Degé Kangyur volume 40, F.224.b

སངས་རྒྱས་ཡོན་ཏན་བསྔགས་བརྗོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ཀླུ་ཡི་རྒྱལ་པོ་བརྒྱ་སྟོང་དག །​རབ་ཏུ་གདུག་ཅིང་འཇིགས་རུང་བ། །​སངས་རྒྱས་མཐོང་ན་དགའ་བ་ཡང་། །​ཐམས་ཅད་བཟོད་མཆོག་སྟོབས་ལས་བྱུང་། །​སྲིན་པོ་གནོད་སྦྱིན་ལ་སོགས་པས། །​མེ་ཏོག་ཕྲེང་བ་བརྒྱ་སྟོང་ཐོགས། །​འོངས་ནས་ང་ལ་མཆོད་བྱེད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ཞིང་ནི་བརྒྱ་སྟོང་ཚད་མེད་པར། །​བཞུགས་པའི་དེ་བཞིན་གཤེགས་པ་རྣམས། །​ང་ཡི་ཡོན་ཏན་བསྔགས་པ་ཡང་། །​ཐམས་ཅད་བཟོད་མཆོག་སྟོབས་ལས་བྱུང་། །​ལྟོ་འཕྱེ་དང་ནི་ལུས་སྲུལ་པོ། །​བརྒྱ་སྟོང་དག་ནི་འདུས་གྱུར་ནས། །​མེ་ཏོག་གཏོར་ནས་ང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​གནོད་སྦྱིན་རྒྱལ་པོ་ལ་སོགས་པ། །​བྱེ་བ་བརྒྱ་ཕྲག་དྲུག་ཅུ་རྣམས། །​འོངས་ནས་ང་ལ་གང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​གཞན་ཡང་ཀླུ་ཡི་རྒྱལ་པོ་ནི། །​མ་ན་བ་ག་ལ་སོགས་པས། །​མུ་ཏིག་དམར་པོས་ང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​དུ་མུ་རུ་དང་ཤི་ཁྱི་བའི། །​བརྒྱ་སྟོང་སྙེད་ནི་འདུས་གྱུར་ནས། །​རོལ་མོ་དག་གིས་ང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ལྟོ་འཕྱེ་དང་ནི་ལུས་སྲུལ་པོ། །​བརྒྱ་སྟོང་སྙེད་ནི་འདུས་གྱུར་ནས། །​མེ་ཏོག་སྤོས་ཀྱིས་ང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ས་ཆེན་འཛིན་པ་ཀླུ་ཡི་རྒྱལ། །​ལུས་ཕྱེད་དག་ནི་རབ་བསྟན་ནས། །​ཐལ་སྦྱར་ང་ལ་གུས་པ་ཡང་། །​ཐམས་ཅད་བཟོད་མཆོག་སྟོབས་ལས་བྱུང་། །​ལུས་མེད་སྒྲ་གཅན་ཟིན་ལ་སོགས། །​བྱེ་བ་ཕྲག་ནི་བརྒྱ་སྟོང་རྣམས། །​དང་བའི་སེམས་ཀྱིས་ང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​གཞོན་ནུ་ཁྱོད་ཀྱིས་འདི་ལྟར་ལྟོས། །​སངས་རྒྱས་འོད་ཟེར་གང་རེག་པ། །​སྡུག་བསྔལ་བྲལ་ནས་བདེ་ཐོབ་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ས་མུ་ཏ་དང་རླུང་གི་ལྷ། །​བརྒྱ་སྟོང་ནམ་མཁའ་གང་བར་ནི། །​སྤོས་ཀྱི་ཆར་ཕབ་ང་མཆོད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ལྷ་ཡི་འཁོར་ནི་བརྒྱ་སྟོང་དག །​ལྷ་ཡི་མེ་ཏོག་གཏོར་མཆོད་དེ། །​སྲེད་སྤངས་སངས་རྒྱས་སྟེན་བྱེད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ཁྱེད་ཀྱིས་སངས་རྒྱས་རྫུ་འཕྲུལ་དང་། །​སྦྱིན་དང་ཚུལ་ཁྲིམས་སྒྲ་བསྒྲགས་ནས། །​ཐམས་ཅད་ཀུན་དུ་ཐོས་མཛད་པ། །​བཟོད་མཆོག་སྟོབས་ལས་བྱུང་བར་ལྟོས། །​ཕུང་པོ་ཁམས་ཀྱི་སྒྲ་དག་དང་། །​བདེན་པ་བཞི་ཡི་སྒྲ་དག་གིས། །​ཐམས་ཅད་ཀུན་ནི་གོ་མཛད་པ། །​ཐམས་ཅད་བཟོད་མཆོག་སྟོབས་ལས་བྱུང་། །​ང་ཡི་རྫུ་འཕྲུལ་སྟོབས་ཀྱིས་ནི།



The English translation of this folio by 84000 - Translating the words of the Buddha can be found at:
https://read.84000.co/translation/toh55.html?part=UT22084-040-006-1763#UT22084-040-006-1763