།རིན་པོ་ཆེའི་གདུགས་དེ་དག་ལས་ཀྱང་བཅོམ་ལྡན་འདས་བདག་ཅག་ནི་བཅོམ་ལྡན་འདས་ལ་མཆོད་པ་བགྱི་བ་དང་། དེས་དེ་བཞིན་གཤེགས་པའི་ཆོས་ཉིད་རྨད་དུ་བྱུང་བ་འདི་བསྟན་པས་གསང་བ་པའི་བདག་པོ་ལག་ན་རྡོ་རྗེ་རྗེས་སུ་གཟུང་བའི་སླད་དུ་བསྐལ་པ་བཟང་པོ་བའི་བྱང་ཆུབ་སེམས་དཔའ་རྣམས་ཀྱིས་བཏང་བ་ལགས་སོ་ཞེས་སྒྲ་བྱུང་ངོ་། །དེ་ནས་ཐམས་ཅད་དང་ལྡན་པའི་འཁོར་དེ་ངོ་མཚར་དུ་གྱུར་ནས་གསང་བ་པའི་བདག་པོ་ལག་ན་རྡོ་རྗེ་ལ་ཕྱག་འཚལ་ཞིང་གུས་པ་ཆེར་བསྐྱེད་དེ། །ཚིག་འདི་སྐད་ཅེས་བདག་ཅག་གིས་གསང་བ་པའི་བདག་པོ་ལག་ན་རྡོ་རྗེ་མཐོང་བ་དང་། དེ་བཞིན་གཤེགས་པའི་གསུང་བསམ་གྱིས་མི་ཁྱབ་པ་འདི་ཐོས་པ་ནི་བདག་ཅག་གིས་རྙེད་པ་ལེགས་པར་རྙེད་དོ། །གང་དག་བསྟན་པ་འདི་ཐོས་ནས་མོས་ཤིང་སོམ་ཉི་ཟ་བར་མི་འགྱུར་བའི་སེམས་ཅན་དེ་དག་ནི་དོན་ཡོད་པའི་མི་ཉིད་རྙེད་པར་འགྱུར་རོ། །དེ་དག་ནི་དེ་བཞིན་གཤེགས་པས་འདུལ་བར་འགྱུར་ཞིང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ལས་ཕྱིར་མི་ལྡོག་པར་ཡང་འགྱུར་རོ་ཞེས་སྨྲས་སོ། །དེ་ནས་བཅོམ་ལྡན་འདས་ཀྱིས་འཁོར་ཐམས་ཅད་ལ་ལེགས་སོ་ཞེས་བྱ་བ་གནང་སྟེ། བྱང་ཆུབ་སེམས་དཔའ་སེམས་དཔའ་ཆེན་པོ་ཞི་བའི་བློ་གྲོས་ལ་བཀའ་སྩལ་པ། ཞི་བའི་བློ་གྲོས་དེ་བཞིན་གཤེགས་པའི་ཡང་དག་པ། དེ་བཞིན་གཤེགས་པའི་ཆོས་འཇིག་རྟེན་ཐམས་ཅད་དང་མི་འཐུན་པ། དེ་བཞིན་གཤེགས་པའི་གནས་པ་གང་ཡིན་པ་དེ་དག་ནི་གསང་བའི་བདག་པོ་ལག་ན་རྡོ་རྗེས་ཆོས་ཀྱི་རྣམ་གྲངས་འདིའི་ནང་དུ་བསྟན་ཏོ། བསྙད་དོ། །ཡང་དག་པར་བཤད་དོ། །གང་དག་ཆོས་བསྟན་པ་འདི་ལ་མོས་པའི་སེམས་ཅན་དེ་དག་ནི་རིང་པོ་མི་ཐོགས་པར་ཆོས་ཉིད་འདི་ལྟ་བུ་དང་ལྡན་པར་འགྱུར་རོ། །གང་དག་ཆོས་ཀྱི་རྣམ་གྲངས་འདི་ཐོས་ནས་མོས་པ་དང་། འཆང་བ་དང་། མི་དངང་མི་སྐྲག་སྐྲག་པར་མི་འགྱུར་བ་དང་། དོན་རྟོགས་པའི་རྗེས་སུ་རྟོག་པ་དང་། དེ་བཞིན་ཉིད་དུ་སྒྲུབ་པ་དེ་ཉིད་དེ་དག་གི་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་བསྟན་པར་འགྱུར་རོ། །གསང་བ་པའི་བདག་པོ་ལག་ན་རྡོ་རྗེས་བསྟན་པ་འདི་བཤད་པ་ན་ཕྱོགས་བཅུའི་འཇིག་རྟེན་གྱི་ཁམས་གྲངས་མེད་དཔག་ཏུ་མེད་པ་དག་རྣམ་པ་དྲུག་ཏུ་རབ་ཏུ་གཡོས་ཏེ་སྣང་བ་ཆེན་པོས་ཁྱབ་པར་གྱུར་ཏོ།