།དེ་དག་གི་མངོན་པར་ཤེས་པ་དེ་ནི་སྔོན་གྱི་མཐའ་དང་། ཕྱི་མའི་མཐའི་སྒྲ་མཉམ་པ་ཉིད་ཀྱི་ཕྱིར་སྒྲ་ཐམས་ཅད་ཀྱི་རྗེས་སུ་སོང་བའོ། །དེ་དག་གི་མངོན་པར་ཤེས་པ་དེ་ནི་སེམས་ཅན་ཐམས་ཅད་ཀྱི་སེམས་ལ་ལྟ་བ་དང་། སེམས་ཀྱི་རང་བཞིན་ལ་སོ་སོར་རྟོག་ཅིང་ལྟ་བའོ། །དེ་དག་གི་མངོན་པར་ཤེས་པ་དེ་ནི་བསྐལ་པ་མཐའ་ཡས་པ་རྗེས་སུ་དྲན་པ་དང་། སྔོན་གྱི་མཐའ་དང་ཕྱི་མའི་མཐའ་ཡོངས་སུ་མ་ཆད་པའོ། །དེ་དག་གི་མངོན་པར་ཤེས་པ་དེ་ནི་རྫུ་འཕྲུལ་དང་། རྣམ་པར་འཕྲུལ་པ་ཐམས་ཅད་མངོན་དུ་གྱུར་ཅིང་མངོན་པར་འདུ་བྱ་བ་མེད་པའི་མཚན་ཉིད་དོ། །དེ་དག་གི་མངོན་པར་ཤེས་པ་དེ་ནི་ཟག་པ་ཟད་པའི་རྗེས་སུ་འཐུན་པ་དང་། དུས་ལ་ལྟ་ཞིང་དུས་ལས་མི་ཡོལ་བའོ། །དེ་དག་གི་མངོན་པར་ཤེས་པ་དེ་ནི་འཇིག་རྟེན་ལས་འདས་པ་འཕགས་པ་ལ་མངོན་པར་ཕྱོགས་པའི་ངེས་པར་འབྱེད་པའི་ཆ་དང་འཐུན་པའོ། །དེ་དག་གི་མངོན་པར་ཤེས་པ་དེ་ནི་ཉན་ཐོས་དང་། རང་སངས་རྒྱས་ཐམས་ཅད་ཀྱིས་རྟོགས་པར་དཀའ་བའོ། །དེ་དག་གི་མངོན་པར་ཤེས་པ་དེ་ནི་དོན་ཟབ་ཅིང་བདུད་ཕྱིར་རྒོལ་བ་བཅོམ་པའོ། །དེ་དག་གི་མངོན་པར་ཤེས་པ་དེ་ནི་བྱང་ཆུབ་ཀྱི་སྙིང་པོ་སྒྲུབ་ཅིང་སངས་རྒྱས་ཀྱི་ཆོས་ཐམས་ཅད་མངོན་པར་རྫོགས་པར་བྱང་ཆུབ་པའི་མཆོག་གོ །དེ་དག་གི་མངོན་པར་ཤེས་པ་དེ་ནི་ཆོས་ཀྱི་འཁོར་ལོ་སྐོར་བ་དང་འཐུན་པའོ། །དེ་དག་གི་མངོན་པར་ཤེས་པ་དེ་ནི་སེམས་ཅན་ཐམས་ཅད་འདུལ་བར་བྱེད་པའོ། །དེ་དག་གི་མངོན་པར་ཤེས་པ་དེ་ནི་ཆོས་ཐམས་ཅད་ལ་དབང་བྱེད་པའི་ཕྱིར་དབང་བསྐུར་བ་ཐོབ་པའོ། །ཞི་བའི་བློ་གྲོས་འདི་ནི་བྱང་ཆུབ་སེམས་དཔའི་སེམས་ཀྱི་ལས་ཡོངས་སུ་དག་པའོ། །སེམས་ཡོངས་སུ་དག་པ་དེ་ཉོན་མོངས་པ་མེད་ཅིང་ཡོངས་སུ་བྱང་བ་དང་། འོད་གསལ་བ་དང་། ཉེ་བའི་ཉོན་མོངས་པ་དང་བྲལ་བ་དང་། རབ་ཏུ་དུལ་བ་དང་། ལེགས་པར་སྦྱངས་པས་བསམ་གཏན་དང་། རྣམ་པར་ཐར་པ་དང་། ཏིང་ངེ་འཛིན་དང་། སྙོམས་པར་འཇུག་པ་ལ་མཉམ་པར་འཇོག་ཀྱང་ཤིན་ཏུ་ཟད་པ་དང་མི་སྐྱེ་བ་ཉིད་དུ་ལྟུང་བ་ཡང་མ་ཡིན་བསམ་བཞིན་དུ་ཡང་འདིར་སྐྱེ་ལ་འདོད་པའི་ཁམས་ན་འཁྲུགས་པ་ཡང་མེད། བཅིངས་བཞིན་དུ་སྐྱེ་བ་ཡང་མ་ཡིན། བཅིངས་བཞིན་དུ་འཆི་འཕོ་བ་ཡང་མ་ཡིན།