སྨྲས་པ། གང་གི་ཚེ་དོན་དང་དོན་མ་ཡིན་པ་དོན་དུ་མི་གཉེར་བའོ། །སྨྲས་པ། གང་གི་ཚེ་དོན་དང་དོན་མ་ཡིན་པ་དོན་དུ་མི་གཉེར་བར་གྱུར་པ་དེའི་ཚེ་ཅི་ཞིག་དོན་དུ་གཉེར་བར་འགྱུར། སྨྲས་པ། གང་གི་ཚེ་དོན་དང་དོན་མ་ཡིན་པ་དོན་དུ་མི་གཉེར་བར་གྱུར་པ་དེའི་ཚེ་ཆོས་དོན་དུ་གཉེར་བར་འགྱུར་རོ། །སྨྲས་པ། གལ་ཏེ་ཆོས་དོན་དུ་གཉེར་བར་གྱུར་ན་དེ་དོན་དུ་གཉེར་བ་ཉིད་མ་ཡིན་ནམ། སྨྲས་པ། རིགས་ཀྱི་བུ་ཆོས་དོན་དུ་གཉེར་བ་ནི་ཅི་ཡང་དོན་དུ་གཉེར་བ་མ་ཡིན་ནོ། །དེ་ཅིའི་ཕྱིར་ཞེ་ན། གང་གིས་གང་དོན་དུ་གཉེར་བ་དེ་ནི་ཆོས་མ་ཡིན་ཏེ་ནི་ཆོས་སུ་མི་རུང་ངོ་། །སྨྲས་པ། ཆོས་གང་ཡིན། སྨྲས་པ། གང་ལ་ཆོས་ཀྱི་སྒྲ་ཡང་མི་དམིགས་པའོ། །སྨྲས་པ། གང་ལ་ཆོས་ཀྱི་སྒྲ་ཡང་མི་དམིགས་པ་དེ་ལ་ཆོས་གང་ཡིན། སྨྲས་པ། རིགས་ཀྱི་བུ་གང་ལ་ཡི་གེ་རྣམས་ཀུན་ཏུ་མི་འབྱུང་བ་དེ་ཉིད་ཆོས་ཡིན་ནོ། །དེ་བས་ན་ཆོས་ཐམས་ཅད་ནི་བརྗོད་དུ་མེད་པ། སྒྲ་མེད་པ་བརྗོད་པ་མེད་པའོ། །རིགས་ཀྱི་བུ་སུ་ཞིག་བདག་སྨྲའོ་ཞེས་སྨྲ་བ་དེ་འཆལ་པར་སྨྲ་བའོ། །གང་འཆལ་པར་སྨྲ་བ་དེ་ལ་ཆོས་མེད་དོ། །འདུལ་བ་མེད་དོ། །སྨྲས་པ། གསང་བ་པའི་བདག་པོ་གང་ཆོས་གསུང་བའི་དེ་བཞིན་གཤེགས་པ་འཆལ་པར་གསུང་བར་མི་འགྱུར་རམ། སྨྲས་པ། ཞི་བའི་བློ་གྲོས་དེ་བཞིན་གཤེགས་པས་ཡི་གེ་གཅིག་ཀྱང་མ་གསུངས་སོ། །མ་བརྗོད་དོ་ཞེས་ཁོ་བོས་སྔར་མ་བཤད་དམ། དེ་ལྟ་མོད་ཀྱི་སྨོན་ལམ་གྱི་དབང་གིས་དེ་བཞིན་གཤེགས་པའི་གསུང་སེམས་ཅན་རྣམས་ཀྱིས་དམིགས་སོ། །སྨྲས་པ། སྨྲས་ན་ཉེས་པ་ཅི་ཡོད། སྨྲས་པ། ངག་གི་ལས་ཀྱི་ཉེས་པར་འགྱུར་རོ། །སྨྲས་པ། ངག་གི་ལས་ལས་ཉེས་པ་ཅི་ཞིག་འབྱུང་། སྨྲས་པ། ཡི་གེ་ལ་སེམས་པས་བཀླགས་པའི་ཉེས་པར་འགྱུར་རོ། །སྨྲས་པ། ཉེས་པ་མེད་པ་གང་ཡིན། སྨྲས་པ། གང་མི་སྨྲ་མི་རྗོད་པ་དེ་ལ་རྣམ་པར་རིག་པ་གང་ཡང་མེད་དོ། །རྣམ་པར་རིག་པ་མེད་པ་ནི་ཉེས་པ་མེད་པའོ། །གང་བདག་ལ་རྣམ་པར་རིག་པར་མི་བྱེད་པ་དང་། གཞན་ལ་རྣམ་པར་རིག་པར་མི་བྱེད་པ་དེ་ཉེས་པ་མེད་པའོ། །སྨྲས་པ། ཉེས་པའི་རྩ་བ་གང་ཡིན། སྨྲས་པ། ཉེས་པའི་རྩ་བ་ནི་འཛིན་པའོ། །སྨྲས་པ། འཛིན་པའི་རྩ་བ་ཅི་ཡིན། །སྨྲས་པ། མངོན་པར་ཞེན་པ་ནི་རྩ་བའོ། །