།གང་ཡང་གྲོང་ཁྱེར་ཆེན་པོ་དག་གི་དུར་ཁྲོད་ཆེན་པོ་སྲོག་ཆགས་བརྒྱ་སྟོང་དུ་མས་གང་བར་གྱུར་པ་དེར་ཡང་། བྱང་ཆུབ་སེམས་དཔའ་སེམས་དཔའ་ཆེན་པོ་དེས་བདག་གི་ལུས་ཆེན་པོ་ཤི་ཞིང་དུས་ལས་འདས་པར་སྟོན་ཏེ། དེར་ཡང་སེམས་ཅན་དུད་འགྲོའི་སྐྱེ་གནས་སུ་གྱུར་པ་དེ་དག་གིས་ཅི་ཙམ་འདོད་པར་ཤ་ལ་ཟོས་ནས་ཚེའི་མཐར་ཕྱིན་ཏེ་འཆི་བའི་དུས་སུ་གྱུར་ཅིང་ཤི་ནས་བདེ་འགྲོ་མཐོ་རིས་ཀྱི་འཇིག་རྟེན་དུ་ལྷའི་ནང་དུ་སྐྱེའོ། །དེ་ཡང་དེ་དག་གི་ཡོངས་སུ་མྱ་ངན་ལས་འདས་པའི་བར་གྱི་རྒྱུར་འགྱུར་རོ། །དེ་ནི་བྱང་ཆུབ་སེམས་དཔའ་དེ་ཉིད་སྔོན་གྱི་སྨོན་ལམ་ཡོངས་སུ་དག་པའི་ཕྱིར་ཏེ་བདག་འཆི་བའི་དུས་སུ་གྱུར་ནས། ཤི་བའི་ལུས་ལ་སེམས་ཅན་གང་དག་གིས་ཟོས་པ་དེ་དག་ལ་དེ་ཉིད་མཐོ་རིས་སུ་སྐྱེ་བ་ནས་ཡོངས་སུ་མྱ་ངན་ལས་འདའ་བའི་བར་གྱི་རྒྱུར་གྱུར་ཅིག་ཅེས་ཡུན་རིང་པོ་ནས་སྨོན་ལམ་བཏབ་སྟེ། ཚུལ་ཁྲིམས་དང་ལྡན་པ་དེ་བསམ་པ་འགྲུབ། འདོད་པ་འགྲུབ། སྨོན་པ་འགྲུབ་བོ། །ཞི་བའི་བློ་གྲོས་རྣམ་གྲངས་འདིས་ཇི་ལྟར་བྱང་ཆུབ་སེམས་དཔའི་ལུས་ཚད་མེད་ཅིང་མཐའ་ཡས་པར་ཁྱོད་ཀྱིས་འདི་ལྟར་རིག་པར་བྱ་སྟེ། ཞི་བའི་བློ་གྲོས་སྔོན་བྱུང་བ་འདས་པའི་དུས་ན་འཛམ་བུའི་གླིང་དུ་གཏོགས་པ་ནམ་མཁས་བསྐོར་བ་འདི་ཉིད་དུ་གྲོང་ཁྱེར་བརྒྱད་ཁྲི་བཞི་སྟོང་པ་ཕྲག་བཞི་བྱུང་སྟེ། དེ་ན་གྲོང་དང་། ཚོང་དུས་དང་། རི་ཁྲོད་སྟོང་ཕྲག་མང་པོ་སྲོག་ཆགས་བྱེ་བ་ཁྲག་ཁྲིག་བརྒྱ་སྟོང་མང་པོ་གནས་པ་ཡོད་དེ། ཞི་བའི་བློ་གྲོས་དེའི་ཚེ་དེའི་དུས་ན། ནད་ཆེན་པོའི་བསྐལ་པ་བར་མ་བྱུང་སྟེ། དེར་སེམས་ཅན་དག་ནད་སྣ་ཚོགས་ཀྱིས་བཏབ་པར་གྱུར་ནས་ཕལ་ཆེར་ལུས་ཤུ་བ་ཅན་དང་། ལུས་རྣགས་པ་དང་། འབྲས་དང་། ཕོལ་མིག་དང་། མེ་དབལ་དང་། ཐོར་བུ་དང་། རླུང་དང་། མཁྲིས་པ་དང་། བད་ཀན་གྱི་ནད་རྣམས་ཀྱིས་རྒྱས་པར་གྱུར་ཏོ། །དེའི་ཚེ་སྨན་པ་སྟོང་ཕྲག་དུ་མ་སེམས་ཅན་དེ་དག་གི་ནད་དེ་ཞི་བར་བྱ་བའི་ཕྱིར་བརྩོན་པར་གྱུར་ཀྱང་སེམས་ཅན་དེ་དག་གི་ནད་དེ་བསལ་བར་མ་ནུས་སོ། །དེར་སེམས་ཅན་དེ་དག་གིས་གསོ་བའི་དཔྱད་མ་རྙེད་དེ། སྐྱབས་མེད་རྟེན་མེད་ནས་འདི་སྐད་དུ། ནད་འདི་ལས་ནི་ཐར་བྱེད་པ། །ལྷ་འམ་ཀླུ་འམ་དྲི་ཟ་འམ། །གནོད་སྦྱིན་དང་ནི་མི་ཡང་རུང་། །མི་མ་ཡིན་པ་སུ་ཞིག་ཡོད། །སྡུག་བསྔལ་འདི་ལས་ཐར་བྱེད་པ། །དེ་ལ་ནོར་རྣམས་ཐམས་ཅད་གཏང་། །རྗེས་སུ་བསྟན་པ་བཞིན་དུ་བྱ།