ཤར་ཕྱོགས་ལོགས་སུ་སངས་རྒྱས་ཀྱི་ཞིང་གང་གཱའི་ཀླུང་གི་བྱེ་མ་སྙེད་འདས་པ་ན་འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་པ་བཀོད་པ་ཞེས་བྱ་བ་དེ་ན་དེ་བཞིན་གཤེགས་པ་བཀོད་པ་ཆེན་པོའི་རྒྱལ་པོ་ཞེས་བྱ་བ་ཆོས་སྟོན་པ་དེར་གསང་བ་པའི་བདག་པོ་ལག་ན་རྡོ་རྗེས་བཀོད་པ་རྣམ་པ་འདི་ལྟ་བུ་མཐོང་ནས་གསང་བ་པའི་བདག་པོས་བཀོད་པ་དེ་ཉིད་འཁོར་གྱི་ཁྱམས་འདིར་བྱིན་གྱིས་བརླབས་སོ་ཞེས་སྒྲ་ཐོས་སོ། །བཅོམ་ལྡན་འདས་སེང་གེའི་གདན་དེ་ལ་བཞུགས་མ་ཐག་ཏུ་དེ་ནས་དེའི་ཚེ་ལྕང་ལོ་ཅན་གྱི་ཕོ་བྲང་འཁོར་ན་གནོད་སྦྱིན་དང་། སྲིན་པོ་དང་། ཡི་དགས་དང་། ཤ་ཟ་དང་། དྲི་ཟ་དང་། གསང་བ་པ་དང་། ལྟོ་འཕྱེ་ཆེན་པོ་ཇི་སྙེད་འཁོད་པ་དེ་དག་ཐམས་ཅད་བཅོམ་ལྡན་འདས་ག་ལ་བ་དེར་དོང་སྟེ་ཕྱིན་པ་དང་། བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འཁོད་ནས། ཐལ་མོ་སྦྱར་ཏེ་བཅོམ་ལྡན་འདས་ལ་འདུད་དོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་རྒྱལ་པོ་ཆེན་པོ་བཞི་དང་། ཐམས་ཅད་དང་ལྡན་པའི་འཁོར་ལ་སྨྲས་པ། ཁྱེད་ཐམས་ཅད་ལྷན་ཅིག་ཏུ་འདུས་ལ་ལྷན་ཅིག་ཏུ་ཚུར་ཤེག །ཇི་ལྟར་བཤམས་པའི་ཞལ་ཟས་བཅོམ་ལྡན་འདས་ལ་གསོལ་ཅིག །དེ་ནས་གསང་བ་པའི་བདག་པོ་ལག་ན་རྡོ་རྗེ་བཙུན་མོའི་འཁོར་དང་བཅས། གཉེན་གྱི་འཁོར་དང་བཅས། བུ་དང་བཅས། དཔུང་དང་བཅས། གཡོག་འཁོར་དང་བཅས་ཏེ། རང་གི་ལག་ནས་གུས་པར་བསྟི་སྟང་དུ་བྱས་ཏེ། བཟའ་བ་དང་། བཅའ་བ་བསོད་པ་མང་པོ་རོ་བྲོ་བ་མང་པོ་དུ་མ་དང་ལྡན་པ་བྱང་ཆུབ་སེམས་དཔའི་ལྷག་པའི་བསམ་པས་ཡོངས་སུ་དག་པ། དེ་བཞིན་གཤེགས་པ་ལ་མཆོད་པར་འོས་པའི་ཞལ་ཟས་ཀྱིས་དེ་བཞིན་གཤེགས་པ་བྱང་ཆུབ་སེམས་དཔའི་དགེ་འདུན་དང་དགེ་སློང་གི་དགེ་འདུན་དང་བཅས་པ་ལ་བསྟབས་ཏེ་ཚིམ་པར་བྱས་སོ། །བསྟབས་ཏེ་ཚིམ་པར་བྱས་ནས་ལྷུང་བཟེད་གྱུ་སྟེ། བཅོམ་ལྡན་འདས་ཕྱག་བཅབས་པར་རིག་ནས་ཆོས་མཉན་པའི་ཕྱིར་བཅོམ་ལྡན་འདས་ཀྱི་སྤྱན་སྔར་འདུག་གོ། །ལྕང་ལོ་ཅན་གྱི་ཕོ་བྲང་འཁོར་ན་འཁོད་པའི་གནོད་སྦྱིན་དང་། སྲིན་པོ་གང་ཡིན་པ་དེ་དག་ཀྱང་འདུས་ནས་བཅོམ་ལྡན་འདས་ཀྱི་ཞལ་དུ་བལྟས་ཏེ། ཐལ་མོ་སྦྱར་ནས་ཕྱག་འཚལ་ཏེ་འཁོད་པར་གྱུར་ཏོ། །ལྕང་ལོ་ཅན་དུ་གཤེགས་ནས་བཤོས་གསོལ་བའི་ལེའུ་ཞེས་བྱ་བ་སྟེ་བཅྭ་བརྒྱད་པའོ།། །།དེ་ནས་གསང་བ་པའི་བདག་པོ་ལག་ན་རྡོ་རྗེས་ཆོས་མཉན་པའི་ཕྱིར་བཅོམ་ལྡན་འདས་ལ་གསོལ་བ་བཏབ་པ།