Degé Kangyur volume 40, F.163.b

དཔེར་བགྱི་ན་བསྲེག་པའི་བསྐལ་པ་བྱུང་བར་གྱུར་པ་ན་ནམ་མཁའི་ཁམས་མི་ཚིག་པར་བགྱི་བའི་སླད་དུ་བྱིན་གྱིས་བརླབ་པར་བགྱི་མི་འཚལ་བ་དེ་བཞིན་དུ་བཅོམ་ལྡན་འདས་ཆོས་ཐམས་ཅད་ཀྱང་ནམ་མཁའི་ཁམས་ཀྱི་རང་བཞིན་ལགས་པས་དེ་དག་ལ་ནི་སྐྱེ་བ་ཡང་མི་མངོན། འགག་པ་ཡང་མི་མངོན་ལགས་ཏེ། གང་ལ་སྐྱེ་བ་མ་མཆིས་ཤིང་འགག་པ་མ་མཆིས་པ་དེ་ལ་ནི་བྱིན་གྱིས་བརླབས་ཀྱི་རང་བཞིན་ཅི་ཡང་མ་མཆིས་ལགས་སོ། །​བཅོམ་ལྡན་འདས་ཆོས་ཐམས་ཅད་ནི་བྱིན་གྱིས་བརླབས་མ་མཆིས་པ་ལགས་པས་དེ་དག་གི་ངོ་བོ་ཉིད་གང་ལགས་པ་དེ་ཉིད་བྱིན་གྱིས་བརླབས་ལགས་སོ། །​བཅོམ་ལྡན་འདས་འོན་དུ་ལགས་ཀྱིས་ཀྱང་གང་དག་ཆོས་ལ་གུས་ཤིང་ཆོས་ལས་ངེས་པར་བྱུང་ལ་མདོ་སྡེ་ཟབ་མོ་འདི་ལྟ་བུ་འདི་ནོད་པར་འགྱུར་བའི་རིགས་ཀྱི་བུ་དང་། རིགས་ཀྱི་བུ་མོ་དགེ་བའི་རྩ་བ་སྐྱེད་པ་དེ་དག་གི་སླད་དུ་དེ་བཞིན་གཤེགས་པ་ཉིད་ཀྱིས་ཆོས་ཀྱི་རྣམ་གྲངས་འདི་བྱིན་གྱིས་བརླབ་ཏུ་གསོལ། བཅོམ་ལྡན་འདས་ཅི་ནས་ཀྱང་བདུད་དང་། ཕྱིར་རྒོལ་བ་ངེས་པར་བཅོམ་ཞིང་བར་ཆད་མ་མཆིས་པ་དང་། མ་འོངས་པའི་དུས་ན་འཛམ་བུའི་གླིང་ན་སྤྱོད་པར་འགྱུར་བ་དེ་ལྟ་དེ་ལྟར་བཅོམ་ལྡན་འདས་ཀྱིས་འདི་བྱིན་གྱིས་བརླབ་ཏུ་གསོལ། དེ་ནས་དེའི་ཚེ་བཅོམ་ལྡན་འདས་ཀྱིས་གང་གིས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་འོད་གསེར་གྱི་ཁ་དོག་ལྟ་བུས་སྣང་བར་འགྱུར་བ་དེ་ལྟ་བུའི་འོད་དག་སྐུ་ལས་རབ་ཏུ་ཕྱུང་ངོ་། །​དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་བཀའ་སྩལ་པ། འཇམ་དཔལ་ཇི་ལྟར་དེ་བཞིན་གཤེགས་པའི་འོད་འདི་ཐམས་ཅད་དུ་རྗེས་སུ་སོང་བ་དེ་བཞིན་དུ་ཆོས་ཀྱི་རྣམ་གྲངས་འདི་ཡང་སངས་རྒྱས་ཀྱི་ཆོས་ལ་ཤེས་པ་དང་། བསམ་པ་མ་ཉམས་པའི་རིགས་ཀྱི་བུ་དང་། རིགས་ཀྱི་བུ་མོ་དེ་དག་གི་ལག་ཏུ་འོང་བར་འགྱུར་རོ། །​དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག །​ཆོངས་ཤིག །​ལྷོགས་ཤིག །​ཀུན་ཆུབ་པར་གྱིས་ཤིག །​གཞན་དག་ལ་ཡང་རྒྱ་ཆེར་རབ་ཏུ་སྟོན་ཅིག་དང་། དེ་ལྟ་ན་ཁྱོད་ཀྱིས་འདས་པ་དང་། མ་བྱོན་པ་དང་། ད་ལྟར་བྱུང་བའི་སངས་རྒྱས་བཅོམ་ལྡན་འདས་རྣམས་ལ་ཡང་མཆོད་པ་བྱས་པར་འགྱུར་རོ།



The English translation of this folio by 84000 - Translating the words of the Buddha can be found at:
https://read.84000.co/translation/toh52.html?part=UT22084-040-003-365#UT22084-040-003-365