བཅོམ་ལྡན་འདས་སངས་རྒྱས་ཀྱི་མཐུ་དང་། སངས་རྒྱས་ཀྱི་བྱིན་གྱི་རླབས་ཀྱིས་བྱང་ཆུབ་སེམས་དཔའི་གསང་བ་རྣམས་དང་། དེ་བཞིན་གཤེགས་པའི་གསང་བ་རྣམས་ལ་གང་ཅུང་ཟད་འཇུག་པར་བགྱི་བ་ཙམ་བསྟན་པར་བགྱིའོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །རིགས་ཀྱི་བུ་དེའི་ཕྱིར་ཅི་ནས་བྱང་ཆུབ་སེམས་དཔའི་གསང་བ་རྣམས་དང་། དེ་བཞིན་གཤེགས་པའི་གསང་བ་རྣམས་ཐོས་ནས་མི་དངང་། མི་སྐྲག །སྐྲག་པར་མི་འགྱུར་བར་འཁོར་དེར་ལེགས་པར་འཁོད་ཅིག །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ཀྱིས་ཐམས་ཅད་དང་ལྡན་པའི་འཁོར་ལ་སྨྲས་པ། གྲོགས་པོ་དག་དེ་བཞིན་གཤེགས་པས་བསམ་གྱིས་མི་ཁྱབ་པ་འདི་བཞི་གསུངས་ཏེ། བཞི་གང་ཞེ་ན། འདི་ལྟ་སྟེ། ལས་བསམ་གྱིས་མི་ཁྱབ་པ་དང་། གླུ་བསམ་གྱིས་མི་ཁྱབ་པ་དང་། བསམ་གཏན་པ་བསམ་གྱིས་མི་ཁྱབ་པ་དང་། སངས་རྒྱས་བསམ་གྱིས་མི་ཁྱབ་པའོ། །ཡང་གྲོགས་པོ་དག་གང་གི་ཕྱིར་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་ནས་བསམ་གྱིས་མི་ཁྱབ་པ་འདི་བཞི་རྣམ་པར་བཀོད་དེ་བསམ་གྱིས་མི་ཁྱབ་པ་འདི་བཞིའི་ནང་ན་དེ་བཞིན་གཤེགས་པ་བསམ་གྱིས་མི་ཁྱབ་པ་མཆོག་ཏུ་གསུངས་སོ། །གྲོགས་པོ་དག་དེ་ལ་ཁྱེད་ཀྱིས་བྱང་ཆུབ་སེམས་དཔའི་བསམ་གྱིས་མི་ཁྱབ་པ་དང་། དེ་བཞིན་གཤེགས་པའི་བསམ་གྱིས་མི་ཁྱབ་པ་ཐོས་ནས་མི་དངང་། མི་སྐྲག །སྐྲག་པར་མི་འགྱུར་བར་བྱའོ། །ཐོས་ནས་ལྷག་པར་དགའ་བ་དང་། དད་པ་དང་། མཆོག་ཏུ་དགའ་བ་རྒྱ་ཆེར་བསྐྱེད་པར་བྱའོ། །དེ་ནས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ཀྱིས་ཇི་ལྟར་ཐམས་ཅད་དང་ལྡན་པའི་འཁོར་དེ་བཞིན་གཤེགས་པའི་གསང་བ་ཉན་པ་ལ་མོས་པར་གྱུར་ཅིང་། ཐམས་ཅད་དང་ལྡན་པའི་འཁོར་གྱི་དཀྱིལ་འཁོར་དུ་ལྷའི་མེ་ཏོག་གིས་པུས་མོ་ནུབ་ཙམ་དུ་བཀྲམ་པར་གྱུར་པ་དེ་ལྟ་བུའི་བྱིན་གྱི་རླབས་ཀྱིས་བྱིན་གྱིས་བརླབས་སོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ།