ཞབས་ནི་ས་ལ་རེག་ཙམ་གྱིས། །ས་ནི་ཀུན་ཏུ་རབ་ཏུ་གཡོས། །རི་རྣམས་གང་ཡིན་དེ་དག་ཀྱང་། །ཐམས་ཅད་བཅོམ་ལྡན་འདས་ལ་ཕྱོགས། །ལྷ་དང་མི་ནི་ཆོས་ཀྱི་ཕྱིར། །ཐམས་ཅད་འོངས་ནས་གུས་མཆོད་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ལྷ་ཡི་དབང་པོ་མི་ཡི་རྒྱལ། །ལྷ་མ་ཡིན་ནི་མང་པོ་དང་། །གནོད་སྦྱིན་དག་ནི་མང་པོ་རྣམས། །རང་གི་གྲོང་ཁྱེར་སྤངས་ནས་ནི། །བཅོམ་ལྡན་སྤྱན་སྔར་འདུས་གྱུར་ཏེ། །རབ་ཏུ་དགའ་བས་མཆོད་པ་བྱས། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །གཞན་ཡང་རྣམ་པ་ཐ་དད་པའི། །བྱ་ཡི་ཚོགས་ནི་ཚད་མེད་པ། །ནེ་ཙོ་དང་ནི་རྨ་བྱ་དང་། །ཀ་ལ་པིང་ཀ་བྱ་ཡི་རྣམས། །བཅོམ་ལྡན་དེ་བཞིན་གཤེགས་པ་ཡི། །ཡོན་ཏན་མཆོག་ནི་མཐོང་བས་ན། །ཐམས་ཅད་ནམ་མཁའ་དག་ལ་ནི། །རབ་ཏུ་དགའ་བས་རྣམ་པར་རྩེ། །ཐམས་ཅད་རྣམ་པ་སྣ་ཚོགས་ཀྱི། །སྒྲ་སྙན་དག་ནི་རབ་ཏུ་ཕྱུང་། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །བཅོམ་ལྡན་འདས་ཀྱི་ཡོན་ཏན་དང་། །རྫུ་འཕྲུལ་གྱི་ནི་སྟོབས་དག་གིས། །སེམས་ཅན་ཚད་མེད་བརྒྱ་སྟོང་སྙེད། །ལྡོངས་པ་དག་ནི་མཐོང་བར་གྱུར། །འོན་པ་རྣམས་ནི་ཐོས་པར་གྱུར། །དབང་པོ་མ་ཚང་གང་ཡིན་པ། །ཐམས་ཅད་དབང་པོ་ཚང་བར་གྱུར། །སྡུག་བསྔལ་ལ་ནི་གནས་པ་དག །ཐམས་ཅད་བདེ་བ་ཐོབ་པར་གྱུར། །དེ་ནས་དེ་ཚེ་བཅོམ་ལྡན་འདས། །གྲོང་ཁྱེར་དུ་ནི་གཤེགས་པའི་ཚེ། །ནམ་མཁའ་བར་སྣང་དག་ལས་ནི། །འདི་སྐད་སྨྲ་བ་ཐོས་པར་གྱུར། །གང་གིས་མཚན་མ་རྣམས་ཀྱིས་ནི། །དེ་བཞིན་གཤེགས་པ་རྟོགས་བྱེད་པ། །དེ་ཡིས་བཅོམ་ལྡན་འདས་ལ་ནི། །མཆོད་པ་བྱས་ཞེས་བརྗོད་མི་བྱ། །མིག་ཟད་མཐའ་ཡི་ངོ་བོ་ཉིད། །རྟོགས་པར་ཡང་ནི་མི་འགྱུར་རོ། །མཚན་མ་རྣམས་ནི་གང་སྤངས་པ། །ཡོན་ཏན་བཞི་ནི་བསགས་པས་ན། །མིག་ཟད་མཐའ་ཡི་ངོ་བོ་ཉིད། །རབ་ཏུ་རྟོགས་པར་ཡང་འགྱུར་རོ། །འདི་ལྟར་མིག་ནི་ཟད་པའི་མཐའ། །རབ་ཏུ་རྟོགས་པར་གྱུར་པའི་ཕྱིར། །སངས་རྒྱས་རྣམས་ཀྱི་ཡོན་ཏན་ཡང་། །རབ་ཏུ་རྟོགས་པར་ཁོང་དུ་ཆུད།