ཆོས་ཟབ་མོ་རྟོགས་པ་ཡང་ཤེས་ལ་སེམས་ཅན་གྱི་སྤྱོད་པ་སྣ་ཚོགས་ཀྱི་རྗེས་སུ་ཡང་འཇུག་ཅིང་གཏམ་ཡང་དག་པར་སྟོན་པ་ལ་ཡང་མཁས་པ་དང་། འབྱུང་བ་མེད་པར་ཡང་ཤེས་ལ་བསམས་བཞིན་དུ་སྲིད་པ་ཡང་ཡོངས་སུ་འཛིན་པ་དང་། ལྷག་མཐོང་ཡང་ཤེས་ལ་འབྲས་བུ་ཐོབ་པར་མི་བྱེད་པ་ལ་ཡང་མཁས་པ་དང་། ཉན་ཐོས་དང་། རང་སངས་རྒྱས་ཀྱི་ཡུལ་ཡང་ཡིན་ལ་དེ་བཞིན་གཤེགས་པའི་རྣམ་པར་གྲོལ་བ་འདོད་པའི་རྒྱུན་མི་གཅོད་པ་ལ་ཡང་མཁས་པ་དང་། བྱང་ཆུབ་སེམས་དཔའི་སྤྱོད་པ་མི་འདོར་བ་ཡང་ཤེས་ལ་སངས་རྒྱས་ཀྱི་ཡུལ་ལ་ལྟ་བ་ལ་ཡང་མཁས་པ་སྟེ། རིགས་ཀྱི་བུ་འདི་ནི་བྱང་ཆུབ་སེམས་དཔའ་རྣམས་ཀྱི་རང་གི་སྤྱོད་ཡུལ་ལོ། །རྒྱལ་པོ་ཆེན་པོ་དེ་ལྟར་བྱང་ཆུབ་སེམས་དཔའ་དཔའ་སྟོབས་དེས་བཅོམ་ལྡན་འདས་དེ་བཞིན་གཤེགས་པ་རྣམ་པར་ཞི་སྤྱོད་ལས་སྤྱོད་ཡུལ་ཡོངས་སུ་དག་པ་བསྟན་པ་འདི་ཐོས་ནས་ངོ་མཚར་དུ་གྱུར་ཏེ། བཅོམ་ལྡན་འདས་དེ་ལ་འདི་སྐད་ཅེས་གསོལ་ཏོ། །བཅོམ་ལྡན་འདས་དེ་བཞིན་གཤེགས་པས་བྱང་ཆུབ་སེམས་དཔའ་རྣམས་ཀྱི་རང་གི་སྤྱོད་ཡུལ་ཡོངས་སུ་དག་པ་བསྟན་པ་འདི་ལེགས་པར་གསུངས་པ་ནི་ངོ་མཚར་ལགས་སོ། །བཅོམ་ལྡན་འདས་ཀྱིས་བཀའ་སྩལ་པའི་དོན་བདག་གིས་འཚལ་བ་དང་། བདག་སེམས་པ་ལྟར་ན་བྱང་ཆུབ་སེམས་དཔའ་ཐབས་ལ་མཁས་པའི་རང་གི་སྤྱོད་ཡུལ་ནི་ཆོས་ཐམས་ཅད་ལགས་པ་སྙམ་བགྱིད་དོ། །བཅོམ་ལྡན་འདས་འདི་ལྟ་སྟེ། དཔེར་བགྱི་ན་གནས་གང་ལགས་པ་དང་གཟུགས་སྣང་བ་ཐམས་ཅད་ལ་མི་སྒྲིབ་པ་དང་། །ནམ་མཁའི་སྤྱོད་ཡུལ་སྒྲིབ་པ་མ་མཆིས་པས་གཟུགས་སུ་གདའ་བ་ཐམས་ཅད་ནི་ནམ་མཁའི་སྤྱོད་ཡུལ་ལགས་སོ། །བཅོམ་ལྡན་འདས་དེ་བཞིན་དུ་མངོན་པར་རྫོགས་པར་འཚང་རྒྱ་བས་བྱང་ཆུབ་སེམས་དཔའ་ཐབས་ལ་མཁས་པའི་སྤྱོད་ཡུལ་ནི་ཆོས་ཐམས་ཅད་ལགས་སོ། །བཅོམ་ལྡན་འདས་འདི་ལྟ་སྟེ། དཔེར་བགྱི་ན་གནོད་པ་མ་མཆིས་པའི་སླད་དུ་གཟུགས་སུ་གདའ་བ་ཐམས་ཅད་ནི་ནམ་མཁའི་སྤྱོད་ཡུལ་ལགས་ཏེ། དུག་གི་ཤིང་ལྗོན་པའམ། སྨན་གྱི་ཤིང་ལྗོན་པའམ། ཚེར་མ་ཅན་གྱི་ཤིང་ལྗོན་པའམ། མེ་ཏོག་གི་ཤིང་ལྗོན་པའམ། འབྲས་བུའི་ཤིང་ལྗོན་པའམ། སྤོས་ཀྱི་ཤིང་ལྗོན་པ་གང་ལགས་པ་དེ་དག་ཐམས་ཅད་ནི་ནམ་མཁའ་ལས་རྣམ་པར་འཕེལ་ཡང་ནམ་མཁའ་ནི་དེ་དག་གིས་ཀུན་ནས་ཉོན་མོངས་པར་ཡང་མི་འགྱུར།