ནག་པོའི་ལམ་རྣམས་ཀྱི་རྣམ་པར་སྨིན་པ་ཆུད་མི་ཟ་བར་རིག་ནས། སྲོག་གི་ཕྱིར་ཡང་མི་བྱ་བ་མི་བྱེད་དེ། དེ་སྲོག་གཅོད་པ་སྤངས་པ་ཡིན། མ་བྱིན་པར་ལེན་པ་དང་། འདོད་པ་ལ་ལོག་པར་གཡེམ་པ་དང་། བརྫུན་དུ་སྨྲ་བ་དང་། ཕྲ་མ་དང་། ངག་རྩུབ་པོ་དང་། ཚིག་ཀྱལ་པ་དང་། བརྣབ་སེམས་དང་། གནོད་སེམས་དང་། ལོག་པར་ལྟ་བ་སྤངས་པ་ཡིན་ཏེ། མི་དགེ་བ་བཅུའི་ལས་ཀྱི་ལམ་ལ་མི་དམིགས་པ་ཡིན་ནོ། །དེ་དད་པར་གྱུར་ནས། དགེ་སྦྱོང་ངམ་བྲམ་ཟེ་གང་དག་ཡང་དག་པར་སོང་བ་དང་། ཡང་དག་པར་ཞུགས་པ་དང་། ཚུལ་ཁྲིམས་དང་ལྡན་པ་དང་། ཡོན་ཏན་དང་ལྡན་པ་དང་། ངེས་པ་དང་། དགེ་བའི་ཆོས་ཅན་དང་། མང་དུ་ཐོས་པ་དང་། ཐོས་པ་ལ་མངོན་པར་བརྩོན་པ་དང་། ཚུལ་བཞིན་དུ་ཡིད་ལ་བྱེད་པ་ལ་རབ་ཏུ་བརྩོན་པ་དང་། ཞི་བ་དང་། དུལ་བ་དང་། ཉེ་བར་ཞི་བ་དང་། དོ་ཟློག་ཕོད་པར་སྨྲ་ཞིང་གཅམ་བུར་མི་སྨྲ་བ་དང་། དགེ་བའི་བསམ་པ་ཅན་དང་། མི་དགེ་བའི་ཆོས་ཡོངས་སུ་སྤོང་བ་དང་། མི་རྒོད་པ་དང་། མ་ཁེངས་པ་དང་། མུ་ཅོར་སྨྲ་བ་མ་ཡིན་པ་དང་། ཚིག་མ་འཆལ་པ་དང་། དྲན་པ་ཉེ་བར་གནས་པ་དང་། ཤིན་ཏུ་མཉམ་པར་བཞག་པའི་སེམས་དང་ལྡན་པ་དང་། སྲིད་པའི་ཚུལ་བཅད་པ་དང་། ཟུག་རྔུ་ཕྱུང་བ་དང་། ཁུར་བོར་བ་དང་། སོམ་ཉི་ལས་ངེས་པར་རྒལ་བ་དང་། ཐེ་ཙོམ་ལས་རྒལ་བ་དང་། ཡང་སྲིད་པ་ལས་རྒལ་བ། འདི་ལྟ་སྟེ། དེ་བཞིན་གཤེགས་པ་དང་། དེ་བཞིན་གཤེགས་པའི་ཉན་ཐོས་དགེ་སྦྱོང་དང་། བྲམ་ཟེ་རྣམ་པ་དེ་ལྟ་བུ་ལ་དགེ་བའི་བཤེས་གཉེན་དུ་རིག་ནས་སྟེན་ཏོ། །བསྙེན་ཏོ། །བསྙེན་བཀུར་བྱེད་དོ། །མཉེས་པར་བྱེད་ཅིང་མི་མཉེས་པར་མི་བྱེད་ལ་དགྱེས་པར་བྱེད་དེ། དེས་དགེ་བའི་བཤེས་གཉེན་དེ་དག་མཉེས་པར་བྱས་པས་ཆོས་ཀྱི་གཏམ་གྱིས་ཡང་དག་པར་སྟོན་ཡང་དག་པར་འཛིན་དུ་འཇུག །ཡང་དག་པར་གཟེངས་སྟོད། ཡང་དག་པར་དགའ་བར་མཛད་དེ། སྦྱིན་པས་ནི་ལོངས་སྤྱོད་ཆེན་པོར་འགྱུར་བར་ཡང་དག་པར་སྟོན། ཚུལ་ཁྲིམས་ཀྱིས་ནི་མཐོ་རིས་སུ་སྐྱེ་བ་དང་། ཐོས་པས་ནི་ཤེས་རབ་ཆེན་པོར་འགྱུར་བ་དང་། བསྒོམས་པས་ནི་འབྲལ་བར་འགྱུར་བར་ཡང་དག་པར་སྟོན་ཏོ། །འདི་ནི་སྦྱིན་པའོ། །འདི་ནི་སྦྱིན་པའི་རྣམ་པར་སྨིན་པའོ།