སྔོན་གྱི་མཐའ་དང་ཕྱི་མའི་མཐའི་རྒྱུ་མི་ཤེས་པ་དང་། སྐྱེ་ཤི་མི་ཤེས་པ་དང་། སྐྱེ་ཤིའི་རྒྱུ་མི་ཤེས་པ་དང་། ཟག་པ་དང་བཅས་པ་མི་ཤེས་པ་དང་། ཟག་པ་དང་བཅས་པའི་རྒྱུ་མི་ཤེས་པ་དང་། ཟད་པ་དང་ཟད་པ་མ་ཡིན་པ་མི་ཤེས་པ་དང་། ཡོད་པ་དང་ཡོད་པ་མ་ཡིན་པ་མི་ཤེས་པ་དང་། མཐའ་དང་མཐའ་མ་ཡིན་པ་མི་ཤེས་པ་དང་། དབེན་པ་དང་དབེན་པ་མ་ཡིན་པ་མི་ཤེས་པ་དང་། འཇུག་པ་དང་འཇུག་པ་མ་ཡིན་པ་མི་ཤེས་པ་དང་། ངོ་བོ་ཉིད་དང་ངོ་བོ་ཉིད་མ་ཡིན་པ་མི་ཤེས་པ་དང་། སྐྱེ་བ་དང་སྐྱེ་བ་མ་ཡིན་པ་མི་ཤེས་པ་དང་། འགག་པ་དང་འགག་པ་མ་ཡིན་པ་མི་ཤེས་པ་གང་ཡིན་པ་སྟེ། གཞོན་ནུ་རིགས་ཀྱི་བུའམ། རིགས་ཀྱི་བུ་མོ་གང་ལ་ལ་ཞིག་གོང་དུ་ཇི་སྐད་དུ་བསྟན་པའི་གཟུངས་མངོན་པར་བསྒྲུབ་པར་འདོད་པས་ཆོས་མ་ཡིན་པ་སྤྱོད་པའི་གང་ཟག་བརྒྱད་ཅུ་པོ་འདི་དག་ཡོངས་སུ་སྤང་བར་བྱའོ། །དེ་ནས་བཅོམ་ལྡན་འདས་ཀྱིས་ཡང་ཚིགས་སུ་བཅད་དེ་བཀའ་སྩལ་པ། གང་ཞིག་མིག་གི་སྐྱེ་མཐའ་དང་། །ཟད་མཐའ་དག་ནི་མི་རྟོགས་པ། །དེ་ནི་ཀུན་འཛིན་ལ་རྨོངས་པས། །མཁས་པས་ཡོངས་སུ་སྤང་བར་བྱ། །གང་ཞིག་མིག་ལ་བདག་མེད་དང་། །སེམས་ཅན་མེད་པར་རྟོགས་གྱུར་པ། །དེས་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་སྐྱེ་ཟད་དང་། །ཡི་གེ་སྤངས་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་དབེན་པ་དང་། །གནས་པ་མེད་པར་རྟོགས་གྱུར་བ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་གི་རང་བཞིན་ཉིད། །གནས་པ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ལ་འཇུག་མེད་དང་། །གཟུགས་ཀྱི་མཚན་ཉིད་མེད་རྟོགས་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ལ་སྐྱེ་མེད་དང་། །རང་བཞིན་ཞི་བར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ། །གང་ཞིག་མིག་ནི་རང་བཞིན་གྱིས། །མིག་གི་མཚན་ཉིད་སྤངས་པས་ན། །སངས་རྒྱས་རྣམས་ཀྱིས་བསྔགས་པ་དང་། །བསྟན་དུ་མེད་པར་རྟོགས་གྱུར་པ། །དེ་ནི་ཀུན་འཛིན་ལ་གནས་པས། །མཁས་པས་ཡོངས་སུ་བསྟེན་པར་བྱ།