་དང་ཡང་དུ་བསྟེན་པས་ན། །གཅིག་ཏུ་མི་བཟད་མ་རུངས་པ། །སེམས་ཅན་དམྱལ་བར་ཡུན་རིང་གནས། །དེ་བཞིན་དུད་འགྲོའི་སྐྱེ་གནས་དང་། །གཤིན་རྗེའི་འཇིག་རྟེན་སྡིག་ཅན་ཏེ། །ནམ་ཚེའང་མིར་ནི་སྐྱེས་གྱུར་ཀྱང་། །བླུན་ཞིང་ལྕེ་ནི་མེད་པར་འགྱུར། །གཡེང་བ་དང་ནི་འོན་པར་འགྱུར། །དིག་པ་ལྐུགས་པ་རྨོངས་པར་འགྱུར། །ཡུན་རིང་སེམས་དམྱལ་མ་རུངས་པར། །མི་ཤེས་པས་ནི་རབ་ཏུ་ལྟུང་། །དབང་པོ་ཐམས་ཅད་ཕུན་ཚོགས་ཤིང་། །བདག་གི་ལུས་འདི་རབ་མཛེས་པ། །ཡུན་རིང་དུས་ན་བདག་གིས་ཐོག །འདི་ནི་བདག་བརྩོན་བྱ་བའི་དུས། །ཆོས་གང་དོན་དང་ལྡན་པ་དང་། །མྱ་ངན་འདའ་བའི་གྲོགས་བྱེད་པ། །བྱང་ཆུབ་ལམ་དང་བྱང་ཆུབ་ལ། །བདག་ནི་འབད་པར་བྱ་བའི་དུས། །བྱང་ཆུབ་སེམས་དཔའི་སྡེ་སྣོད་ནི། །ཟབ་མོའི་དོན་དང་ལྡན་པ་སྟེ། །བསྐལ་པ་སྟོང་ཕྲག་བྱེ་བར་ཡང་། །དེ་ནི་ཤིན་ཏུ་ཐོས་པར་དཀའ། །སངས་རྒྱས་ཀྱི་ནི་བྱང་ཆུབ་ཕྱིར། །སངས་རྒྱས་ཆོས་མང་འདི་དང་ནི། །གཞན་ཡང་བསམ་གྱིས་མི་ཁྱབ་ལ། །རབ་ཏུ་འཇུག་ཅིང་གཟུང་བར་བྱ། །སློབ་དཔོན་ལ་ནི་གུས་བཅས་ཤིང་། །བསྙེན་བཀུར་དག་ནི་བྱས་པས་ན། །སངས་རྒྱས་བྱང་ཆུབ་སེམས་དཔའ་རྣམས། །ཐོས་པ་དེ་ནི་རྙེད་པར་འགྱུར། །བྱང་ཆུབ་སེམས་དཔའ་མི་འཇིགས་པ། །ཐབས་དང་ཤེས་རབ་ལྡན་པ་ཡི། །འདི་ལྟ་བུར་ནི་སེམས་བསྐྱེད་ནས། །རྫ་གང་ཙམ་གྱི་ཆུ་ཡང་འབུལ། །ཤཱ་རིའི་བུ་སེམས་བསྐྱེད་པ་བརྒྱད་པ་འདི་བསྐྱེད་ནས་བྱང་ཆུབ་སེམས་དཔའ་བྱང་ཆུབ་སེམས་དཔའི་སྡེ་སྣོད་ཀྱི་ཕྱིར་སློབ་དཔོན་ལ་རིམ་གྲོ་དང་། བསྙེན་བཀུར་བྱེད་དེ། ཐ་ན་ཆུ་རྫ་གང་ཙམ་ཡང་འབུལ་ལོ། །གཞན་ཡང་ཤཱ་རིའི་བུ་བྱང་ཆུབ་སེམས་དཔའ་འདི་ལྟར་སེམས་བསྐྱེད་དེ། ཀྱེ་མའོ་སེམས་ཅན་འདི་དག་ནི་དོན་མེད་པས་ཡོངས་སུ་བསྐོར་བ། ལུས་དང་སྲོག་ལ་ལྟ་བའོ། །