།གྲོགས་པོ་དག་ཁྱེད་ཀྱིས་ཆོས་ཀྱི་བྱ་བས་འཇིག་རྟེན་སྐྱོངས་ཤིག །དེ་ལ་དགེ་བ་བཅུའི་ལས་ཀྱི་ལམ་འདི་དག་ནི་འཇིག་རྟེན་སྐྱོང་བར་བྱེད་པའོ། །བཅུ་གང་ཞེ་ན། འདི་ལྟ་སྟེ། སྲོག་གཅོད་པ་སྤང་བ་དང་། རང་གི་ལོངས་སྤྱོད་ཀྱིས་ཆོག་པར་འཛིན་པ་དང་། གཞན་གྱི་ཆུང་མ་དག་ལ་མི་འཕྱོ་བ་དང་། ཆོས་སྤྱོད་པ་རྣམས་ལ་བདེན་པ་ཉིད་དང་། གཞན་གྱི་འཁོར་མི་འབྱེད་པ་དང་། ཐ་བའི་ཚིག་མེད་དེ་ཞེར་མི་འདེབས་པ་དང་། ཚིག་ཙམ་ཇི་ལྟ་བ་བཞིན་ཏེ། གཞན་ལ་མི་སླུ་བ་དང་། གཞན་གྱི་ལོངས་སྤྱོད་ལ་འདོད་པ་མེད་པ་དང་། གནོད་སེམས་ཉེ་བར་ཞི་བ་དང་། ལྟ་བ་ཡོངས་སུ་དག་ཅིང་ཡང་དག་པར་སོང་བ་སྟེ། གྲོགས་པོ་དག་དགེ་བ་བཅུའི་ལས་ཀྱི་ལམ་དེ་དག་ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་གཞན་ཡང་འཇིག་རྟེན་སྐྱོང་བར་བྱེད་པའི་ཆོས་བརྒྱད་དེ། བརྒྱད་གང་ཞེ་ན། འདི་ལྟ་སྟེ། ཇི་སྐད་སྨྲས་པ་དེ་བཞིན་དུ་བྱེད་པ་དང་། བླ་མ་ལ་གུས་པ་དང་། ཐམས་ཅད་དུ་འཐུན་པར་འཛིན་པ་དང་། དྲང་བ་དང་། མཉེན་པ་དང་། སེམས་ཅན་ཐམས་ཅད་ལ་བྱམས་པའི་སེམས་དང་ལྡན་པ་དང་། སྡིག་པ་ཐམས་ཅད་མི་བྱེད་པ་དང་། དགེ་བའི་རྩ་བ་ཐམས་ཅད་ཡང་དག་པར་སྡུད་པ་སྟེ། གྲོགས་པོ་དག་ཆོས་བརྒྱད་པོ་དེ་དག་ནི་འཇིག་རྟེན་སྐྱོང་བར་བྱེད་པའོ། །གྲོགས་པོ་དག་གཞན་ཡང་ཡང་དག་པར་མགུ་བར་བྱ་བའི་ཆོས་འཇིག་རྟེན་སྐྱོང་བར་བྱེད་པ་དྲུག་སྟེ། དྲུག་གང་ཞེ་ན། འདི་ལྟ་སྟེ། སྟོན་པ་དང་། ཚངས་པ་མཚུངས་པར་སྤྱོད་པ་མཁས་པ་རྣམས་དང་། སེམས་ཅན་ཐམས་ཅད་ལ་བྱམས་པའི་ལུས་ཀྱི་ལས་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང་། བླ་མར་བྱེད་པ་དང་། ཡིད་དུ་འོང་བར་བྱེད་པ་དང་། དགའ་བར་བྱ་བ་དང་། བླ་མར་བྱ་བ་དང་། གུས་པར་བྱ་བ་དང་། བསྒོམ་པ་དང་། བསྡུ་བ་དང་། ཏིང་ངེ་འཛིན་དུ་བྱ་བར་འགྱུར་བ་དང་པོའོ། །དེ་བཞིན་དུ་སྟོན་པ་དང་། ཚངས་པ་མཚུངས་པར་སྤྱོད་པ་མཁས་པ་རྣམས་དང་། སེམས་ཅན་ཐམས་ཅད་ལ་བྱམས་པའི་ངག་དང་། ཡིད་ཀྱི་ལས་འདི་ནི་ཡང་དག་པར་མགུ་བར་འགྱུར་བའི་ཆོས་དགའ་བར་བྱེད་པ་དང་། བླ་མར་བྱེད་པ་དང་། ཡིད་དུ་འོང་བར་བྱེད་པ་དང་། དགའ་བར་བྱ་བ་དང་། བླ་མར་བྱ་བ་དང་། གུས་པར་བྱ་བ་དང་། བསྒོམ་པ་དང་། བསྡུ་བ་དང་། ཏིང་ངེ་འཛིན་དུ་བྱ་བར་འགྱུར་བ་གཉིས་པ་དང་གསུམ་པའོ།