སངས་རྒྱས་ཀྱི་རྣམ་པར་རོལ་པ་ཆེན་པོས་ལྕང་ལོ་ཅན་གྱི་ཕོ་བྲང་འཁོར་ག་ལ་བ་དེར་ནམ་མཁའི་དཀྱིལ་གྱི་ལམ་ནས་ངང་པའི་རྒྱལ་པོ་བཞིན་དུ་ཐོགས་པ་མེད་པར་གཤེགས་པ་དང་། འདོད་པ་ན་སྤྱོད་པ་དང་། གཟུགས་ན་སྤྱོད་པའི་ལྷའི་བུ་དེ་དག་གིས་བཅོམ་ལྡན་འདས་ནམ་མཁའི་དཀྱིལ་གྱི་ལམ་ནས་ངང་པའི་རྒྱལ་པོ་ལྟར་ཐོགས་པ་ནི་མི་མངའ། ཉི་མའི་དཀྱིལ་འཁོར་འཆར་བ་ནི་འདྲ། ཟླ་བ་ཉ་བའི་དཀྱིལ་འཁོར་སྐར་མའི་ཚོགས་ཀྱིས་བསྐོར་བ་དང་ནི་མཚུངས། ལྷའི་རྒྱལ་པོ་བརྒྱ་བྱིན་ལྟར་ལྷའི་ཚོགས་ཀྱིས་ནི་བསྐོར། ཚངས་པ་ཆེན་པོ་ལྟར་ཚངས་པའི་འཁོར་གྱིས་ནི་བསྐོར་ཅིང་གཤེགས་པར་རྒྱང་རིང་པོ་ནས་མཐོང་ངོ་། །མཐོང་ནས་ཀྱང་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ནས་དགའ་བ་དང་། ཡིད་བདེ་བ་སྐྱེས་ཏེ། བཅོམ་ལྡན་འདས་ལ་མཆོད་པའི་ལས་ཀྱི་ཕྱིར་ལྷའི་མེ་ཏོག་ཨུད་པ་ལ་དང་། ཀུ་མུ་ད་དང་། པད་མ་དཀར་པོ་དང་། མན་ད་ར་བ་དང་། མན་དཱ་ར་བ་ཆེན་པོ་དང་། ཡོངས་འདུ་དང་། ཡོངས་འདུ་ཆེན་པོ་དང་། མན་ཛུ་ཤ་ཀ་དང་། མན་ཛུ་ཤ་ཀ་ཆེན་པོ་དང་། སྠ་ལ་དང་། སྠ་ལ་ཆེན་པོ་དང་། མདོག་མཛེས་དང་། མདོག་མཛེས་ཆེན་པོ་དང་། འཁོར་ལོ་དང་། འཁོར་ལོ་ཆེན་པོ་དང་། དྲི་ཞིམ་དང་། པད་མ་འདབ་བརྒྱ་དང་། འདབ་སྟོང་དང་། སྐར་འོད་དང་། སྐར་མ་དགའ་དང་། ཀུན་ཏུ་བསྲུང་དང་། བསྲུང་རྟག་དང་། རྟག་ཏུ་མེ་ཏོག་ཆགས་དང་མིག་ཏུ་སྡུག་པ་དེ་དག་དང་། མེ་ཏོག་གཞན་དག་གིས་ཀྱང་བཅོམ་ལྡན་འདས་ལ་མངོན་པར་གཏོར་ཏོ། །གདུགས་དང་། རྒྱལ་མཚན་དང་། བ་དན་དག་ཀྱང་བསྒྲེང་ངོ་། །རོལ་མོ་སིལ་སྙན་བརྒྱ་སྟོང་ཡང་ལེན་ཏོ། །དེ་ནས་བཅོམ་ལྡན་འདས་ཀྱིས་བཀོད་པ་རྣམ་པ་དེ་ལྟ་བུ་མེ་ཏོག་གི་ཆར་འབེབས་པ་དང་། སྤོས་དང་། ཕྲེང་བ་དང་། བྱུག་པ་དང་། ཕྱེ་མ་དང་། གོས་དང་། གདུགས་དང་། རྒྱལ་མཚན་དང་། བ་དན་གྱི་ཆར་འབེབས་པ་དང་། སིལ་སྙན་དང་། གླུ་དབྱངས་དང་། རོལ་མོའི་སྒྲ་དང་། ལྷའི་བུ་མོ་བརྒྱ་སྟོང་གླུ་ལེན་པ་དག་དང་། སྐད་ཅིག་ཐང་ཅིག་ཡུད་ཙམ་དེ་ལ་ལྕང་ལོ་ཅན་གྱི་ཕོ་བྲང་འཁོར་དུ་བྱོན་ཏེ། བྱང་ཆུབ་སེམས་དཔའ་རྣམས་དང་། ཉན་ཐོས་ཆེན་པོ་རྣམས་དང་ཐབས་ཅིག་ཏུ་རྒྱལ་པོ་ཆེན་པོ་རྣམ་ཐོས་ཀྱི་བུའི་འདུན་ཁང་དུ་ཞུགས་སོ། །བཅོམ་ལྡན་འདས་ས་ལ་བཞུགས་མ་ཐག་ཏུ་དེ་ནས་དེའི་ཚེ་ས་ཆེན་པོ་དལ་ཞིང་མི་དྲག་ལ་སེམས་ཅན་ཐམས་ཅད་ལ་མི་གནོད་པར་གཡོས་པར་གྱུར་ཏོ།