འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་པ་བཀོད་པ་ཞེས་བྱ་བར་གཤེགས་པའི་ཚེ་སངས་རྒྱས་ཀྱི་ཞིང་དེར་བདག་གིས་ལྷའི་དང་། མིའི་བཀོད་པ་བསམ་གྱིས་མི་ཁྱབ་པ་ལས་ཡང་དག་པར་འདས་པའི་བཀོད་པ་མཐོང་གིས། བཅོམ་ལྡན་འདས་ལ་མཆོད་པའི་ལས་ཀྱི་ཕྱིར། བདག་གིས་འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་པ་བཀོད་པ་དེའི་བཀོད་པ་ཅི་འདྲ་བ་དེ་འདྲ་བའི་འཁོར་གྱི་ཁྱམས་བཀོད་པར་བྱའོ་སྙམ་མོ། །དེ་ནས་གསང་བ་པའི་བདག་པོ་ལག་ན་རྡོ་རྗེས་དེའི་ཚེ་བཀོད་པ་ཆེན་པོའི་རྒྱལ་པོ་ཞེས་བྱ་བའི་ཏིང་ངེ་འཛིན་ལ་སྙོམས་པར་ཞུགས་སོ། །གསང་བ་པའི་བདག་པོ་ལག་ན་རྡོ་རྗེ་བཀོད་པ་ཆེན་པོའི་རྒྱལ་པོའི་ཏིང་ངེ་འཛིན་ལ་སྙོམས་པར་ཞུགས་མ་ཐག་ཏུ་དེ་ནས་དེའི་ཚེ་འཇིག་རྟེན་གྱི་ཁམས་ཡོན་ཏན་རིན་པོ་ཆེ་མཐའ་ཡས་པ་བཀོད་པ་དེའི་བཀོད་པ་ཅི་འདྲ་བ་དེ་འདྲ་བའི་འཁོར་གྱི་ཁྱམས་བཀོད་པ་ཞིག་ལྕང་ལོ་ཅན་གྱི་ཕོ་བྲང་འཁོར་གྱི་དབུས་ན་གནས་པར་སྣང་ངོ་། །འཁོར་གྱི་ཁྱམས་དེ་ཡང་ཡངས་ཤིང་རྒྱ་ཆེ་སྟེ། ཤར་ནུབ་ཏུ་ཆུར་ནི་དཔག་ཚད་དྲུག་ཅུ་རྩ་བཞི་ཡོད་པ། ལྷོ་བྱང་དུ་རྒྱར་ནི་དཔག་ཚད་བཞི་བཅུ་རྩ་གཉིས་ཡོད་པ། ས་གཞི་ནི་བཻ་དཱུརྱ་སྔོན་པོའི་རང་བཞིན་དུ་གནས་པ། ཕྱིར་ནི་ཨན་ད་རྙིལ་ལས་བྱས་པ། ཟུང་གི་ཕྲུགས་རིན་པོ་ཆེ་ཐམས་ཅད་ཀྱིས་སྤྲས་པ། འཛམ་བུའི་ཆུ་བོའི་གསེར་གྱི་པད་མས་བརྒྱན་པ། རྒྱན་ཕྲེང་སྣ་ཚོགས་དུ་མས་སྤྲས་པ། རས་བཅོས་བུ་དུ་མ་བཏིང་བ། མུ་ཏིག་གི་རྒྱན་ཕྲེང་དུ་མ་སྤྱངས་པ། དར་གྱི་ལྡ་ལྡི་དུ་མས་མཛེས་པར་བྱས་པ། མེ་ཏོག་གི་ཕྲེང་བ་དུ་མས་བཀབ་པ། པོག་པོར་དུ་མ་ནས་བདུགས་པ། ལྷའི་མེ་ཏོག་ཁ་དོག་དུ་མ་དང་། ཁ་དོག་སྣ་ཚོགས་བཀྲམ་པ། བཀྲ་བ། བལྟ་ན་སྡུག་པ། ཡིད་དུ་འོང་བ། ལུས་སིམ་པར་བྱེད་པ། སེམས་ལ་དགའ་བ་བསྐྱེད་པ། ཡོན་ཏན་གྱི་ཚོགས་མཐའ་ཡས་པ་དང་ལྡན་པ། བསྔགས་པའི་བསྟན་པ་ཚད་མེད་པ་སྟེ། འཁོར་གྱི་ཁྱམས་དེར་སེང་གེའི་ཁྲི་རིན་པོ་ཆེའི་རྩ་བས་བརྒྱན་པ། རིན་པོ་ཆེའི་ཁ་ཁྱེར་གྱིས་བསྐོར་བ། རིན་པོ་ཆེའི་པད་མ་བཀོད་པ་དང་ལྡན་པ། མུ་ཏིག་གི་དྲ་བས་གཡོགས་པ། མིག་མངས་རིས་སུ་བྲེས་པ། ལྷའི་རས་བཅོས་བུ་དུ་མ་བཏིང་བ། སྟེང་དུ་རིན་པོ་ཆེའི་དྲ་བ་བྲེས་པ། བཀོད་པ་སྔོན་མ་མཐོང་མ་ཐོས་པ།