།ཤཱ་རིའི་བུ་དེ་བཞིན་གཤེགས་པས་སྤྲུལ་པ་གང་ཡིན་པ་དེ་དག་གི་རྒྱབ་ན་ཡང་འདིའི་བྱིན་གྱི་རླབས་ཀྱིས་གསང་བ་པའི་བདག་པོ་ལག་ན་རྡོ་རྗེ་གནས་ཏེ། ཤཱ་རིའི་བུ་གསང་བ་པའི་བདག་པོ་ལག་ན་རྡོ་རྗེ་ནི་དེ་ལྟར་ཡེ་ཤེས་དང་མངོན་པར་ཤེས་པའི་བྱིན་གྱི་རླབས་ཀྱི་སྟོབས་དང་ལྡན་ནོ། །གསང་བ་པའི་བདག་པོ་ལག་ན་རྡོ་རྗེའི་ཡོན་ཏན་ཡོངས་སུ་བརྗོད་པའི་ལེའུ་ཞེས་བྱ་སྟེ་བཅུ་པའོ།། །།དེ་ནས་བྱང་ཆུབ་སེམས་དཔའ་ཞི་བའི་བློ་གྲོས་ཀྱིས་གསང་བ་པའི་བདག་པོ་ལག་ན་རྡོ་རྗེ་ལ་འདི་སྐད་ཅེས་སྨྲས་སོ། །གསང་བ་པའི་བདག་པོ་བྱང་ཆུབ་སེམས་དཔའི་དཀའ་བ་སྤྱོད་པ་དང་། བྱང་ཆུབ་ཀྱི་སྙིང་པོར་འགྲོ་བ་དང་། བདུད་འདུལ་བ་དང་། ཆོས་ཀྱི་འཁོར་ལོ་བསྐོར་བ་དང་། བཀོད་པ་བསྟན་པ་ལས་བརྩམས་ཏེ། དེ་ན་རྨད་དུ་བྱུང་བའི་རྒྱུ་གང་དག་བྱུང་བ་གང་དུ་ཁྱོད་ལ་མངོན་སུམ་དུ་གྱུར་པ་ལ་ཁྱོད་སྤོབས་པར་གྱིས་ཤིག །གསང་བ་པའི་བདག་པོས་སྨྲས་པ། ཞི་བའི་བློ་གྲོས་བྱང་ཆུབ་སེམས་དཔའི་ཡོན་ཏན་བཀོད་པ་བྱུང་བ་ནི་ཚད་མེད་དེ། དེ་དག་ནི་ཚེའི་ཚད་བསྐལ་པར་གནས་པས་ཀྱང་རྒྱས་པར་རྣམ་པར་ཕྱེ་སྟེ་བསྟན་པར་སླ་བ་མ་ཡིན་མོད་ཀྱི། འོན་ཀྱང་ཅུང་ཟད་ཙམ་ཞིག་བརྗོད་པར་བྱའོ། །ཞི་བའི་བློ་གྲོས་བྱང་ཆུབ་སེམས་དཔའི་དཀའ་བ་སྤྱོད་པ་ནི་རྣམ་པ་གཅིག་མ་ཡིན་ཏེ། མུ་སྟེགས་ཅན་གཞོམ་པའི་ཕྱིར་བྱང་ཆུབ་སེམས་དཔའ་སྤྱད་དོ། །དཀའ་ཐུབ་དང་། ལུས་ལ་ཡོངས་སུ་གདུང་བ་ཇི་སྙེད་དང་། ལུས་ཀྱི་སྤྱོད་ལམ་ཇི་སྙེད་ཀྱིས་ཕ་རོལ་མུ་སྟེགས་ཅན་དག་མངོན་པར་སྙེམས་པ་དེ་བས་ཆེས་ཁྱད་པར་དུ་འཕགས་པའམ། ཆེས་མཆོག་ཏུ་གྱུར་པའི་བྱ་དཀའ་བ་དང་། བརྟུལ་ཞུགས་དང་། དཀའ་ཐུབ་གང་དག་དེ་དག་གིས་བྱ་བས་ཀུན་ཏུ་བསྟན་པར་མི་ནུས་པ་དེ་དག་ཐམས་ཅད་བྱང་ཆུབ་སེམས་དཔས་ཀུན་ཏུ་བསྟན་ཏེ། །ཞི་བའི་བློ་གྲོས་དེ་ལ་ཁ་ཅིག་གིས་ནི་བྱང་ཆུབ་སེམས་དཔའ་རྐང་པ་ཡ་གཅིག་བཙུགས་ཏེ། འདུག་པར་མཐོང་། ཁ་ཅིག་གིས་ནི་ལག་པ་བཏེག་སྟེ་འདུག་པར་མཐོང་། ཁ་ཅིག་གིས་ནི་ཉི་མ་ལ་ལྟ་ཞིང་འདུག་པར་མཐོང་། ཁ་ཅིག་གིས་ནི་གདུང་བ་ལྔས་གདུང་བར་མཐོང་། །ཁ་ཅིག་གིས་ནི་ཙོག་ཙོག་པོར་འདུག་ཅིང་སྤོང་བ་ལ་སྦྱོར་བར་བརྩོན་པར་མཐོང་། ཁ་ཅིག་གིས་ནི་རྐང་པ་བཙུགས་ཏེ་མི་འགུལ་བར་མཐོང་།