Degé Kangyur volume 40, F.210.a

འཁོར་བཞི་པོ་དག་ལ་རྗེས་སུ་སྟོན་པར་བྱེད་པ་དང་། འཇིག་རྟེན་པའི་བསམ་པ་ཡོངས་སུ་བཅད་པ་དང་། འཇིག་རྟེན་ཕྱི་མའི་ཆོས་མེད་དོ་ཞེས་ཟེར་བའི་ལོག་པར་ལྟ་བ་རྣམས་སྤངས་པ་དང་། ད་དུང་མ་བསླབས་པ་དག་ལ་གྱ་གྱུའི་མཚན་མ་མི་སྟོན་པ་དང་། གང་བསླབ་པར་འདོད་པ་དག་ལ་ཅི་ནུས་ཀྱིས་རྣམ་པར་ཕྱེ་ནས་རབ་ཏུ་སྟོན་པ་དང་། གླུ་དང་རོལ་མོའི་སྒྲ་དག་གི་བསྔགས་པ་མི་བརྗོད་པ་དང་། རྒྱན་དང་ཡོ་བྱད་ཀྱི་བསྔགས་པ་མི་བརྗོད་པ་དང་། བདེན་པ་རྣམས་ལ་ཡང་དག་པར་ཞུགས་པ་དང་། མང་དུ་ཐོས་པ་ཕུན་སུམ་ཚོགས་པ་དང་། གཉིད་རབ་ཏུ་སྤངས་པ་དང་། ཡང་དག་པའི་ཆོས་ཡོངས་སུ་ཚོལ་བ་ལ་རབ་ཏུ་བརྩོན་པ་དང་། སངས་རྒྱས་ལ་གུས་པ་དང་། བྱང་ཆུབ་ཏུ་སེམས་བསྐྱེད་པ་དང་། འཇིག་རྟེན་པའི་ལས་ཡོངས་སུ་སྤངས་པ་དང་། བསླབ་པའི་གནས་རྣམས་ལ་ཡང་དག་པར་བརྩོན་པ་དང་། ཆོས་ལ་སྲེད་པའི་ཕྱིར་གྲོགས་ཁྱད་པར་ཅན་ལ་རྟེན་པར་བྱེད་པ་དང་། དགེ་བའི་རྩ་བ་རྣམས་ཡོངས་སུ་ཚོལ་བ་ལ་སྐྱོ་བ་མེད་པ་དང་། རབ་ཏུ་འབྱུང་བ་ལ་ཤིན་ཏུ་མོས་པ་དང་། སངས་རྒྱས་ཀྱི་ཆོས་སྲུང་ཞིང་ཡོངས་སུ་འཛིན་པར་བྱེད་པ་དང་། སྡིག་པའི་ལས་མི་སློང་བ་དང་། བསྟན་པ་རྣམས་ལ་ཐེ་ཚོམ་མེད་པ་དང་། དཔེས་སྟོན་པ་ལ་རབ་ཏུ་མཁས་པ་དང་། གསང་བ་རྣམས་རྣམ་པར་ཕྱེ་ནས་སྟོན་པར་བྱེད་པ་དང་། བྱང་ཆུབ་ཆེན་པོ་ཡོངས་སུ་ཚོལ་བ་ལ་ངལ་བ་མེད་པ་དང་། མདོ་སྡེ་ཡང་དག་པར་བཟུང་བ་རྣམས་བརྗེད་པར་མི་བྱེད་པ་དང་། རང་གི་བསླབ་པ་མི་སྤོང་བ་དང་། ཕ་རོལ་གྱི་སྨྲ་བ་རྣམས་ཚར་གཅོད་པ་དང་། ངེས་པར་འབྱུང་བའི་ལམ་ཡོངས་སུ་ཚོལ་བ་དང་། སྤྱོད་པ་ཚད་མེད་པ་རྣམས་མངོན་པར་སྒྲུབ་པ་དང་། ཆོས་ཀྱི་ཡེ་ཤེས་དེ་དག་ལ་སེམས་ངེས་པར་གྱུར་པ་དང་། རྒྱུ་དང་འབྲས་བུ་གསལ་བར་མཐོང་ཞིང་འཁོར་བའི་རྒྱུན་མི་གཅོད་པ་དང་། སྲིད་པ་གསུམ་པོ་དག་ལ་ཆགས་པ་མེད་པ་དང་། མངོན་པའི་ང་རྒྱལ་སྤངས་པ་དང་། མངོན་པར་ཡིད་ཆེས་པ་དག་ལ་གཉེན་པོ་རྣམ་པར་གཞག་པ་དག་སྟོན་པར་བྱེད་པ་དང་། མ་འོངས་པའི་འབྲས་བུ་རྣམ་པར་སྨིན་པའི་བྱེ་བྲག་རྟོགས་པར་ཁོང་དུ་ཆུད་པ་དང་། སྔོན་གྱི་མཐའ་ཡོངས་སུ་ལེགས་པར་ཤེས་པ་དང་། གཞན་གྱི་དྲིང་ལ་མི་ལྟོས་བ་དང་། ཡོངས་སུ་སྤོང་བའི་སྤྱོད་པ་དག་ལ་བརྩོན་འགྲུས་ཀྱིས་གྲུབ་པར་བྱེད་པ་དང་།



The English translation of this folio by 84000 - Translating the words of the Buddha can be found at:
https://read.84000.co/translation/toh55.html?part=UT22084-040-006-1734#UT22084-040-006-1734