གསང་བ་པའི་བདག་པོ་ལག་ན་རྡོ་རྗེས་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་འདི་སྐད་ཅེས་སྨྲས་སོ། །ཞི་བའི་བློ་གྲོས་དེ་ལ་དེ་བཞིན་གཤེགས་པའི་ཐུགས་ཀྱི་གསང་བ་དང་། ཐུགས་ཀྱི་ཕྲིན་ལས་ཡོངས་སུ་དག་པ་གང་ཞེ་ན། ཞི་བའི་བློ་གྲོས་འདི་ལྟ་སྟེ་དཔེར་ན་གཟུགས་མེད་པ་ན་སྤྱོད་པའི་ལྷའི་རིས་སུ་སེམས་ཅན་གང་དག་སྐྱེས་པ་དེ་དག་རྣམ་པར་ཤེས་པའི་དམིགས་པ་གཅིག་གིས་བསྐལ་པ་བརྒྱད་ཁྲི་བཞི་སྟོང་དུ་གནས་ཀྱང་ཏིང་ངེ་འཛིན་གྱི་ཚེའི་མཐར་མ་ཐུག་གི་བར་དུ་དེ་དག་གི་རྣམ་པར་ཤེས་པ་དེ་རྣམ་པར་ཤེས་པ་གཞན་གྱི་རྗེས་སུ་མི་འབྲང་སྟེ། དེ་ནས་ཤི་འཕོས་ནས་ལས་ཇི་ལྟར་བསགས་པ་བཞིན་དུ་སྐྱེ་བ་ཡོངས་སུ་འཛིན་ཏོ། །ཞི་བའི་བློ་གྲོས་དེ་བཞིན་དུ་དེ་བཞིན་གཤེགས་པའི་རྣམ་པར་ཤེས་པ་ཡང་མི་གནས་པ་སྟེ་གང་གི་ནུབ་མོ་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་མངོན་པར་རྫོགས་པར་སངས་རྒྱས་པ་དང་། གང་གི་ནུབ་མོ་དེ་བཞིན་གཤེགས་པ་ཕུང་པོའི་ལྷག་མ་མེད་པའི་མྱ་ངན་ལས་འདས་པའི་དབྱིངས་སུ་ཡོངས་སུ་མྱ་ངན་ལས་འདའ་བར་འགྱུར་བའི་བར་དུ་དེ་བཞིན་གཤེགས་པའི་ཐུགས་ལ་ལྡོག་པ་མི་མངའ། ཐུགས་ལ་རྟོག་པ་མི་མངའ། ཐུགས་ལ་རྣམ་པར་དཔྱོད་པ་མི་མངའ། ཐུགས་ལ་འགྱུར་བ་མི་མངའ། ཐུགས་ཀྱི་ཚད་མི་མངའ། ཐུགས་ལ་འཁྲུག་པ་མི་མངའ། ཐུགས་ལ་སེལ་བ་མི་མངའ། ཐུགས་ལ་གཡེང་བ་མི་མངའ། ཐུགས་ལ་ཁེངས་པ་མི་མངའ། ཐུགས་ལ་དམའ་བ་མི་མངའ། ཐུགས་ལ་ཀུན་དུ་སྲུང་བ་མི་མངའ། ཐུགས་ལ་རྒྱུ་བ་མི་མངའ། ཐུགས་ལ་ཤིན་ཏུ་རངས་པ་མི་མངའ། ཐུགས་ལ་རྣམ་པར་འཁྲུག་པ་མི་མངའ། ཐུགས་ལ་འཁོན་དུ་འཛིན་པ་མི་མངའ། ཐུགས་ལ་གཡོ་བ་མི་མངའ། ཐུགས་ལ་ངེས་པར་སེམས་པ་མི་མངའ། ཐུགས་ལ་དགྱེས་པ་མི་མངའ། ཐུགས་ལ་གནོད་པ་མི་མངའ། ཐུགས་ལ་འཇུག་པ་མི་མངའ། ཐུགས་ལ་རབ་ཏུ་རྒྱུ་བ་མི་མངའ། ཐུགས་ལ་རྟོག་པ་མི་མངའ། ཐུགས་ལ་རྣམ་པར་རྟོག་པ་མི་མངའ། ཐུགས་ལ་ཡོངས་སུ་རྟོག་པ་མི་མངའ། ཐུགས་ལ་ཞི་གནས་མི་མངའ། ཐུགས་ལ་ལྷག་མཐོང་མི་མངའ།