ནང་ལ་གནས་པ་མ་ཡིན། ཕྱི་རོལ་ལ་གནས་པ་མ་ཡིན། དགེ་བ་ལ་གནས་པ་མ་ཡིན། མི་དགེ་བ་ལ་གནས་པ་མ་ཡིན། འཇིག་རྟེན་པ་ལ་གནས་པ་མ་ཡིན། འཇིག་རྟེན་ལས་འདས་པ་ལ་གནས་པ་མ་ཡིན། ཁ་ན་མ་ཐོ་བ་དང་བཅས་པ་ལ་གནས་པ་མ་ཡིན། ཁ་ན་མ་ཐོ་བ་མེད་པ་ལ་གནས་པ་མ་ཡིན། ཟག་པ་དང་བཅས་པ་ལ་གནས་པ་མ་ཡིན། ཟག་པ་མེད་པ་ལ་གནས་པ་མ་ཡིན། འདས་པ་ལ་གནས་པ་མ་ཡིན། མ་འོངས་པ་ལ་གནས་པ་མ་ཡིན། ད་ལྟར་བྱུང་བ་ལ་གནས་པ་མ་ཡིན། སོ་སོར་བརྟགས་པ་ལ་གནས་པ་མ་ཡིན། སོ་སོར་བརྟགས་པ་མ་ཡིན་པ་ལ་གནས་པ་མ་ཡིན་ཏེ། ཞི་བའི་བློ་གྲོས་དེ་ལྟར་དེ་བཞིན་གཤེགས་པའི་ཡེ་ཤེས་གནས་པ་མི་མངའོ། །དེ་ཆོས་གང་ཡང་མངོན་པར་མི་སྒྲུབ་ལ་སེམས་ཅན་ལ་ཐུགས་བརྩེ་བས་སེམས་ཅན་ཐམས་ཅད་ཀྱི་སེམས་དང་། སྤྱོད་པ་དང་། བསམ་པ་རྣམས་ལ་ཡང་དེའི་ཡེ་ཤེས་མཐོང་བ་ཆགས་པ་མི་མངའ་ཞིང་ཐོགས་པ་མི་མངའ་བ་འཇུག་སྟེ། དེ་ཡང་ལྷུན་གྱིས་གྲུབ་ཅིང་བསྒྲིམ་པ་མི་མངའ་ལ་མངོན་པར་འདུ་བྱ་བ་མི་མངའ་བས་འཇུག་གོ །ཞི་བའི་བློ་གྲོས་འདི་ཡང་དེ་བཞིན་གཤེགས་པའི་ཐུགས་ཀྱི་གསང་བ་སྟེ། མཉམ་པར་བཞག་པའི་གནས་ཀྱང་མི་འདོར་ལ་སེམས་ཅན་ཐམས་ཅད་ལ་སེམས་རྣམ་པར་རིག་པར་ཡང་མཛད་པས་ཐུགས་བསམ་གྱིས་མི་ཁྱབ་པ་ཉིད་དོ། །དེ་བཞིན་གཤེགས་པའི་ཐུགས་ཀྱི་གསང་བའི་ལེའུ་ཞེས་བྱ་བ་སྟེ་དགུ་པའོ།། །།དེ་ནས་བཅོམ་ལྡན་འདས་ལ་ཚེ་དང་ལྡན་པ་ཤཱ་རིའི་བུས་འདི་སྐད་ཅེས་གསོལ་ཏོ། །བཅོམ་ལྡན་འདས་ཕྱོགས་བཅུ་དག་ན་བསྐལ་པ་བཟང་པོ་པའི་བྱང་ཆུབ་སེམས་དཔའ་གང་དག་སངས་རྒྱས་བཅོམ་ལྡན་འདས་རྣམས་ཀྱི་ཐད་ན་ད་ལྟར་ཚངས་པར་སྤྱད་པ་སྤྱོད་པའི་བྱང་ཆུབ་སེམས་དཔའ་དེ་དག་ཐམས་ཅད་ཀྱི་སླད་ན་ཡང་གསང་བ་པའི་བདག་པོ་མཆིས་ལགས་སམ། བཅོམ་ལྡན་འདས་ཀྱིས་བཀའ་སྩལ་པ། ཤཱ་རིའི་བུ་བྱ་བ་འདི་བསམ་གྱིས་མི་ཁྱབ་ཀྱིས་ཞོག་ཤིག །ལྷ་དང་བཅས་པའི་འཇིག་རྟེན་བྱང་ཆུབ་སེམས་དཔའི་སྤྱོད་པ་འདི་ལ་མགོ་རྨོངས་པར་འགྱུར་རོ། །དེ་ལྟ་མོད་ཀྱི་ཤཱ་རིའི་བུ་གང་དག་དད་ཅིང་དགེ་བའི་བཤེས་གཉེན་གྱིས་ཡོངས་སུ་ཟིན་པ་དེ་དག་གནས་འདི་ལ་སྐྲག་པར་མི་འགྱུར་རོ།