ཡིད་ཀྱི་ལས་གང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་མ་བྱས་པ་དེ་ནི་ཡིད་ཀྱིས་ལེགས་པར་སྤྱོད་པ་ཞེས་བྱའོ་སྙམ་མོ། །དེ་འདི་ལྟར་ཚུལ་བཞིན་སོ་སོར་རྟོག་སྟེ། །ལས་གང་ལུས་ཀྱིས་མ་བྱས་པ་དང་། ལས་གང་ངག་དང་། ཡིད་ཀྱིས་མ་བྱས་པ་དེ་ཅི་གདགས་པར་ནུས་སམ། དེ་འདི་ལྟར་ཚུལ་བཞིན་གྱིས། རྟོག་པ་ན་འདི་སྙམ་དུ་སེམས་ཏེ། ལས་གང་ལུས་ཀྱིས་མ་བྱས་པ་དང་། ལས་གང་ངག་དང་ཡིད་ཀྱིས་མ་བྱས་པ་དེ་སྔོན་པོ་འམ། སེར་པོ་འམ། དམར་པོ་འམ། དཀར་པོ་འམ། ལེབ་རྒན་ནམ། ཤེལ་གྱི་ཁ་དོག་ཏུ་གདགས་པར་མི་ནུས་ཏེ། མིག་གིས་ཤེས་པར་བྱ་བ་མ་ཡིན། རྣ་བས་ཤེས་པར་བྱ་བ་མ་ཡིན། སྣས་ཤེས་པར་བྱ་བ་མ་ཡིན། ལྕེས་ཤེས་པར་བྱ་བ་མ་ཡིན། ལུས་ཀྱིས་ཤེས་པར་བྱ་བ་མ་ཡིན། ཡིད་ཀྱིས་ཤེས་པར་བྱ་བ་མ་ཡིན་ནོ། །དེ་ཅིའི་ཕྱིར་ཞེ་ན། འདི་ལྟར་དེ་ནི་སྐྱེས་པ་མ་ཡིན། བསྐྱེད་པ་མ་ཡིན། བྱུང་བ་མ་ཡིན། ཟིན་པ་མ་ཡིན་ཏེ། དེ་ནི་ལས་གང་གིས་ཀྱང་ཤེས་པར་བྱ་བ་མ་ཡིན་ནོ། །དེ་འདི་སྙམ་དུ་སེམས་ཏེ། ཚུལ་ཁྲིམས་དེ་ནི། གང་མངོན་པར་འདུས་མ་བྱས་པའོ། །གང་མངོན་པར་འདུ་མི་བྱེད་པ་དེ་ལ་གདགས་པ་གང་ཡང་མེད་དོ། །གང་གདགས་པ་མེད་པ། དེ་ལ་བདག་མངོན་པར་ཆགས་པར་མི་བྱའོ་སྙམ་ནས། དེ་འདི་ལྟར་ལེགས་པར་སྤྱད་པའི་ཚུལ་ཁྲིམས་ཀྱང་ཡང་དག་པར་རྗེས་སུ་མི་མཐོང་། གང་གི་ཚུལ་ཁྲིམས་དེ་དང་། ཚུལ་ཁྲིམས་དེ་གང་དུ་བསྔོ་བ། དེ་ཡང་ཡང་དག་པར་རྗེས་སུ་མི་མཐོང་ངོ་། །དེ་དེ་ལྟར་མཐོང་བས། འཇིག་ཚོགས་ལ་ལྟ་བ་གང་གིས། ཚུལ་ཁྲིམས་སམ། འཆལ་པའི་ཚུལ་ཁྲིམས་ལ། སོ་སོར་རྟོག་པར་འགྱུར་བའི་འཇིག་ཚོགས་ལ་ལྟ་བ་མི་སློང་ངོ་། དེ་དེ་ལྟར་མཐོང་བས་སྡོམ་པ་དང་། ཆོ་ག་དང་། སྤྱོད་པ་དང་། སྤྱོད་ཡུལ་ཤེས་བཞིན་དུ་སྤྱོད་པར་འགྱུར་ཏེ། ཤེས་བཞིན་དུ་སྤྱོད་པས་ཚུལ་ཁྲིམས་དང་ལྡན་པ་ཞེས་བྱའོ། །དེ་བདག་ཏུ་དམིགས་ཤིང་མི་སྤྱོད། ཕ་རོལ་ཏུ་དམིགས་ཤིང་མི་སྤྱོད་དེ། དེ་ཚུལ་ཁྲིམས་མ་ཉམས་པ་དང་། ཚུལ་ཁྲིམས་མཆོག་ཏུ་མི་འཛིན་པ་ཡིན་ནོ། །བདག་ཏུ་དམིགས་ན་ཚུལ་ཁྲིམས་སུ་དམིགས་པར་འགྱུར་གྱི།