ཆོས་ཉན་པས་ཡོངས་སུ་མི་སྐྱོ་ཞིང་དགའ་བ་དང་། ཆོས་ཀྱི་ཕྱིར་འབྲང་བའི་ནན་ཏན་ལ་རབ་ཏུ་དགའ་བ་དང་། རབ་ཏུ་དགའ་བའི་ཆོས་ལ་མགུ་བ་དང་། སེམས་ཅན་རྣམས་ལ་ཁོང་ཁྲོ་བ་མེད་པ་དང་། བྱང་ཆུབ་ལ་དགའ་བ་དང་། ཆོས་རྒྱ་ཆེན་པོ་ལ་མོས་པ་དང་། ཉི་ཚེ་བའི་ཐེག་པ་སེལ་བར་སེམས་བསྐྱེད་པ་དང་། སེར་སྣ་ཚར་གཅོད་པ་དང་། སློང་བ་ལ་དགའ་བ་དང་། གཏོང་བ་ལ་རབ་ཏུ་དགའ་བ་དང་། ཚུལ་ཁྲིམས་འཆལ་པ་དག་སྡུད་ཅིང་བྱམས་པ་དང་། ཚུལ་ཁྲིམས་དང་ལྡན་པ་ལ་རྟག་ཏུ་དད་པ་དང་། བདག་གི་ཚུལ་ཁྲིམས་ཡོངས་སུ་དག་པས་ངན་འགྲོ་དང་། འཇིགས་པ་ཐམས་ཅད་ལས་རབ་ཏུ་འདའ་བར་དབུགས་འབྱིན་པ་ལ་རབ་ཏུ་དགའ་བ་དང་། ཕ་རོལ་ངན་དུ་ཟེར་བ་དང་། ངན་པར་བརྗོད་པའི་ཚིག་གི་ལམ་བཟོད་ཅིང་རབ་ཏུ་དགའ་བ་དང་། ལག་པ་དང་། རྐང་པ་དང་། མིག་དང་མགོ་བཅད་ཀྱང་བཟོད་པར་ནུས་ཏེ། སེམས་མི་ཉམས་ཤིང་རབ་ཏུ་དགའ་བ་དང་། རྒན་རབས་ལ་འདུད་ཅིང་ཞེས་བྱེད་པ་ལ་དགའ་བ་དང་། རྟག་ཏུ་བཞིན་འཛུམ་པ་ལ་དགའ་བ་དང་། ཁྲོ་གཉེར་མེད་ཅིང་གསོང་པོར་སྨྲ་བ་ལ་དགའ་བ་དང་། ཚུལ་འཆོས་པ་དང་། ཁ་གསག་དང་། གཞོགས་སློང་མེད་པ་ལ་རབ་ཏུ་དགའ་བ་དང་། སྙིང་པོ་དང་ལྡན་པའི་ཆོས་ལ་འཇུག་པར་རབ་ཏུ་དགའ་བ་དང་། བྱང་ཆུབ་སེམས་དཔའ་ལ་སྟོན་པ་བཞིན་དུ་ཕངས་པ་དང་། ཆོས་ལ་བདག་བཞིན་དུ་ཕངས་པ་དང་། དེ་བཞིན་གཤེགས་པ་ལ་སྲོག་བཞིན་དུ་ཕངས་པ་དང་བླ་མ་ལ་ཕ་མ་བཞིན་དུ་ཕངས་པ་དང་། སེམས་ཅན་ཐམས་ཅད་ལ་བུ་བཞིན་དུ་ཕངས་པ་དང་། སློབ་དཔོན་ལ་མིག་བཞིན་དུ་ཕངས་པ་དང་། ནན་ཏན་ལ་ཡན་ལག་གི་དམ་པ་མགོ་བཞིན་དུ་ཕངས་པ་དང་། ཕ་རོལ་ཏུ་ཕྱིན་པ་ལ་ལག་པ་དང་། རྐང་པ་བཞིན་དུ་ཕངས་པ་དང་། ཆོས་སྨྲ་བ་ལ་རིན་པོ་ཆེ་ཐམས་ཅད་བཞིན་དུ་ཕངས་པ་དང་། ཆོས་ཡོངས་སུ་ཚོལ་བ་ལ་སྨན་བཞིན་དུ་ཕངས་པ་དང་། སྐུལ་ཞིང་དྲན་པར་བྱེད་པ་ལ་སྨན་པ་བཞིན་དུ་ཕངས་པར་སེམས་པའོ། །གཞོན་ནུ་འདི་ནི་དགའ་བ་ཞེས་བྱ་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་དགའ་བ་དེ་ལ་རབ་ཏུ་གནས་ནས་རྟག་ཏུ་ཆོས་ཚོལ་བ་ལ་དགའ་བར་འགྱུར་ཏེ།