།ཞི་བའི་བློ་གྲོས་དེ་ལྟར་ན་ཕྱོགས་བཞིའི་སེམས་ཅན་ནད་པ་ཇི་སྙེད་ཡོད་པ་དེ་དག་གིས་སྲོག་ཆགས་ཀྱི་རྣམ་པ་དེས་པའི་ལུས་ལས་ཤ་བཅད་ཅིང་བཅད་ཅིང་ཁྱེར་ཡང་། དེའི་ལུས་ལས་བྲི་བའམ། གང་བར་ཡང་མི་མངོན་ཏེ་ཡང་བཅད་ཡང་བཅད་ཀྱང་ཕྱིར་སྐྱེ་བར་གྱུར་ཏོ། །ཞི་བའི་བློ་གྲོས་དེ་ལྟར་སེམས་ཅན་ཇི་སྙེད་ཀྱིས་སྲོག་ཆགས་ཀྱི་རྣམ་པ་དེས་པའི་ཤ་ཟོས་པ་དེ་དག་ཟོས་མ་ཐག་ཏུ་ནད་ཐམས་ཅད་ཞི་བར་གྱུར་ཏེ། ནད་མེད་ཅིང་བདེ་བ་དང་། ཉམས་པ་མེད་པར་གྱུར་ཏོ། །དེ་ནས་མཐར་གྱིས་འཛམ་བུའི་གླིང་གི་སེམས་ཅན་གྱི་ནད་ཐམས་ཅད་བསལ་བར་གྱུར་ཏོ། །ཞི་བའི་བློ་གྲོས་དེ་ནས་འཛམ་བུའི་གླིང་གི་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དག་འདི་སྙམ་དུ་སེམས་ཏེ་སྲོག་ཆགས་ཀྱི་རྣམ་པ་དེས་པ་དེས་བདག་ཅག་ནད་ལས་ཡོངས་སུ་ཐར་ཅིང་ནད་མེད་པར་བྱས་ཏེ་བདེ་ཞིང་ཉམས་པ་མེད་པར་བྱས་ཀྱིས་བདག་ཅག་གིས་དེ་ལ་མཆོད་པའི་གནས་ཤིག་བྱའོ་སྙམ་ནས་དེ་དག་ཐམས་ཅད་གཅིག་ཏུ་འདུས་ཏེ་སྲོག་ཆགས་ཀྱི་རྣམ་པ་དེས་པ་ག་ལ་བ་དེར་སོང་ནས་ཐལ་མོ་སྦྱར་ཏེ་སྲོག་ཆགས་ཀྱི་རྣམ་པ་དེས་པ་ལ་ཚིགས་སུ་བཅད་པས་སྨྲས་པ། ཁྱོད་ནི་བདག་ཅག་གནས་དང་སྐྱབས། །ཁྱོད་ནི་བདག་ཅག་སྨན་པ་སྨན། །ཁྱོད་ལ་མཆོད་པ་གང་བགྱི་བ། །ཁྱོད་ཀྱིས་བདག་ཅག་བཀའ་སྩོལ་ཅིག །དེ་ནས་སྲོག་ཆགས་ཀྱི་རྣམ་པ་དེས་པས་ལུས་དེ་མི་སྣང་བར་བྱས་ཏེ་བདག་གིས་བརྒྱ་བྱིན་གྱི་ལུས་སུ་འདུག་ནས་སྐྱེ་བོའི་ཚོགས་ཆེན་པོ་དེ་ལ་ཚིགས་སུ་བཅད་པས་སྨྲས་པ། ང་ལ་ནོར་དང་ཟས་སྐོམ་དང་། །གསེར་དང་འབྲུ་རྣམས་དགོས་པ་མེད། །ཐམས་ཅད་ལྷན་ཅིག་འཐུན་པར་ནི། །དགེ་བ་བཅུ་ཡི་ལས་ལམ་སྲུངས། །སེམས་ཅན་ཀུན་ལ་ཕན་པའི་ཕྱིར། །བྱང་ཆུབ་སྨོན་ལམ་བརྟན་པ་ཐོབ། །ཕན་པའི་དངོས་པོ་ཉིད་ཀྱི་སེམས། །གཅིག་ལ་གཅིག་ཀྱང་བྱམས་པ་བསྐྱེད། །བརྒྱ་བྱིན་ལས་ནི་ཚིག་འདི་ཐོས། །སེམས་ཅན་དེ་དག་རབ་དགའ་སྟེ། །ཤིན་ཏུ་ཡོངས་སུ་དག་པ་ཡི། །དགེ་བ་བཅུ་ཡི་ལས་ལམ་བླངས། །ཞི་བའི་བློ་གྲོས་དེ་ལྟར་དེ་ཚུན་ཆད་འཛམ་བུའི་གླིང་ཐམས་ཅད་དུ་སྐྱེས་པ་དང་། བུད་མེད་དང་། ཁྱེའུ་དང་། བུ་མོ་དེ་སྙེད་ལས་ཐ་ན། །སེམས་ཅན་གཅིག་ཀྱང་ལོག་པར་ལྟུང་བར་སོང་བ་མི་དྲན་ནོ། །དེ་ཚུན་ཆད་དེ་དག་ཐམས་ཅད་ཤི་འཕོས་ཏེ་ཤི་བའི་དུས་བྱས་ནས་ཀྱང་བདེ་འགྲོ་མཐོ་རིས་ཀྱི་འཇིག་རྟེན་དུ་སུམ་ཅུ་རྩ་གསུམ་གྱི་ལྷ་རྣམས་དང་སྐལ་བ་མཉམ་པར་སྐྱེས་ཏེ།