སྲེད་པའི་རྩ་བ་ལས་བྱུང་བའི་ཆོས་བཅུ་པོ་དག་གིས་རྩ་བའི་གནས་ལ་རབ་ཏུ་གནས་པར་མཐོང་སྟེ། བཅུ་གང་ཞེ་ན། འདི་ལྟ་སྟེ། སྲེད་པ་ལ་བརྟེན་ནས་ཀུན་ཏུ་འཚོལ་བ་དང་། ཀུན་ཏུ་ཚོལ་བ་ལ་བརྟེན་ནས་རྙེད་པ་དང་། རྙེད་པ་ལ་བརྟེན་ནས་ང་ཡིར་འཛིན་པ་དང་། ང་ཡིར་འཛིན་པ་ལ་བརྟེན་ནས་རྣམ་པར་ངེས་པ་དང་། རྣམ་པར་གདོན་མི་ཟ་བ་ལ་བརྟེན་ནས་འདུན་པའི་འདོད་ཆགས་དང་། འདུན་པའི་འདོད་ཆགས་ལ་བརྟེན་ནས་ལྷག་པར་ཆགས་པ་དང་། ལྷག་པར་ཆགས་པ་ལ་བརྟེན་ནས་སེར་སྣ་དང་། སེར་སྣ་ལ་བརྟེན་ནས་ཡོངས་སུ་འཛིན་པ་དང་། ཡོངས་སུ་འཛིན་པ་ལ་བརྟེན་ནས་ཡོངས་སུ་སྲུང་བ་དང་། ཡོངས་སུ་སྲུང་བ་ལ་བརྟེན་ནས་སྡུག་བསྔལ་བ་སྟེ། ཡོངས་སུ་སྲུང་བའི་གཞི་ལས་དབྱིག་པ་ཐོགས་པ་དང་། མཚོན་ཆ་ཐོགས་པ་དང་། འཐབ་པ་དང་། མཚང་འདྲུ་བ་དང་། འགྱེད་པ་དང་། རྩོད་པ་རྣམས་འབྱུང་ངོ་། །དེའི་ཕྱིར་ཕྲ་མ་ལ་སོགས་པ་སྡིག་པ་མི་དགེ་བའི་ཆོས་རྣམ་པ་མང་པོ་འབྱུང་བར་འགྱུར་ཏེ་ཁྱིམ་བདག་སྲེད་པའི་རྩ་བ་ལས་བྱུང་བའི་ཆོས་བཅུ་པོ་དེ་དག་གིས་འཇིག་རྟེན་གནས་པ་རབ་ཏུ་གནས་པར་མཐོང་ནས་རྩ་བ་མེད་པ་གནས་མེད་པའི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་པར་བྱའོ། །ཞེས་དད་པས་ཁྱིམ་ནས་ཁྱིམ་མེད་པར་རབ་ཏུ་བྱུང་ངོ་། །འདི་ལ་ཆོས་ཉིད་ནི་འདི་ཡིན་ཏེ། དེ་ལ་འདི་སྐད་ཅེས་བྱའོ། །སྲེད་པས་མིད་པའི་སེམས་ཅན་རྣམས། །འདི་ནས་འདི་ནི་ཀུན་ཏུ་ཚོལ། །རྙེད་པ་རྙེད་ནས་ང་ཡིར་འཛིན། །དེ་ལས་རྣམ་པར་ངེས་པར་འགྱུར། །བྱ་བ་འདི་དག་བྱའོ་ཞེས། །འདུན་པའི་འདོད་ཆགས་རབ་ཏུ་འཕེལ། །འདུན་པའི་འདོད་ཆགས་འཕེལ་བས་ན། །ལྷག་པར་ཆགས་ཕྱིར་སེར་སྣ་འགྱུར། །སེར་སྣའི་ཉེས་པས་འཇིག་རྟེན་ན། །ཀུན་ཏུ་འཛིན་པ་སྲ་བར་འགྱུར། །ཡོངས་སུ་འཛིན་པས་ཀུན་སྲུང་བ། །རྒྱུན་མི་འཆད་པར་འབྱུང་བར་འགྱུར། །བྱིས་པ་ཀུན་ཏུ་བསྲུང་བའི་ཕྱིར། །དབྱིག་པ་དང་ནི་མཚོན་འདེབས་ཤིང་། །སྡིག་པ་ཐམས་ཅད་བྱེད་པས་ན། །དེ་ལས་སྡུག་བསྔལ་འཕེལ་བར་འགྱུར། །སྲེད་པའི་གཞི་ལས་སྡུག་བསྔལ་ཀུན། །ཤིན་ཏུ་འབྱུང་བར་མཐོང་བས་ན། །རྩ་བ་མེད་ཅིང་གནས་མེད་པའི། །བྱང་ཆུབ་དམ་པ་རྟོགས་པར་འདོད། །གཞན་ཡང་ཀྱེ་མའོ་ཁྱིམ་བདག་འཇིག་རྟེན་གནས་པ་འདི་ནི་ལོག་པའི་ཆོས་བཅུས་ལོག་པ་ཉིད་དུ་ངེས་པར་མཐོང་སྟེ།