Degé Kangyur volume 39, F.86.a

།བཀོད་པ་མཐའ་ཡས་དེ་བཞིན་གཤེགས་པ་ནི་ཆོས་འདུལ་བ་ཟབ་མོ་ལྷ་དང་བཅས་པའི་འཇིག་རྟེན་ཐམས་ཅད་དང་མི་འཐུན་པར་གྱུར་པ་འདི་ཡང་དག་པར་གསུང་ཡང་གསུང་བ་ཡང་མེད་དོ། །​དེ་བཞིན་གཤེགས་པས་ལམ་ཐམས་ཅད་ངེས་པར་སྤང་བའི་ཕྱིར་རྩོད་པ་ཉེ་བར་ཞི་བའི་ཆོས་སྟོན་པར་མཛད་ཀྱང་འདི་ལ་ལམ་ཡང་མི་དམིགས་ན། ལམ་དེ་མི་ཟད་པར་འདོགས་པ་ལྟ་སྨོས་ཀྱང་ཅི་དགོས། བཀོད་པ་མཐའ་ཡས་སྲིད་པ་ཐམས་ཅད་ཅེས་བྱ་བ་འདི་ནི་ཆོས་དགེ་བ་དང་མི་དགེ་བ་རྣམས་ཀྱི་ཚིག་བླ་དགས་ཡིན་ཏེ། ཆོས་ཐམས་ཅད་ནི་ཆོས་དགེ་བ་དང་། མི་དགེ་བ་དག་དང་ལྡན་པར་འདོགས་པ་ཡིན་ནོ། །​དེ་ལ་དགེ་བ་ཡང་སྟོང་ལ། མི་དགེ་བ་ཡང་སྟོང་། དགེ་བ་ཡང་རྣམ་པར་དབེན་ལ། མི་དགེ་བ་ཡང་རྣམ་པར་དབེན། དགེ་བ་ཡང་མི་དགེ་བ་དང་མི་འདྲེ་ལ། མི་དགེ་བ་ཡང་དགེ་བ་དང་མི་འདྲེ་ཞིང་། དགེ་བ་དང་མི་དགེ་བར་མངོན་པར་ཞེན་པའི་རྒྱུ་དང་རྐྱེན་ཡང་མེད་དོ། །​དེའི་ཕྱིར་དེ་བཞིན་གཤེགས་པས་ཆོས་ཐམས་ཅད་ནི་ལུང་དུ་མ་བསྟན་པ་ཉིད་དུ་བསྟན་ཏེ། དགེ་བ་ནི་ཡང་དག་པར་ཡོད་པ་མ་ཡིན་ནོ། །​གང་དག་ཡོད་པ་མ་ཡིན་པ་དེ་དག་ནི་ལུང་དུ་མ་བསྟན་པ་སྟེ། དེ་ལ་ནི་རྒྱུ་ཡང་མེད། རྒྱུར་སྟོན་པ་ཡང་མེད་དོ། །​བཀོད་པ་མཐའ་ཡས་ཆོས་དེ་ལྟ་བུ་ཁོང་དུ་ཆུད་པར་བྱ་བའི་ཕྱིར་ཆོས་ཐམས་ཅད་ལུང་དུ་མ་བསྟན་ཅིང་བསྟན་དུ་མེད་པར་བསྟན་པ་ལ་ལྟོས། ཆོས་ཐམས་ཅད་ལུང་དུ་མ་བསྟན་ཅིང་བསྟན་དུ་མེད་པ་འདི་ནི་བྱང་ཆུབ་སེམས་དཔའ་རྣམས་ཀྱི་བཏང་སྙོམས་ཀྱི་སྒོ་ཡོངས་སུ་རྫོགས་པར་འགྱུར་བ་ཡིན་ནོ། །​ཆོས་དགེ་བ་དང་མི་དགེ་བ་ཐམས་ཅད་ནི། ཇི་ལྟར་སྣང་བ་བཞིན་དུ་རྗེས་སུ་འགྲོ་བ་མེད་དེ། དེ་དག་ནི་ལུང་དུ་མ་བསྟན་པའི་སྒོར་རྗེས་སུ་འགྲོ་བ་ཡིན་ནོ། །​གང་ལུང་དུ་མ་བསྟན་པའི་སྒོ་དེ་ནི་སྒོ་མེད་པ་ཡིན་ནོ། །​གང་ལ་སྒོ་མེད་པ་དེ་ལ་ནི་སྒོར་དམིགས་སུ་མེད་དོ། །​གང་སྒོར་དམིགས་སུ་མེད་པ་དེ་ནི་སྒོ་རྣམ་པར་དག་པ་ཡིན་ནོ། །​འདི་ནི་བྱང་ཆུབ་སེམས་དཔའ་རྣམས་ཀྱི་གཟུངས་ཀྱི་སྒོ་ལ་འཇུག་པའི་ཆོས་རྣམ་པར་སྦྱོང་བ་ཡིན་ཏེ། སྒོ་དེས་དེ་དག་ཆོས་ཐམས་ཅད་ལ་སྣང་བ་ཐོབ་ནས་ཆོས་རྣམས་ལ་རྨོངས་པའམ། ཐེ་ཚོམ་ཟ་བ་འམ། ཡིད་གཉིས་སུ་མི་འགྱུར་ཞིང་ཐོགས་པ་མེད་པར་ཆོས་ཤེས་པ་ལ་མཁས་པ་རྟོགས་པར་འགྱུར་རོ།​། །​།བམ་པོ་བཞི་པ་སྟེ་ཐ་མ། བཀོད་པ་མཐའ་ཡས་འདི་ལ་བྱང་ཆུབ་སེམས་དཔས་ཤེས་རབ་ཀྱི་མིག་རྣམ་པར་དག་པ་འདོད་པར་བྱའོ།



The English translation of this folio by 84000 - Translating the words of the Buddha can be found at:
https://read.84000.co/translation/toh46.html?part=UT22084-039-002-552#UT22084-039-002-552