།བླ་ན་མེད་པའི་སངས་རྒྱས་མཆོག་འདོད་ཕྱིར། །དེ་ཕྱིར་སྦྱིན་པ་ཆུང་ཡང་དུ་མར་འགྱུར། །གྲགས་དང་བརྗོད་པ་དག་དང་སྒྲ་དག་དང་། །གཡོག་དང་བདེ་བ་ནམ་ཡང་མི་འདོད་ཅིང་། །འཆི་འཕོ་སྐྱེ་བ་ཀུན་ཀྱང་མི་འདོད་དེ། །དེ་ཕྱིར་སྦྱིན་ཉུང་འབྲས་བུ་ཆེན་པོར་འགྱུར། །ཟས་དང་སྐོམ་དང་ཆོས་གོས་གང་སྦྱིན་པ། །སྲིད་པའི་འགྲོ་བ་འདོད་ཕྱིར་མ་ཡིན་ཏེ། །སྦྱིན་པས་འཆི་བ་མེད་པའི་སྒོ་བཙལ་ཕྱིར། །དེ་ནི་སྐྲ་རྩེ་ཙམ་ཡང་སྦྱིན་པ་སྦྱིན། །འཕྱར་བ་མེད་ཅིང་ཁེངས་པ་མེད་པར་འགྱུར། །གཡོ་དང་སེར་སྣ་དག་ནི་ཐམས་ཅད་སྤོང་། །དེ་དག་ལེ་ལོ་ནམ་ཡང་ཡོད་མིན་ཏེ། དེ་ལྟར་དེ་དག་འཇིག་རྟེན་ཕན་ཕྱིར་སྤྲོ། །རྒྱལ་པོའི་སྲིད་དང་ནོར་དང་འབྲུ་སྲོག་གཏོང་། །དེ་དག་སེམས་ནི་གཞན་དུ་མི་འགྱུར་ཏེ། །བྱིན་ནས་དགའ་ཆེན་པོ་རྙེད་པར་འགྱུར། །སྦྱིན་ཞིང་གཏོང་ལ་བྱང་ཆུབ་རྙེད་མི་དཀའ། །ཕ་དང་མ་དང་བུ་ནི་སྡུག་པ་ལྟར། །སློང་དང་འཇིག་རྟེན་ཀུན་ལ་དེ་བཞིན་ཏེ། །གང་གིས་བྱང་ཆུབ་སྤྱོད་མཆོག་སྤྱད་པ་རྣམས། །སྦྱིན་ཚེ་རྟག་ཏུ་ཕྲག་དོག་མེད་པར་འགྱུར། །དེ་དག་མཐོང་ན་མི་ཁྲོ་སྟེ། །ཇི་ལྟར་སྔོན་གྱི་བཞིན་དུ་སྨྲ། །མི་མཛའ་དག་དང་རྟག་མཛའ་ཞིང་། །སྐྲག་པ་རྣམས་ལ་འཇིགས་མེད་སྦྱིན། །དེ་ལ་དངོས་པོ་གང་ཡོད་པ། །སློང་བ་ལ་ནི་སྲི་བ་མེད། །ཆོས་འདོད་པར་ནི་རྟག་འགྱུར་ཏེ། །རྒྱལ་སྲིད་འདོད་པར་མི་འགྱུར་རོ། །འབྱུང་བར་རྟག་ཏུ་སྨྲ་བྱེད་ཅིང་། །ཆོས་ཀྱི་སྦྱིན་པའང་སྦྱིན་པར་བྱེད། འདོད་ལ་བརྐམ་པ་མ་གཏོགས་པར། །སུ་ཞིག་རྒྱལ་སྲིད་འདོད་པར་འགྱུར། །འདོད་པའི་རྒྱལ་སྲིད་མི་འདོད་ཅིང་། །མཐོ་རིས་བདེ་བ་འདོད་མ་ཡིན། །སངས་རྒྱས་བྱང་ཆུབ་ཡོངས་ཚོལ་ཞིང་། །གྲགས་པ་ཆེན་པོ་སྦྱིན་པ་སྦྱིན། བདག་དང་ནོར་རྫས་གཞན་དག་ཀྱང་། །མང་པོ་མྱུར་དུ་གཏོང་བ་ནི། །དེ་དག་བྱང་ཆུབ་དམ་པའི་མཆོག །ནམ་ཡང་གཏོང་བར་མི་འགྱུར་རོ། །མཁས་པ་གཟུགས་ནི་མི་འདོད་དེ། །ལོངས་སྤྱོད་དག་ཀྱང་འདོད་མ་ཡིན། །མཐོ་རིས་དག་ཀྱང་དེ་མི་འདོད། །མྱ་ངན་འདའ་བའང་འདོད་མ་ཡིན། །ལམ་ཤེས་ལམ་ལ་མཁས་པ་དག །གང་དག་བཤེས་པར་གྱུར་པ་ལ། །བརྟེན་པ་དག་ཏུ་མི་བྱེད་དེ། །སྲིད་པ་མེད་པ་འདོད་པར་འགྱུར།