།དེ་ན་གནས་པའི་ཚེ་དེས་མངོན་པར་ཤེས་པའི་སྟོབས་ཀྱིས་ཤིང་ནྱ་གྲོ་དྷའི་རྒྱལ་པོ་བཟང་པོ་དེའི་ཡལ་ག་གྲངས་དུ་ཡོད་པ། ལོ་བཅུ་གཉིས་དང་ཞག་བདུན་གྱི་བར་དུ་བགྲངས་ཏེ་རྟོགས་པར་བྱས་ཤེས་པར་བྱས་སོ། །དེ་ནས་དུས་གཞན་ཞིག་ན་བྲམ་ཟེ་སྔོ་སངས་ཞེས་བྱ་བ་གྲོང་ཁྱེར་ནས་ཁ་ཟས་བསླངས་ཏེ། ཉིན་མོ་གནས་པའི་ཕྱིར་ཤིང་ནྱ་གྲོ་དྷའི་རྒྱལ་པོ་བཟང་པོ་ཞེས་བྱ་བ་ག་ལ་བ་དེར་སོང་ནས་ཟས་ཀྱི་བྱ་བ་བྱས་ཏེ། དྲང་སྲོང་སྣང་བ་ཞེས་བྱ་བ་ག་ལ་བ་དེར་སོང་ནས་མངོན་སུམ་དུ་ཡང་དག་པར་མགུ་བར་འགྱུར་བ་དང་། ཡང་དག་པར་ཆགས་པར་འགྱུར་བའི་གཏམ་མང་པོ་བྱས་ཏེ་ཕྱོགས་གཅིག་ཏུ་འདུག་གོ །དེ་ནས་དྲང་སྲོང་སྣང་བ་ཞེས་བྱ་བས་བྲམ་ཟེ་སྔོ་སངས་ཞེས་བྱ་བ་ལ་འདི་སྐད་ཅེས་སྨྲས་སོ། །ཀྱེ་བྲམ་ཟེ་མིའི་འཇིག་རྟེན་སེམས་ཅན་གྱི་རིས་ན་གང་ཤིང་ནྱ་གྲོ་དྷའི་རྒྱལ་པོ་འདིའི་འདབ་མའི་གྲངས་དུ་ཡོད་པ་རྩི་བ་འམ། རྟོགས་པར་བྱེད་པ་འམ། ཤེས་པར་བྱེད་ནུས་པའི་སེམས་ཅན་འགའ་ཡོད་དམ། སྨྲས་པ་བཙུན་པ་མཆིས་སོ། །དྲང་སྲོང་གིས་སྨྲས་པ། བྲམ་ཟེ་དེ་གང་ཡིན། བྲམ་ཟེས་སྨྲས་པ། བཙུན་པ་བདག་གིས་བགྲང་བར་བགྱིའོ། །དྲང་སྲོང་གིས་སྨྲས་པ། ཀྱེ་བྲམ་ཟེ་དེའི་ཕྱིར་གྲོངས་ཤིག །དེ་ནས་བྲམ་ཟེ་སྔོ་སངས་དེ་ཤིང་ལྗོན་པ་དེ་ལ་ཡང་མི་ལྟ། འདབ་མ་རྣམས་ལ་ཡང་མི་བགྲང་བར་སྐད་ཅིག་ལ་འདབ་མ་རྟོགས་པ་ལ་ཞུགས་ནས་དེའི་ཚེ་ཚིགས་སུ་བཅད་པ་འདི་དག་སྨྲས་སོ། །མི་འཁྲུགས་དྲུག་ཅུ་པང་སྟེང་ཕྲག །བཅུ་དྲུག་དང་ནི་ཁྱད་ཕྱིན་ཕྲག། བཅུ་གསུམ་དང་ནི་དཀྲིགས་པ་ཕྲག །དགུ་བཅུ་རྩ་དྲུག་ཁྲག་ཁྲིག་ཕྲག །སུམ་ཅུ་རྩ་དགུ་ཁྲག་ཁྲིག་ཕྲག། སུམ་ཅུ་དང་ནི་ཐེར་འབུམ་ཕྲག །བརྒྱད་སྟོང་དང་ཡང་བྱེ་བ་ཕྲག །དགུ་བཅུ་རྩ་གཉིས་འདབ་འདི་མཆིས། །བྲམ་ཟེ་དམ་པ་བདག་གིས་འཚལ། །དེ་སྐད་ཐོས་ནས་སྔོ་སངས་ལ། །སྣང་བས་སྨྲས་པ་བྲམ་ཟེའི་མཆོག །ཁྱོད་ནི་བདེན་པའི་ཚིག་སྨྲ་བ། །ལེགས་སོ་ལེགས་སོ་འདི་བདེན་ནོ། །ལོ་ནི་ཁྱུད་ཀོར་བཅུ་གཉིས་དང་། །ཉི་མ་བདུན་དུ་མངོན་ཤེས་ཀྱིས། །འདབ་མ་རྣམས་ནི་བདག་གིས་བགྲངས། །གཙོ་བོ་ཁྱོད་ཀྱིས་སྐད་ཅིག་མཁྱེན། །ཁྱེད་ནི་གཟིགས་པ་མི་མཛད་ཅིང་། །བགྲང་བ་མི་མཛད་སྐད་ཅིག་ཏུ། །འདབ་རྟོགས་པ་ཡི་རྗེས་སུ་ཞུགས། །མཁྱེན་འདི་ཉིད་ཀྱི་འམ་ལྷ་ཡིས་བསྟན། །