།རྫུ་འཕྲུལ་དག་ནི་ཐོས་གྱུར་ན། །མོས་པ་དག་ནི་སྐྱེ་འགྱུར་ཞིང་། །ངོ་མཚར་འཛིན་པའི་སེམས་ཀྱང་སྐྱེད། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །དེ་ལྟ་བུ་ལ་སོགས་པ་ཡི། །རྫུ་འཕྲུལ་སྣ་ཚོགས་རབ་བསྟན་པས། །སེམས་ཅན་དག་ནི་བརྒྱ་སྟོང་དང་། །ཚད་མེད་གྲངས་མེད་པ་རྣམས་ཀྱིས། །དེ་བཞིན་གཤེགས་པ་རྣམས་ལ་ནི། །བསྟེན་ཅིང་རིམ་གྲོ་མཆོད་པ་བྱས། །ལྷ་དང་མི་ནི་འདྲེན་པ་ཡིས། །བསམ་གྱིས་མི་ཁྱབ་མཐུ་དག་གིས། །མདོ་སྡེ་དག་ནི་བརྒྱ་སྟོང་དང་། །ཚད་མེད་གྲངས་མེད་རབ་བཤད་པས། །སེམས་ཅན་དག་ནི་མང་པོ་རྣམས། །བསྟན་པ་དེ་ནི་ཐོས་པས་ན། །ཐམས་ཅད་དང་བས་རབ་བླངས་ཏེ། །སེམས་ནི་རབ་ཏུ་དགའ་བར་གྱུར། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །རྫུ་འཕྲུལ་གྱི་ནི་མཐུ་དག་གིས། །ནམ་མཁའ་ལས་ནི་འདི་སྐད་དུ། །མིག་ཟད་མཐའ་ནི་ཤེས་པ་ནས། །ལྷ་མིག་ནི་ཉེ་བར་ཞི་བ་དང་། །མིག་ཉིད་རྒྱུ་ཡི་བར་དུ་ཡང་། །འགྲོ་བ་མེད་ཅིང་འོང་མེད་དང་། །མཐར་ནི་སྟོང་དབེན་ཤེས་པར་གྱིས། །དེ་སྐད་དུ་ནི་ཐོས་པར་གྱུར། །རྣ་བ་སྣ་ལྕེ་ལུས་ནས་ནི། །སྒྲ་དང་མིང་ལ་སོགས་པའི་བར། །ཆོས་ནི་རྣམ་པ་ཉི་ཤུ་ལྔ། །ཐམས་ཅད་དེ་བཞིན་སྦྱར་བར་བྱ། །དེ་ཡི་ཚེ་ན་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །སྒྲ་སྙན་དམ་པ་མཆོག་བྱུང་ནས། །དེ་བཞིན་གཤེགས་པའི་མཚན་སྣ་ཚོགས། །བསྔགས་པ་བརྗོད་པར་གྱུར་པས་ན། །འཁོར་ནི་འདུས་པ་ཆེན་པོ་རྣམས། །ཐམས་ཅད་དད་མོས་སེམས་ཀྱང་སྐྱེས། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་བདུད་དང་བདུད་དཔུང་དག །ཕམ་མཛད་ཆོས་ཀྱི་རྒྱལ་ཞེས་བྱ། །གང་གིས་འདི་ལྟ་བུ་ཡི་མཚན། །ཐོས་པར་གྱུར་པ་དེ་དག་ནི། །ལོག་པར་ལྟ་བའི་ཚོགས་ཐམས་ཅད། །རབ་ཏུ་འདུལ་བར་ནུས་ཤེས་ཟེར། །ད་ལྟར་འཇིག་རྟེན་བཞུགས་པ་ཡི། །མི་ཡི་སེང་གེ་གང་ཡིན་པ། །མཚན་ནི་འདོད་ཆགས་གཞོམ་པ་དང་། །ཞི་མཛད་ཆོས་ཀྱི་རྒྱལ་ཞེས་བྱ།